ໃນວັນທີ 5 ກໍລະກົດ 2018 ຢູ່ສະໂມສອນຂອງເມືອງບໍລິຄັນ ໄດ້ຈັດກອງປະຊຸມເຊື່ອມຊຶມມະຕິຂອງຄະນະບໍລິຫານງານສູນກາງພັກປະຊາຊົນປະຕິບັດລາວ ວ່າດ້ວຍການຍົກສູງປະສິດທີພາບ ຄຸ້ມຄອງລັດ ຄູ້ມຄອງສັງຄົມດ້ວຍກົດໝາຍ ໃຫ້ພະນັກງານຫຼັກແຫຼ່ງທົ່ວເມືອງຂື້ນ ໃຫ້ກຽດເປັນປະທານເຊື່ອມຊຶມຂອງທ່ານ ບຸນສອນ ຄູນໄຊລິດາ ເຈົ້າເມືອງບໍລິຄັນ, ມີບັນດາຄະນະປະຈໍາພັກເມືອງ, ກໍາມະການພັກເມືອງ, ຫົວໜ້າຫ້ອງການ, ຮອງຫ້ອງການຂົງເຂດປກສ, ປກຊ ອ້ອມຂາງເມືອງເຂົ້າຮ່ວມ.

ທ່ານ ບຸນສອນ ຄູນໄຊລິດາ ເຈົ້າເມືອງໄດ້ຍົກໃຫ້ເຫັນການຄຸ້ມຄອງລັດ ຄຸ້ມຄອງສັງຄົມດ້ວຍກົດໝາຍເປັນພື້ນຖານຂອງການສ້າງລັດທີ່ປົກຄອງດ້ວຍກົດໝາຍເຊີ່ງແມ່ນຂະບວນວີວັດໜື່ງຂອງການບູລະນະລະບອບປະຊາທິປະໄຕປະຊາຊົນ ທີ່ຕ້ອງດໍາເນີນເປັນແຕ່ລະບາດກ້າວຢ່າງຮອບຄອບ ແລະ ໜັກແໜ້ນສູ່ຈຸດໝາຍສັງຄົມນິຍົມ ນັບແຕ່ໄດ້ດໍາເນີນແນວທາງນະໂຍບາຍປ່ຽນແປງໃໝ່ຮອບດ້ານພັກເຮົາໄດ້ນໍາພາສ້າງ ນໍາໃຊ້ ແລະ ປັບປຸງລັດທະທໍາມະນູນກົດໝາຍນິຕິກໍາໃຕ້ກົດໝາຍ ໃຫ້ເປັນເຄື່ອງມືຄຸ້ມຄອງລັດຄຸ້ມ-ຄອງສັງຄົມປົກປ້ອງສີດແລະຜົນປະໂຫຍດອັນຊອບທໍາຂອງປະຊາຊົນບັນດາເຜົ່າຂອງລັດລວມໝູ່ ຮັບປະກັນການປົກປັກຮັກສາລະບອບປະຊາທິປະໄຕປະຊາຊົນ ທີ່ປົກຄອງດ້ວຍກົດໝາຍຕາມ ທິດສັງຄົມນິຍົມ ປະຈຸບັນພັກເຮົາຈື່ງໄດ້ນໍາພາຜັນຂະຫຍາຍແນວທາງການປ່ຽນແປງໃໝ່ຢ່າງຮອບດ້ານແລະ ມີຫຼັກການເພີ່ມທະວີສືກສາອົບຮົມສະຕິເຄົາລົບປະຕິບັດກົດໝາຍທົ່ວສັງຄົມອົງການອໍານາດລັດຂັ້ນຕ່າງໆໄດ້ຮັບການປັບປຸງດ້ານບົດບາດ ສິດ-ໜ້າທີ່ໂຄງປະກອບກົງຈັກການຈັດຕັ້ງໃຫ້ສອດຄ່ອງຕາມລັດທະທໍາມະນູນ ແລະ ກົດໝາຍພະນັກງານລັດທະກອນ ຕະຫຼອດຮອດນັກກົດໝາຍໄດ້ຮັບການເພີ່ມຂື້ນທາງດ້ານປະລິມານ ແລະ ຄຸນນະພາບໃຫ້ສູງຂື້ນເພື່ອເປັນການບູລະນະພັດທະນາປະເທດຊາດໃຫ້ມີຄວາມເຂັ້ມແຂງຂື້ນເປັນກ້າວໆ.