ກອງປະຊຸມໃຫຍ່ຄັ້ງທີ VII ຂອງບ້ານນ້ຳເດື່ອ ເມືອງປາກກະດິງ ແຂວງບໍລິຄຳໄຊ ໄດ້ຈັດຂື້ນໃນຕອນເຊົ້າວັນທີ 6 ມິຖຸນາ 2018 ນີ້ ຢູ່ທີ່ສະໂມສອນຂອງບ້ານ, ເປັນກຽດເຂົ້າຮ່ວມຂອງທ່ານ ໂຄສາຈານ ແສນທະວີໄຊ ຮອງເລຂາພັກເມືອງ ຮອງເຈົ້າເມືອງປາກກະດິງ, ມີແຂກຖືກເຊີນ, ຄະນະກຳມະການປັບປຸງກົງຈັກການຈັດຕັ້ງຂັ້ນເມືອງ, ອຳນາດການປົກຄອງ-ການຈັັດຕັ້ງ ແລະ ປະຊາຊົນພາຍໃນບ້ານເຂົ້າຮ່ວມ 4 ຮ້ອຍກ່ວາຄົນ.

      ກອງປະຊຸມ ໄດ້ຜ່ານບົດສະຫຼຸບຕີລາຄາຄືນການຊີ້ນຳ-ນຳພາວຽກງານຮອບດ້ານ ຂອງຄະນະບ້ານນ້ຳເດື່ອ ໄລຍະ 5 ປີຜ່ານມາ, ບ້ານນາເດື່ອມີ 578 ຄອບຄົວ, ມີ 2.743 ຄົນ, ຍິງ 1.413 ຄົນ, ມີ 31 ໜ່ວຍ, ປະກອບມີ 2 ເຜົ່າ ຄື: ເຜົ່າລາວລຸ່ມ  ແລະ  ເຜົ່າກືມມຸ, ອາຊີບຕົ້ນຕໍແມ່ນເຮັດນາ, ປູກຝັງ-ລ້ຽງສັດ ແລະ ຄ້າຂາຍເປັນສຳຮອງ, ມີເນື້ອທີ່ນາ 754 ເຮັກຕ່າ, ດິນສວນ 699 ເຮັກຕ່າ, ມີຄວາຍ 78 ໂຕ, ງົວ 169 ໂຕ, ແບ້ 58 ໂຕ, ໝູ 128 ໂຕ, ສັດປີກ 4.231 ໂຕ. ນອກນີ້ ຍັງມີຕະຫຼາດຊຸມຊົນ, ປ້ຳນ້ຳມັນ, ເຮືອນພັກ, ຮ້ານຂາຍເຄື່ອງຍ່ອຍ, ຮ້ານສ້ອມແປງລົດຈັກ-ລົດໃຫຍ່ ແລະ ພາຫະນະຮັບໃຊ້ພຽງພໍກັບການພັດທະນາພື້ນຖານໂຄງລ່າງຂອງບ້ານ.

      ໄລຍະຜ່ານມາ ອຳນາດການປົກຄອງບ້ານໄດ້ເອົາໃຈໃສ່ສຶກສາອົບຮົມການເມືອງແນວຄິດໃຫ້ປະຊາຊົນມີແນວຄິດອຸ່ນອຽນທຸ່ນທ່ຽງ,  ເຊື່ອໝັ້ນຕໍ່ການນຳພາຂອງພັກ-ລັດຂັ້ນເທີງ, ພາຍໃນບ້ານມີຄວາມສະຫງົບໂດຍພື້ນຖານ, ປະຊາຊົນຍູ່ທ່າງທຳມາຫາກິນ, ເສດຖະກິດມີການຂະຫຍາຍຕົວຢ່າງຕໍ່ເນື່ອງ, ຊີວິດການເປັນຢູ່ໄດ້ຮັບການປັບປຸງດີຂື້ນ ສະເລ່ຍລາຍຮັບ 14.932.000 ກີບ/ຄົນ/ປີ, ສ້າງໄດ້ 576 ຄອບຄົວພົ້ນທຸກ ເທົ່າກັບ 99,65%, ສ້າງໄດ້ຄອບຄົວພັດທະນາ 526 ຄອບຄົວ ເທົ່າກັບ 91,01%, ປະຈຸບັນ ຍັງມີຄອບຄົວທຸກຍາກ 2 ຄອບຄົວ, ພ້ອມນີ້ ກອງປະຊຸມຍັງໄດ້ທຳການປ່ອນບັດຄັດເລືອກເອົາຄະນະບ້ານຊຸດໃໝ່ 4 ທ່ານ ເພື່ອຊີ້ນຳ-ນຳພາຕໍ່ໄປ ໂດຍເລືອກໄດ້ ທ່ານ ແສງຈັນ ເລື່ອງວິໄລ ເປັນນາຍບ້ານ, ທ່ານ ຄຳພຸດ ມະນີແດງ, ທ່ານ ບຸນຮຽມ ແກ້ວວຽງຊຳ ແລະ ທ່ານ ນາງມີ ພົມມະສຸກ ເປັນຮອງນາຍບ້ານ.