ໃນວັນທີ 9 ກໍລະກົດ 2018  ສະພາປະຊາຊົນແຂວງກັບອົງການປົກຄອງແຂວງບໍລິຄຳໄຊ ໄດ້ເປີດກອງປະຊຸມຮ່ວມກັນ ເພື່ອຄົ້ນຄວ້າປຶກສາຫາລື, ກະກຽມໃຫ້ແກ່ການດຳເນີນກອງປະຊຸມສະໄໝສາມັນເທື່ອທີ 5 ຂອງສະພາປະຊາຊົນແຂວງ ຊຸດທີ I ພາຍໃຕ້ການເປັນປະທານຮ່ວມຂອງ ທ່ານ ປອ ສຸວັນນີ ໄຊຊະນະ ປະທານສະພາປະຊາຊົນແຂວງ, ທ່ານ ບຸນເສັງ ປະທຳມະວົງ ຮອງເຈົ້າແຂວງບໍລິຄຳໄຊ ມີບັນດາທ່ານຄະນະປະຈຳສະພາປະຊາຊົນແຂວງ, ຄະນະກຳມະການ, ຄະນະເລຂາທິການ, ຫົວໜ້າພະແນກການ, ອົງການອ້ອມຂ້າງແຂວງ ຕະຫຼອດຮອດພະນັກງານທີ່ກ່ຽວຂ້ອງເຂົ້າຮ່ວມ.

      ກອງປະຊຸມຄັ້ງນີ້ກໍ່ເພື່ອກະກຽມເນື້ອໃນທີ່ຈະລາຍງານ ແລະ ພິຈາລະນາໃນກອງປະຊຸມສະໄໝສາມັນເທື່ອທີ 5 ຂອງສະພາປະຊາຊົນແຂວງ ຊຸດທີ I ໃຫ້ຖືກຕ້ອງ,​ ສອດຄ່ອງກັບລັດຖະທຳມະນູນ ແລະ ກົດໝາຍ ທັງເປັນການຮັບປະກັນທາງດ້ານຮູບແບບ, ວິທີການ, ຂັ້ນຕອນການດຳເນີນ, ການກະກຽມວຽກງານທາງດ້ານບໍລິຫານ-ພິທີການ ແລະ ວຽກງານອື່ນໆທີ່ກ່ຽວຂ້ອງ ໃຫ້ແກ່ການຮັບໃຊ້ກອງປະຊຸມສະໄໝສາມັນເທື່ອທີ 5 ໃຫ້ຄົບຖ້ວນຕາມພາລະບົດບາດ, ສິດ ແລະ ໜ້າທີ່ຂອງແຕ່ລະອານຸກຳມະການ. ເຊິ່ງໃນກອງປະຊຸມດັ່ງກ່າວ, ແມ່ນຈະໄດ້ພິຈາລະນາຮັບຮອງເອົາບົດລາຍງານການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ ແລະ ແຜນງົບປະມານປະຈຳ 6 ເດືອນຕົ້ນປີ ແລະ ທິດທາງແຜນການ ປະຈຳ 6 ເດືອນທ້າຍປີ 2018, ພິຈາລະນາຮັບຮອງເອົາບົດລາຍງານຂອງຄະນະປະຈຳສະພາປະຊາຊົນແຂວງ ກ່ຽວກັບການຈັດຕັ້ງປະຕິບັດແຜນການເຄື່ອນໄຫວວຽກງານແຕ່ກອງປະຊຸມສະໄໝສາມັນເທື່ອທີ 4 ຫາເທື່ອທີ 5 ແລະ ທິດທາງແຜນການແຕ່ກອງປະຊຸມສະໄໝສາມັນເທື່ອທີ 5 ຫາເທື່ອທີ 6 ຂອງສະພາປະຊາຊົນແຂວງ, ຮັບຟັງບົດລາຍງານຂອງຫົວໜ້າອົງການໄອຍະການປະຊາຊົນແຂວງ ແລະ ປະທານສານປະຊາຊົນແຂວງ ກ່ຽວກັບການຈັດຕັ້ງປະຕິບັດວຽກງານທີ່ພົ້ນເດັ່ນ ຕາມການສະເໜີຂອງຄະນະປະຈຳສະພາປະຊາຊົນແຂວງ, ຮັບຟັງການລາຍງານບັນຫາໃດໜຶ່ງທີ່ພົ້ນເດັ່ນ ຈາກຫົວໜ້າພະແນກການທີ່ກ່ຽວຂ້ອງ ຕາມການສະເໜີຂອງຄະນະປະຈຳສະພາປະຊາຊົນແຂວງ ແລະ ພິຈາລະນາຮັບຮອງເອົາການສ້າງ ແລະ ປັບປຸງບັນດານິຕິກຳ ຈຳນວນ 2 ສະບັບ  ພ້ອມດຽວກັນນີ້, ປະທານສະພາປະຊາຊົນແຂວງ ຍັງໄດ້ຊີ້ນຳໃຫ້ບັນດາພະແນກການຈົ່ງພ້ອມກັນເອົາໃຈໃສ່ກະກຽມບັນດາເນື້ອໃນຕ່າງໆ ທີ່ຕົນຮັບຜິດຊອບ ແລະ ໃຫ້ທັນກັບເວລາ ເຊິ່ງຄາດວ່າຈະໄດ້ເປີດກອງປະຊຸມສະໄໝສາມັນເທື່ອທີ 5 ຂອງສະພາປະຊາຊົນແຂວງ ຊຸດທີ I ໃນຕົ້ນເດືອນສິງຫາ 2018 ທີ່ຈະມາເຖິງນີ້.