ເພື່ອເປັນການປະຕິບັດຕາມນະໂຍບາຍຂອງພັກ-ລັດ ທີ່ມີຕໍ່ພະນັກງານ-ນັກຮົບໃນກໍາລັງປ້ອງກັນຄວາມສະຫງົບປະຊາຊົນລາວ ກໍ່ຄືກໍາລັງ ປກສ  ແຂວງ ບໍລິຄໍາໄຊ ທີ່ໄດ້ເສຍຊີວິດ ແລະ ອອກສ້າງເສດຖະກິດຄອບຄົວ ໄດ້ຮັບນະໂຍບາຍຈາກຂັ້ນເທິງຢ່າງເໝາະສົມກັບສະພາບຕົວຈິງ,  ໃນວັນທີ 04 ກໍລະກົດ 2018 ນີ້ ກອງບັນຊາການ ປກສ ແຂວງ ບໍລິຄຳໄຊ ໄດ້ຈັດພິທີມອບເງິນອຸດໜຸນໃຫ້ແກ່ຄອບຄົວພະນັກງານຜູ້ເສຍຊີວິດ ແລະ ຜູ້ທີອອກສ້າງເສດຖະກິດຄອບຄົວ ໂດຍເປັນກຽດເຂົ້າຮ່ວມຂອງ ທ່ານ ພັນໂທ ບຸນມີໄຊ ຈັນທະວົງ ຮອງຫົວໜ້າຫ້ອງການເມືອງ ປກສ ແຂວງ, ມີ ທ່ານ ພັນໂທ ຄຳແພງ ໄຊທາວົງ ຫົວໜ້າພະແນກ ນະໂຍບາຍ-ປະກັນສັງຄົມ, ພ້ອມດ້ວຍການຈັດຕັ້ງ, ພະນັກງານທີ່ກ່ຽວຂ້ອງ, ຄອບຄົວຜູ້ເສຍຊີວິດ ແລະ ຄອບຄົວຜູ້ອອກສ້າງເສດຖະກິດຄອບຄົວເຂົ້າຮ່ວມ ຈໍານວນ 04 ຄອບຄົວ.

          ທ່ານ ພັນໂທ ບຸນມີໄຊ ຈັນທະວົງ ຮອງຫົວໜ້າຫ້ອງການເມືອງ, ໄດ້ຜ່ານຂໍ້ຕົກລົງຂອງກອງບັນຊາການ ປກສ ແຂວງ ບໍລິຄໍາໄຊ ສະບັບເລກທີ່ 3188/ປກສ.ຂ ແລະ ຂໍ້ຕົກລົງ ສະບັບເລກທີ່ 3179/ປກສ.ຂ ລົງວັນທີ 06 ມີຖຸນາ 2018 ວ່າດ້ວຍການປະຕິບັດນະໂຍບາຍເງິນອຸດໝູນໃຫ້ແກ່ພະນັກງານ-ນັກຮົບຜູ້ເສຍຊີວິດ ແລະ ອອກສ້າງເສດຖະກິດຄອບຄົວ ຈໍານວນ 04 ຄອບຄົວ ລວມເປັນເງິນທັງໝົດ 276.981.000 ກີບ, ເປັນກຽດມອບໂດຍ ທ່ານ ພັນໂທ ບຸນມີໄຊ ຈັນທະວົງ ຮອງຫົວໜ້າຫ້ອງການເມືອງ ປກສ ແຂວງ, ຕາງໜ້າຮັບໂດຍ ຄອບຄົວຂອງຜູ້ເສຍຊີວິດ ແລະ ຄອບຄົວຜູ້ອອກສ້າງເສດຖະກິດ.

    ທ່ານ ພັນໂທ ບຸນມີໄຊ ຈັນທະວົງ ກ່າວວ່າ: ການມອບເງິນອຸດໝູນ-ນະໂຍບາຍໃຫ້ຄອບຄົວຜູ້ເສຍຊີວິດ ແລະ ອອກສ້າງເສດຖະກິດຄອບຄົວ ໃຫ້ແກ່ພະນັກງານ-ນັກຮົບໃນກໍາລັງ ປກສ ແຂວງ ບໍລິຄໍາໄຊ ຄັ້ງນີ້ ແມ່ນ ເປັນການປະຕິບັດຕາມແນວທາງ-ນະໂຍບາຍຂອງພັກ-ລັດ ທີ່ເຫັນໄດ້ເຖິງຄຸນງາມຄວາມດີຂອງພະນັກງານ-ນັກຮົບຜູ້ທີ່ເສຍຊີວິດ ແລະ ອອກສ້າງເສດຖະກິດຄອບຄົວ ເຊິ່ງໄດ້ປະກອບສ່ວນເຫື່ອແຮງ ແລະ ສະຕິປັນຍາເຂົ້າໃນການປະຕິບັດໜ້າທີ່ວຽກງານພາຍໃນກົມກອງໃນໄລຍະຜ່ານມາ, ຫວັງຢ່າງຍີ່ງວ່າ ເງິນຈໍານວນດັ່ງກ່າວນີ້ ຈະຊ່ວຍແກ້ໄຂຄວາມຈໍາເປັນພາຍໃນຄອບຄົວໄດ້.