ໃນວັນທີ 6 ກໍລະກົດ 2018 ໄດ້ຈັດກອງປະຊຸມຄະນະອະນຸກຳມະການກະກຽມກອງປະຊຸມຮ່ວມມືຮັກສາຄວາມສະຫງົບຮຽບຮ້ອຍຕາມຊາຍແດນລາວ-ໄທ ລະຫວ່າງ ແຂວງບໍລິຄຳໄຊ - ຈັງຫວັດໜອງຄາຍ ຄັ້ງທີ 12 ທີ່ຈັງຫວັດໜອງຄາຍເປັນເຈົ້າພາບ ຂື້ນທີ່ໂຮງແຮມໜອງຄາຍທາວີນລາ ອຳເພີໜອງຄາຍ ຈັງຫວັດໜອງຄາຍ ຝ່າຍແຂວງບໍຄຳໄຊນຳໂດຍທ່ານ ແສງເພັດ ມູນລະໄມ ຮອງຫົວໜ້າຫ້ອງວ່າການແຂວງ ພ້ອມດ້ວຍຕາງໜ້າພາກສ່ວນທີ່ກ່ຽວຂ້ອງລວມ 15 ທ່ານ, ຝ່າຍຈັງຫວັດໜອງຄາຍນຳໂດຍທ່ານ ສົມຫວັງອາລີເອື້ອ ອຳນວຍການກຸ່ມງານຍຸດທະສາດ ແລະ ຂໍ້ມູນເພື່ອການພັດທະນາຈັງຫວັດ.

    ກອງປະຊຸມວິຊາການທັງສອງຝ່າຍ ໄດ້ຜ່ານຮ່າງບົດບັນທຶກກອງປະຊຸມຄະນະກຳມະການຮ່ວມມືຮັກສາຄວາມສະຫງົບຮຽບຮ້ອຍຕາມຊາຍແດນລາວ - ໄທ ລະຫວ່າງ ແຂວງບໍລິຄຳໄຊ - ຈັງຫວັດໜອງຄາຍ ຄັ້ງທີ 12 ໂດຍພັດປ່ຽນກັນຜ່ານແຕ່ລະຂໍ້ຕາມລຳດັບລວມມີ 12 ຂໍ້ ພ້ອມທັງໄດ້ປະກອບຄຳຄິດຄຳເຫັນປັບປຸງບາງເນື້ອໃນບົດບັນທຶກກອງປະຊຸມຄັ້ງຜ່ານມາ ແລະ ນຳສະເໜີເນື້ອໃນເພີ່ມຕື່ມຈຳນວນໜຶ່ງ ເພື່ອເປັນບ່ອນອີງທີ່ສຳຄັນໃຫ້ແກ່ການເຄື່ອນໄຫວຮັກສາຄວາມສະຫງົບຮຽບຮ້ອຍຕາມຊາຍແດນ ເປັນຕົ້ນແມ່ນ ການອຳນວຍຄວາມສະດວກຄວາມປອດໄພໃນການເຂົ້າ-ອອກເມືອງ, ການຮ່ວມມືໃນການປ້ອງກັນ-ປາບປາມຢາເສບຕິດ, ການຕໍ່ຕ້ານການຄ້າມະນຸດ, ການຮ່ວມມືຄຸ້ມຄອງການດຳເນີນກິດຈະການຕ່າງໆຕາມລຳນ້ຳຂອງ, ການແລກປ່ຽນວັດທະນະທຳປະເພນີ, ການສົ່ງເສີມຮ່ວມມືດ້ານແຮງງານ ແລະ ວຽກງານດ້ານຕ່າງໆລະຫວ່າງແຂວງບໍລິຄຳໄຊ-ຈັງຫວັດໜອງຄາຍໂດຍສະເພາະເຂດຊາຍແດນເມືອງທ່າພະບາດ ແລະ ອຳເພີລັດຕະວາປີໃຫ້ມີປະສິດທິຜົນເພີ່ມຂຶ້ນ.

   ກອງປະຊຸມຄະນະກຳມະການຮ່ວມມືຮັກສາຄວາມສະຫງົບຮຽບຮ້ອຍຕາມຊາຍແດນລາວ-ໄທ ລະຫວ່າງ ແຂວງບໍລິຄຳໄຊ - ຈັງຫວັດໜອງຄາຍຄັ້ງທີ 12 ທີ່ຈັງຫວັດໜອງຄາຍເປັນເຈົ້າພາບ ຄາດວ່າຈະຈັດຂຶ້ນໃນກາງເດືອນ ສິງຫາ 2018 ນີ້.