ໃນວັນທີ 6 ກໍລະກົດ 2018 ຢູ່ທີ່ຫ້ອງປະຊຸມຊັ້ນ III ຫ້ອງວ່າການປົກຄອງເມືອງວຽງທອງ ແຂວງບໍລິຄຳໄຊ ໄດ້ມີພິທີປະກາດອະນຸມັດໃຫ້ພະນັກງານ-ລັດຖະກອນອອກພັກຮັບອຸດໜຸນບຳນານ ແລະ ປະກາດສັບປ່ຽນບ່ອນປະຈຳການໃໝ່ຂອງພະນັກງານ ໂດຍເປັນກຽດເຂົ້າຮ່ວມຂອງທ່ານ ວົງສີ ທອງສີອິດທິປັນຍາ ກຳມະການພັກແຂວງ, ເລຂາພັກເມືອງ - ເຈົ້າເມືອງ ວຽງທອງ, ມີຄະນະປະຈຳພັກເມືອງ, ຫົວໜ້າ, ຮອງຫົວໜ້າຫ້ອງການ, ສະມາຊິກພັກ ແລະ ພະນັກງານຫ້ອງການທີ່ກ່ຽວຂ້ອງເຂົ້າຮ່ວມ.

      ໃນພິທີ ທ່ານ ທອງລິດ ສິດທິອໍາພາ ກໍາມະການພັກເມືອງ ຫົວໜ້າຄະນະຈັດຕັ້ງເມືອງ ໄດ້ໃຫ້ກຽດຂື້ນຜ່ານ ຂໍ້ຕົກລົງ ກະຊວງຊັບພະຍາກອນທຳມະຊາດ ແລະ ສີ່ງແວດລ້ອມ ເລກທີ 1253/ກຊສ ລົງວັນທີ 27 ມີນາ 2018  ວ່າດ້ວຍການອະນຸມັດໃຫ້ພະນັກງານ-ລັດຖະກອນອອກພັກການຮັບອຸດໜຸນບໍານານ ເຊີ່ງໄດ້ອະນຸມັດໃຫ້ ທ່ານ ມະນີວອນ ສີພະໃຊ ຮອງຫົວໜ້າຊັບພະຍາກອນທຳມະຊາດ ແລະ ສີ່ງແວດລ້ອມອອກພັກການຮັບອຸດໜຸນບຳນານ, ຜ່ານຂໍ້ຕົກລົງ ເຈົ້າເມືອງ ວຽງທອງ ເລກທີ 366/ຈມວທ ວ່າດ້ວຍ ການແຕ່ງຕັ້ງຜູ້ວ່າການຫົວໜ້າຫ້ອງການຊັບພະຍາກອນ-ທຳມະຊາດ ແລະ ສີ່ງແວດລ້ອມເມືອງ ເຊີ່ງໄດ້ແຕ່ງຕັ້ງ ທ່ານ ຄຳພຸດ ຈະເລີນຈິດ ຮອງຫົວໜ້າຫ້ອງການໂຍທາທິການ ແລະ ຂົນສົ່ງເມືອງໄປຮັບໜ້າທີໃໝ່ເປັນຜູ້ວ່າການຫົວໜ້າຫ້ອງການຊັບພະຍາກອນ-ທຳມະຊາດ ແລະ ສີ່ງແວດລ້ອມເມືອງ ແລະ ຜ່ານຂໍ້ຕົກລົງ ຂອງເຈົ້າເມືອງ ວຽງທອງ ເລກທີ 378/ຈມວທ ວ່າດ້ວຍແຕ່ງຕັ້ງຮອງຫົວໜ້າຫ້ອງການໂຍທາທິການ ແລະ ຂົນສົ່ງເມືອງເຊີ່ງໄດ້ແຕ່ງຕັ້ງທ່ານ ກອງແກ້ວ ທຳມະວົງ ຫົວໜ້າໜ່ວຍງານຄຸ້ມຄອງທາງບົກ, ທາງນ້ຳ ແລະ ເຄຫາຜັງເມືອງຫ້ອງການໂຍທາທິການ ແລະ ຂົນສົ່ງເມືອງ ຂື້ນເປັນຮອງຫົວໜ້າຫ້ອງການໂຍທາທິການ ແລະ ຂົນສົ່ງເມືອງ ວຽງທອງ.

   ຕອນທ້າຍພິທີ ຍັງໄດ້ຮັບຟັງການໂອ້ລົມໃຫ້ທິດຊີ້ນຳຈາກທ່ານເຈົ້າເມືອງ ໂດຍທ່ານ ໄດ້ຂອບໃຈແກ່ຜູ້ອອກພັກການຮັບອຸດໜຸນບຳນານ ທີ່ໄດ້ອຸທິດເຫື່ອແຮງ ແລະ ສະຕິປັນຍາຮັບໃຊ້ຊາດ - ຮັບໃຊ້ປະຊາຊົນ ຈົນສຸດກົກສຸດປາຍ ແລະ ຊີ້ທິດເຍືອງທາງ ແກ່ຜູ້ທີ່ຖືກແຕ່ງຕັ້ງໃໝ່ ຕ້ອງໄດ້ສືບຕໍ່ເອົາໃຈໃສ່ຕໍ່ໜ້າທີວຽກງານທີ່ພັກ-ລັດຂັ້ນເທີງມອບໝາຍໃຫ້ ກ່ອນອື່ນຕ້ອງໄດ້ສືກສາອົບການເມືອງ ແນວຄິດໃຫ້ພະນັກງານຂອງຕົນ, ເຕົ້າໂຮມຄວາມສາມັກຄີອ້າຍນ້ອງ ແລະ ການວາງແຜນວຽກ ໃຫ້ມີຄວາມຄ່ອງຕົວ ໂດຍຢຶດຖືວິທີນຳພາເປັນໝູ່ຄະນະໃຫ້ມີປະສິດທິຜົນສູງໃນຕໍ່ໜ້າ.