ເນື່ອງໃນໂອກາດທີ່ທ່ານ ປອ ກິແກ້ວ ຈັນທະບູລີ ຮອງລັດຖະມົນຕີກະຊວງແຜນການ ແລະ ການລົງທຶນ ມາຮ່ວມພິທີມອບ-ຮັບໂຮງໝໍແຂວງບໍລິຄຳໄຊ ໃນຕອນເຊົ້າວັນທີ 10 ກໍລະກົດ 2018 ແລະ ໃນຕອນບ່າຍຂອງວັນດຽວກັນ ທ່ານ  ໄດ້ລົງຢ້ຽມຢາມພະແນກແຜນການ ແລະ ການລົງທຶນແຂວງບໍລິຄຳໄຊ ເປັນກຽດຕ້ອນຮັບໂດຍທ່ານ ເລື່ອນວິໄລ ຈັນທະລາພັນ ຫົວໜ້າພະແນກແຜນການ ແລະ ການລົງທຶນແຂວງ ພ້ອມດ້ວຍພະນັກງານວິຊາການພາຍໃນພະແນກ, ເມືອງ  ແລະ ຂະແໜງການທີ່ກ່ຽວຂ້ອງເຂົ້າຮ່ວມ.

    ການມາຢ້ຽມຢາມຄັ້ງນີ້ ທ່ານຮອງລັດຖະມົນຕີ ໄດ້ຮັບຟັງການລາຍງານສະພາບລວມ ແລະ ການເຄື່ອນໄຫວວຽກງານຂອງແຂວງ ແລະ ພະແນກໂດຍຫຍໍ້ ຈາກທ່ານ ເລື່ອນວິໄລ ຈັນທະລາພັນ ໂດຍທ່ານໄດ້ຍົກໃຫ້ເຫັນວ່າ ໃນໄລຍະທີ່ຜ່ານມາ ໄດ້ສຸມໃສ່ວຽກງານການເມືອງ-ແນວຄິດ ໃຫ້ພະນັກງານ, ມີແນວຄິດອ่ຸນອຽນທຸ່ນທ່ຽງ, ມີຄວາມສາມັກຄີພາຍໃນ, ຍົກສູງນ້ຳໃຈຮັບຜິດຊອບຕໍ່ໜ້າທີ່ວຽກງານ, ມີຈັນຍາບັນ ແລະ ຈັນຍາທຳໃນການປະຕິບັດໜ້າທີ່, ຍົກສຸງດ້ານການພັດທະນາບຸກຄະລາກອນ, ວຽກງານວິຊາສະເພາະ, ດ້ານການເກັບລາຍຮັບ ປະຕິບັດໄດ້ 220,94 ຕື້ກີບ, ໃນນັ້ນພູດສູນກາງ 174,23 ຕື້ກີບ, ລາຍຮັບພາສີ 174,06 ຕື້ກີບ, ລາຍຮັບຄ່າທຳນຽມວີຊາ 0,16 ຕື້ກີບ, ພູດຂອງແຂວງ ປະຕິບັດໄດ້ 46,71 ຕື້ກີບ, ຮັບຈາກສ່ວຍສາອາກອນ 44,09 ຕື້ກີບ, ຈາກຊັບສິນ 2,61 ຕື້ກີບ, ດ້ານການລົງທຶນຂອງລັດປີ 2018 ມີທັງໝົດ 300 ໂຄງການ ມູນຄ່າ 93.851,32 ລ້ານກີບ ໃນນັ້ນ ທຶນພາຍໃນ 85.851,32 ລ້ານກີບ, ທຶນຊ່ວຍເຫຼືອຂອງຕ່າງປະເທດ 8.119,35 ລ້ານກີບ, ໃນໄລຍະ 6 ເດືອນຜ່ານມາ ສາມາດປະຕິບັດການຊຳລະການລົງທຶນຂອງລັດໄດ້ 143 ໂຄງການ ມູນຄ່າ 63,94 ຕື້ກີບ, ອອກອະນຸຍາດໃຫ້ນັກລົງທຶນພາຍໃນ ແລະ ຕ່າງປະເທດເຂົ້າມາລົງທຶນໃນກິດຈະການຕ່າງໆ ຈຳນວນ 32 ໂຄງການ ມູນຄ່າ 321.785 ຕື້ກີບ, ໄດ້ຮັບທຶນຊ່ວຍເຫຼືອລ້າຈາກຕ່າງປະທດ 24 ໂຄງການ ມູນຄ່າ 15.254.759 ໂດລາສະຫະລັດ.

     ໂອກາດນີ້ ທ່ານຮອງລັດຖະມົນຕີ ຍັງໄດ້ສະແດງຄວາມຍ້ອງຍໍຊົມເຊີຍຕໍ່ບັນດາຜົນງານ ແລະ ຜົນສຳເລັດທີ່ຍາດມາໄດ້ ພ້ອມດຽວກັນນີ້ ທ່ານຍັງໄດ້ຮຽກຮ້ອງໃຫ້ພະນັກງານວິຊາການສະເພາະດ້ານ ຈົ່ງໄດ້ມີຄວາມຮັບຜິດຊອບສູງຕໍ່ໜ້າທີ່ວຽກງານຂອງຕົນຮັບຜິດຊອບ, ບັນດາຄະນະພະແນກ ຕ້ອງເພີ່ມທະວີຄວາມເປັນແບບຢ່າງດ້ານຄວາມສາມັກຄີ, ຊີ້ນຳ - ນຳພາແນວຄິດການເມືອງໃຫ້ພະນັກງານ, ແບບແຜນວິທີເຮັດວຽກຕ້ອງຈະແຈ້ງ ແລະ ບັນດາຂະແໜງການທີ່ກ່ຽວຂ້ອງກັບພະແນກ ຕ້ອງເປັນເຈົ້າການໃນການປະຕິບັດໜ້າທີ່ວຽກງານ ໂດຍສະເພາະວຽກງານການລົງທຶນຕ້ອງໄດ້ເອົາໃຈໃສ່ໃຫ້ທ່ວງທັນກັບເວລາທີ່ກຳນົດ, ພະນັກງານ-ສະມາຊິກພັກຕ້ອງກຳແໜ້ນມະຕິ-ຄຳສັ່ງ, ລະບຽບກົດໝາຍ ທີ່ກ່ຽວຂ້ອງກັບວຽກງານວິຊາສະເພາະຂອງຕົນໃຫ້ເລີກເຊິ່ງເຖີງຖອງ, ປັບປຸງກົນໄກ ແລະ ວິທີເຮັດວຽກຂອງຂະແໜງລົງທຶນພາຍໃນ ແລະ ຕ່າງປະເທດ ໃຫ້ນັບມື້ນັບດີຂຶ້ນເປັນກ້າວໆ.