ໃນວັນທີ 10 ກໍລະກົດ 2018 ນີ້ ຢູ່ທີ່ຫ້ອງປະຊຸມຊັ້ນ III ຂອງຫ້ອງວ່າການປົກຄອງເມືອງວຽງທອງ ແຂວງບໍລິຄຳໄຊ ໄດ້ຈັດກອງປະຊຸມເຜີຍແຜ່ເຊື່ອມຊຶມມະຕິຂອງຄະນະບໍລິຫານງານສູນກາງພັກປະຊາຊົນປະຕິວັດລາວ ວ່າດ້ວຍ ການຍົກສູງປະສິດທິພາບໃນການຄຸ້ມຄອງລັດ - ຄຸ້ມຄອງສັງຄົມດ້ວຍກົດໝາຍ ໃຫ້ພະນັກງານຫຼັັກແຫຼ່ງຂອງເມືອງ ໂດຍເປັນກຽດເຂົ້າຮ່ວມເປັນປະທານ ແລະ ເຜີຍແຜ່ເອກະສານຂອງ ທ່ານ ວົງສີ ທອງສີອິນທິປັນຍາ ກຳມະການພັກແຂວງ ເລຂາພັກເມືອງ ເຈົ້າເມືອງວຽງທອງ, ມີບັນດາຄະນະປະຈຳພັກເມືອງ, ກຳມະການພັກເມືອງ, ຫົວໜ້າຫ້ອງການ ແລະ ພະນັກງານ - ລັດຖະກອນທຸກຫ້ອງການອ້ອມຂ້າງເຂົ້າຮ່ວມ.

    ໃນກອງປະຊຸມ ທ່ານ ວົງສີ ທອງສີອິນທິປັນຍາ ໄດ້ຍົກໃຫ້ເຫັນການຄຸ້ມຄອງລັດ - ຄຸ້ມຄອງສັງຄົມດ້ວຍກົດໝາຍເປັນພື້ນຖານຂອງການສ້າງລັດ ທີ່ປົກຄອງດ້ວຍກົດໝາຍ ເຊິ່ງແມ່ນຂະບວນວິວັດໜຶ່ງຂອງການບູລະນະລະບອບປະຊາທິປະໄຕປະຊາຊົນ ທີ່ຕ້ອງໄດ້ດໍາເນີນເປັນແຕ່ລະບາດກ້າວຢ່າງຮອບຄອບ ແລະ ໜັກແໜ້ນສູ່ຈຸດໝາຍສັງຄົມນິຍົມ, ນັບແຕ່ໄດ້ດໍາເນີນແນວທາງການປ່ຽນແປງໃໝ່ມານີ້ ພັກເຮົາໄດ້ນໍາພາສ້າງ, ນໍາໃຊ້ ແລະ ປັບປຸງລັດຖະທໍາມະນູນ, ນິຕິກໍາ, ກົດໝາຍ ທີ່ເປັນເຄື່ອງມືຄຸ້ມຄອງລັດ-ຄຸ້ມຄອງສັງຄົມ, ປົກປ້ອງສິດ ແລະ ຜົນປະໂຫຍດອັນຊອບທໍາຂອງປະຊາຊົນບັນດາເຜົ່າ, ຂອງລັດ - ຂອງລວມໝູ່ ຮັບປະກັນການປົກປັກຮັກສາລະບອບປະຊາທິປະໄຕປະຊາຊົນຢ່າງໝັ້ນຄົງເປັນຕົ້ນແມ່ນຮັບປະກັນພັກນໍາພາ ແລະ ກໍາອໍານາດຕາມກົດໝາຍ, ຮັບປະກັນຄວາມໝັ້ນຄົງໃຫ້ແກ່ລັດປະຊາທິປະໄຕປະຊາຊົນດ້ວຍກົດໝາຍ, ຮັບປະກັນຄວາມຍຸຕິທໍາໃນສັງຄົມ, ເພີ່ມນິຕິກໍາໃນການປົກຄອງ, ຮັບປະກັນສິດເປັນເຈົ້າຂອງປະຊາຊົນຕາມກົດໝາຍ, ຮັບປະກັນການຄຸ້ມຄອງຫຼັກການລວມສູນເປັນເອກະພາບຂອງບັນດາອົງການອໍານາດລັດ, ເພີ່ມທະວີຍົກສູງການປະຕິບັດກົດໝາຍໃຫ້ມີປະສິດທິພາບ, ຍົກສູງປະສິດທິພາບການກໍ່ສ້າງພະນັກງານກົດໝາຍ, ຍົກສູງປະສິດທິພາບການຕ້ານ ແລະ ສະກັດກັ້ນພະຍາດອາດຍາສິດ-ການສໍ້ລາດບັງຫຼວງ, ເສີມຂະຫຍາຍສິດເປັນເຈົ້າການຂອງປະຊາຊົນໃນການຄຸ້ມຄອງລັດ - ຄຸ້ມຄອງສັງຄົມດ້ວຍກົດໝາຍ, ເພີ່ມທະວີການພົວພັນຮ່ວມມືສາກົນ, ປັບປຸງແບບແຜນການນໍາພາຂອງຄະນະພັກຂັ້ນຕ່າງໆໃຫ້ສອດຄ່ອງກັບການຄຸ້ມຄອງລັດ-ຄຸ້ມຄອງສັງຄົມດ້ວຍກົດໝາຍ, ຄະນະພັກ, ສະມາຊິກພັກ, ພະນັກງານທຸກຂັ້ນຕ້ອງເພີ່ມທະວີຄວາມເປັນແບບຢ່າງນໍາໜ້າໃນການຈັດຕັ້ງປະຕິບັດກົດໝາຍຢ່າງເຂັ້ມງວດ.