ພິທີເຜີຍແຜ່ມະຕິຂອງຄະນະບໍລິຫານສູນກາງພັກປະຊາຊົນປະຕິວັດລາວ ວ່າດ້ວຍການຍົກສູງປະສິດທິພາບຄຸ້ມຄອງລັດ ຄຸ້ມຄອງສັງຄົມດ້ວຍກົດໝາຍ ໄດ້ຈັດຂຶ້ນໃນຕອນເຊົ້າຂອງວັນທີ 06 ກໍລະກົດ 2018 ຢູ່ທີ່ສະໂມສອນໃຫຍ່ຂອງແຂວງບໍລິຄຳໄຊ ໃຫ້ກຽດເຜີຍແຜ່ໂດຍທ່ານ ປອ ສຸວັນນີ ໄຊຊະນະ ຮອງເລຂາພັກແຂວງ, ປະທານສະພາປະຊາຊົນແຂວງບໍລິຄຳໄຊ, ມີຫົວໜ້າ, ຮອງພະແນກ, ຫົວໜ້າ ແລະ ຮອງກອງບັນຊາການທະຫານແຂວງ, ປກສ ແຂວງ, ຫົວໜ້າຂະແໜງ, ຮອງຫົວໜ້າຂະແໜງຈາກພະແນກການອ້ອມຂ້າງແຂວງເຂົ້າຮ່ວມຮັບຟັງ.

          ເພື່ອການຄຸ້ມຄອງລັດ, ຄຸ້ມຄອງສັງຄົມດ້ວຍກົດໝາຍ ເປັນຂອງການສ້າງລັດທີ່ປົກຄອງດ້ວຍກົດໝາຍ ເຊິ່ງແມ່ນຂະບວນວິວັດໜຶ່ງຂອງການບູລະນະລະບອບປະຊາທິປະໄຕປະຊາຊົນ ທີ່ຕ້ອງດຳເນີນເປັນແຕ່ລະບາດກ້າວຢ່າງຮອບຄອບ ແລະ ໜັກແໜ້ນສູ່ຈຸດໝາຍສັງຄົມນິຍົມ, ໃນມະຕິນີ້ມີ 6 ທັດສະນະຄື: ຮັບປະກັນພັກນຳພາ ແລະ ກຳອຳນາດຕາມກົດໝາຍ, ຮັບປະກັນຄວາມໝັ້ນຄົງໃຫ້ແກ່ລັດປະຊາທິປະໄຕປະຊາຊົນທີ່ປົກຄອງດ້ວຍກົດໝາຍ, ເພີ່ມນິຕິກຳໃນການປົກຄອງ, ຮັບປະກັນຄວາມຍຸຕິທຳໃນສັງຄົມ, ຮັບປະກັນສິດເປັນເຈົ້າຂອງປະຊາຊົນຕາມກົດໝາຍ, ຮັບປະກັນລວມສູນເປັນເອກະພາບຂອງບັນດາອົງການອຳນາດລັດ ແລະ ວຽກທີ່ຕ້ອງສຸມໃສ່ນຳພາຄຸ້ມຄອງຈັດຕັ້ງປະຕິບັດມີ: ເອົາໃຈໃສ່ສ້າງ ແລະ ປັບປຸງກົດໝາຍ, ນິຕິກຳໃຊ້ກົດໝາຍ, ເພີ່ມທະວີການປະຕິບັດກົດໝາຍໃຫ້ມີປະສິດທິພາບ, ຍົກສູງປະສິດທິພາບການປະຕິບັດກົດໝາຍຂອງບັນດາອົງການອຳນາດລັດ, ຍົກສູງປະສິດທິພາບການກໍ່ສ້າງພະນັກງານກົດໝາຍ, ຍົກສູງປະສິດທິພາບການຕ້ານ, ສະກັດກັ້ນ ພະຍາດອາດຍາສິດ, ການສໍ້ລາດບັງຫຼວງ, ເສີມຂະຫຍາຍສິດເປັນເຈົ້າຂອງປະຊາຊົນໃນການຄຸ້ມຄອງລັດ, ຄຸ້ມຄອງສັງຄົມດ້ວຍກົດໝາຍ, ຫັນການຄຸ້ມລັດ ເປັນທັນສະໄໝເທື່ອລະກ້າວ, ເພີ່ມທະວີການພົວພັນຮ່ວມມືສາກົນ, ປັບປຸງແບບແຜນວິທີນຳພາຂອງຄະນະພັກຂັ້ນຕ່າງໆໃຫ້ສອດຄ່ອງກັບການຄຸ້ມຄອງລັດ, ຮັບປະກັນການປົກປັກຮັກສາລະບອບປະຊາທິປະໄຕປະຊາຊົນໄດ້ຢ່າງໝັ້ນຄົງ.