ພິມ
ໝວດ: ຂ່າວປະຈຳວັນ.
ກົດເບິ່ງ: 207

     ໃນວັນທີ 11 ກໍລະກົດ 2018 ຢູ່ທີ່ຫ້ອງຮັບຮອງຂອງແຂວງ ທ່ານ ປອ ກອງແກ້ວ ໄຊສົງຄາມ ເຈົ້າແຂວງບໍລິຄໍາໄຊ ພ້ອມດ້ວຍຄະນະ ໄດ້ຕ້ອນຮັບການເຂົ້າພົບປະຢ້ຽມຢາມຂອງທ່ານ ນາດັບ ແອັດສະກາ ເອກອັກຄະລັດຖະທູດອິດສະລະແອ່ນ ປະຈຳນະຄອນຮາໂນ້ຍ ສສ ຫວຽດນາມ ພ້ອມດ້ວຍຄະນະ ເນື່ອງໃນໂອກາດທີ່ເດີນທາງມາເຄື່ອນໄຫວວຽກງານຢູ່ ສປປ ລາວ.

    ໃນໂອກາດນີ້ ທ່ານເຈົ້າແຂວງບໍລິຄໍາໄຊ ໄດ້ກ່າວສະແດງຄວາມຕ້ອນຮັບຢ່າງອົບອຸ່ນ ພ້ອມທັງຍ້ອງຍໍຊົມເຊີຍ ແລະ ຕີລາຄາສູງ ໃນການເຂົ້າພົບປະຢ້ຽມຢາມໃນຄັ້ງນີ້ ເຊິ່ງເປັນການສ້າງເງື່ອນໄຂອັນດີຕໍ່ກັບການສ້າງສາຍພົວພັນມິດຕະພາບ ລະຫວ່າງສອງປະເທດໃຫ້ແໜ່ນແຟ້ນຍິ່ງຂຶ້ນກວ່າເກົ່າ. ພ້ອມດຽວກັນນັ້ນ ທ່ານຍັງໄດ້ນໍາສະເໜີລາຍງານສະພາບລວມ ໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມໂດຍຫຍໍ້ຂອງແຂວງ ແຕ່ລະດ້ານໃນໄລຍະຜ່ານມາ ໃຫ້ກັບທ່ານເອກອັກຄະລັດຖະທູດພ້ອມດ້ວຍຄະນະໄດ້ຮັບຟັງ. ຫຼັງຈາກນັ້ນທັງສອງຝ່າຍ ກໍ່ໄດ້ແລກປ່ຽນບົດຮຽນໃນຫຼາຍວຽກງານສຳຄັນ ເປັນຕົ້ນແມ່ນວຽກງານການພັດທະນາດ້ານກະສິກຳ, ບັນດາທ່າແຮງອັນພົ້ນເດັ່ນຂອງແຂວງ ແລະ ອື່ນໆ ທັງນີ້ກໍ່ເປັນການສໍາຫຼວດ ແລະ ຊອກຫາຂໍ້ມູນຕົວຈິງ ເພຶ່ອຈະໄດ້ນຳໄປໃຊ້ເຂົ້າໃນການພັດທະນາວຽກງານໃນດ້ານຕ່າງໆ ຢູ່ສາທາລະນະລັດ ປະຊາທິປະໄຕ ປະຊາຊົນລາວ ເວົ້າລວມ, ເວົ້າສະເພາະກໍ່ຄືແຂວງບໍລິຄໍາໄຊ ໃຫ້ມີການເຕີບໃຫ່ຍຂະຫຍາຍຕົວຢ່າງຕໍ່ເນື່ອງ ແລະ ມີບາດກ້າວຂະຫຍາຍຕົວທຽບເທົ່າກັບລະດັບສາກົນ.