ເພື່ອປັບປຸງຍົກລະດັບຄຸນນະພາບຂອງການບໍລິການໃຫ້ດີຂື້ນເທື່ອລະກ້າວ ຕາມແຜນປະຕິຮູບສາທາລະນະສຸກ ໄລຍະທີ II (2016-2020) ພິທີມອບ-ຮັບໂຮງໝໍແຂວງບໍລິຄຳໄຊຫຼັງໃໝ່ ໄດ້ຈັດຂື້ນໃນວັນທີ 10 ກໍລະກົດ 2018 ຢູ່ທີ່ບ້ານປາກຊັນ ເມືອງປາກຊັນ ໂດຍການໃຫ້ກຽດເຂົ້າຮ່ວມຂອງ ທ່ານ ຮສ ດຣ ບຸນກອງ ສີຫາວົງ ລັດຖະມົນຕີກະຊວງສາທາລະນະສຸກ, ທ່ານ ໂກລດ ເຈນແກນ ອຸປະທູດປະຈຳສະຖານທູດລຸກຊຳບວກປະຈຳລາວ, ທ່ານ ປອ ກອງແກ້ວ ໄຊສົງຄາມ ເຈົ້າແຂວງບໍລິຄຳໄຊ, ມີຜູ້ຕາງໜ້າອົງການ LUX-Development, ບັນດາແຂກທີ່ມາຈາກສູນກາງ, ແຂວງ ແລະ ເມືອງ ພ້ອມດ້ວຍພະນັກງານແພດໝໍພາຍໃນໂຮງໝໍແຂວງເຂົ້າຮ່ວມ.

    ໂຮງໝໍແຂວງບໍລິຄໍາໄຊ ແມ່ນໄດ້ເລີ່ມລົງມືກໍ່ສ້າງແຕ່ເດືອນ 8 ປີ 2015  ໂດຍການຊ່ວຍເຫຼືອລ້າຈາກລັດຖະບານລຸກຊໍາບວກ ໃນມູນຄ່າ 2,965,000 ໂດລາສະຫະລັດ ປະກອບມີ: ຕຶກກວດເຂດນອກ, ຕຶກແມ່ ແລະ ເດັກ, ແຂ້ວ ຫູ ດັງ ຄໍ, ການຢາ, ຫ້ອງວິເຄາະ, ຫ້ອງສ່ອງໄຟ, ຫ້ອງນອນຄົນເຈັບພະຍາດຍິງ ແລະ ເດັກນ້ອຍ, ຫ້ອງເກີດລູກ, ຫ້ອງຜ່າຕັດ, ຫ້ອງນອນຄົນເຈັບເຂດນອກ, ຕຶກສະໜອງທາງດ້ານວິຊາການ, ລະບົບບໍາບັດນໍ້າເສຍ, ຫ້ອງບໍາລຸງຮັກສາດ້ານວິຊາການ, ລະບົບອົກຊີເຈນການແພດ, ເດີ່ນຈອດລົດ ແລະ ສວນດອກໄມ້. ນອກນີ້ໂຄງການຍັງໄດ້ສະໜອງ ແລະ ຕິດຕັ້ງອຸປະກອນເຄື່ອງມືການແພດທີ່ທັນສະໄໝເຊັ່ນ: ເຄື່ອງເຟີນິເຈີຊຶ່ງມີມູນຄ່າທັງໝົດ 980,000 ໂດລາສະຫາລັດ ລວມມູນຄ່າທັງໝົດ 3.945.000 ໂດລາສະຫາລັດ. ປະຈຸບັນຖືວ່າສຳເລັດສົມບູນແລ້ວ ໂດຍໂຮງໝໍແຫ່ງນີ້ມີທັງໝົດ 140 ຕຽງ, ຈະຮັບໃຊ້ປະຊາກອນປະມານ 285.000 ຄົນ ແລະ ເປັນບ່ອນຮອງຮັບຄົນເຈັບທີ່ສົ່ງມາຈາກ 7 ຕົວເມືອງ ແລະ 40 ສຸກສາລາ ທົ່ວແຂວງບໍລິຄຳໄຊ. ພິທີໃນຄັ້ງນີ້ຍັງໄດ້ມີພິທີມອບຫຼຽນໄຊແຮງງານຊັ້ນ I ໃຫ້ແກ່ທ່ານ ໂກລດ ເຈນແກນ, ຫຼຽນໄຊແຮງງານຊັ້ນ III ໃຫ້ແກ່ ທ່ານ ຮສ ດຣ ບຸນກອງ ສີຫາວົງ ແລະ ທ່ານ ປີເຕີ ໄຮມັນ ຫົວໜ້າໂຄງການລາວ-ລຸກຊຳບວກ 027 ໃຫ້ກຽດມອບໂດຍ ທ່ານ ປອ ກອງແກ້ວ ໄຊສົງຄາມ, ພ້ອມນີ້ຍັງໄດ້ມອບໃບຍ້ອງຍໍລັດຖະບານ ແລະ ໃບຍ້ອງຍໍຂັ້ນແຂວງ ໃຫ້ແກ່ບຸກຄົນ ແລະ ກົມກອງຈຳນວນໜຶ່ງ ທີ່ມີຜົນງານ, ຄຸນງາມຄວາມດີ ປະກອບສ່ວນຊ່ວຍເຫຼືອທຶນຮອນ ເຂົ້າໃນການກໍ່ສ້າງໂຮງໝໍ ແລະ ອຸປະກອນການແພດ ຢູ່ແຂວງບໍລິຄຳໄຊ. ຫຼັງຈາກນັ້ນກໍ່ໄດ້ມີພິທີຕັດແຖບຜ້າເພື່ອເປີດໂຮງໝໍແຂວງບໍລິຄຳໄຊຫຼັງໃໝ່ຢ່າງເປັນທາງການ.

    ໃນຕອນບ່າຍຂອງວັນດຽວກັນແຂວງບໍລິຄຳໄຊຍັງໄດ້ຈັດພິທີບາສີສູ່ຂັວນ ໃຫ້ແກ່ທ່ານອຸປະທູດ ແຫ່ງລາຊະອານາຈັກລຸກຊຳບວກ, ອົງການ LUX-Development ແລະ ຄະນະການນຳທີ່ມາຈາກສູນກາງ ຢູ່ທີ່ໂຮງແຮມດອກຈຳປາ ເພື່ອເປັນການສະແດງເຖິງຮີດຄອງປະເພນີອັນດີງາມຂອງຊາດ ພ້ອມຍັງທັງເປັນການສະແດງຄວາມຂອບໃຈ ແລະ ຮູ້ບຸນຄຸນໃນການຊ່ວຍເຫຼືອແຂວງບໍລິຄຳໄຊ ກໍ່ຄື ສປປ ລາວ, ພິທີບາສີໄດ້ດຳເນີນໄປດ້ວຍບັນຍາກາດແຫ່ງໄມຕີຈິດມິດຕະພາບ ຕ່າງຝ່າຍຕ່າງອວຍພອນເຊີ່ງກັນແລະກັນ.