ເພື່ອປະຕິບັດຕາມຂໍ້ຕົກລົງຂອງທ່ານຫົວໜ້າກອງບັນຊາການປ້ອງກັນເຄື່ອນທີ່ ສະບັບເລກທີ 932/ກປທ, ລົງວັນທີ 14 ພືດສະພາ 2018 ວ່າດ້ວຍການແຕ່ງຕັ້ງພະນັກງານໄປວຽກທາງລັດຖະການຢູ່ ປກສ ແຂວງບໍລິຄໍາໄຊ, ຄໍາມ່ວນ ແລະ ສະຫວັນນະເຂດ ມາໃນຕອນເຊົ້າວັນທີ 11 ມິຖຸນາ 2018 ນີ້ ທ່ານ ພັນເອກ ໄກສອນ ແກ້ວມະນີ ຮອງເລຂາຄະນະພັກ ຮອງຫົວໜ້າກອງບັນຊາການປ້ອງກັນເຄື່ອນທີ່ ກະຊວງປ້ອງກັນຄວາມສະຫງົບ ພ້ອມດ້ວຍຄະນະ ໄດ້ລົງຊີ້ນໍາວຽກງານຢູ່ ປກສ ແຂວງບໍລິຄໍາໄຊ, ມີທ່ານຮອງຫົວໜ້າກອງບັນຊາການ ປກສ ແຂວງ, ບັນດາຄະນະຫ້ອງ, ປກສ ເມືອງປາກຊັນ ຕະຫຼອດຮອດພະນັກງານ-ນັກຮົບ ພາຍໃນກອງພັນປ້ອງກັນເຄື່ອນທີ່ ເຂົ້າຮ່ວມ.

          ທ່ານ ພັນໂທ ສີທັດ ຂົວທິຈັກ ຮັກສາການຫົວໜ້າກອງພັນປ້ອງກັນເຄື່ອນທີ່ ໄດ້ຜ່ານບົດສະຫຼຸບຫຍໍ້ການຈັດຕັ້ງປະຕິບັດວຽກງານວິຊາສະເພາະໄລຍະ 01 ປີຜ່ານມາ ວ່າ: ຄະນະພັກໄດ້ຖືເອົາການສືກສາອົບຮົມການເມືອງ-ນໍາພາແນວຄິດ ໃຫ້ພະນັກງານ-ນັກຮົບຢ່າງເປັນປົກກະຕິ, ໄດ້ຊີ້ນໍາ-ນໍາພາພະນັກງານ-ນັກຮົບເຄື່ອນໄຫວເຮັດວຽກງານວິຊາສະເພາະ ແລະ ຍາດໄດ້ຜົນງານຫຼາຍດ້ານ ເຊັ່ນ: ໄດ້ນໍາພາພະນັກງານສະມາຊິກພັກ, ພະນັກງານ-ນັກຮົບ ປະຈໍາການຢ່າງປົກກະຕິຕະຫຼອດ 24 ຊົ່ວໂມງ, ອອກເຄື່ອນໄຫວລາດຕະເວນປ້ອງກັນຄວາມສະຫງົບໃນເທດສະບານໄດ້ 58 ຄັ້ງ,  ປ້ອງກັນແຂກພາຍໃນ ແລະ ຕ່າງປະເທດ ໄດ້ 21 ຄັ້ງ, ອອກເຄື່ອນໄຫວວຽກງານວິຊາສະເພາະນໍາພະແນກສະກັດກັ້ນ ແລະ ຕ້ານຢາເສບຕິດ ໄດ້ 02 ຄັ້ງ, ຍືດເຮໂລອິນໄດ້ 42 ແທ່ງ, ຢາບ້າ 120.000 ເມັດ, ລົດໃຫ່ຍ 02 ຄັນ, ສົມທົບກັບຫ້ອງຕໍາຫຼວດກອບກູ້ຊິງຕົວປະກັນໄດ້ 01 ຄັ້ງ, ມີ 01 ຄົນໄດ້ສໍາລັດ ແລະ ປອດໄພ, ຈັບຕົວຜູ້ກະທໍາຜິດໄດ້ 03 ຄົນ ມອບໃຫ້ພະແນກຕໍາຫຼວດດໍາເນີນຄະດີຕາມລະບຽບກົດໝາຍ, ຊອກແຫຼ່ງລາຍຮັບເຂົ້າກົມກອງໂດຍການເກັບເງີນຈາກຈຸດຍາມຕ່າງໆທີ່ເອົາພະນັກງານໄປປະຈໍາ  ມາເປັນເງີນບໍລິຫານຂອງກົມກອງ ຈໍານວນທັງໝົດ 31.440.000 ກີບ, ຮັບ ແລະ ເບີກຈ່າຍເຄື່ອງນຸ່ງຮົມ ໃຫ້ພະນັກງານ-ນັກຮົບ ໄດ້ 01 ຄັ້ງ,  ນອກນັ້ນຍັງໄດ້ຝືກອົບຮົມວຽກງານວິຊາສະເພາະ,  ຝືກຊ້ອມຫັດແອບວິຊາສະເພາະໃຫ້ພະນັກງານ-ນັກຮົບ ຢ່າງປົກກະຕິ ເພື່ອຄວາມພ້ອມໃນການຮັກສາຄວາມສະຫງົບ, ສ່ວນວຽກງານດ້ານອື່ນໆກໍ່ແມ່ນສາມາດເຮັດສໍາເລັດຕາມການມອບໝາຍຂອງຂັ້ນເທິງ,  ຫຼັງຈາກນັ້ນ ບັນດາຜູ້ແທນກອງບັນປະຊຸມ ກໍ່ໄດ້ພັດປ່ຽນກັນປະກອບຄໍາຄິດຄໍາເຫັນໃສ່ຮ່າງບົດສະຫຼຸບ ແລະ ທິດທາງແຜນການ ເພື່ອພ້ອມກັນນໍາໄປຈັດຕັ້ງປະຕິບັດເຂົ້າໃນວຽກງານວິຊາສະເພາະຕົວຈິງໃຫ້ໄດ້ຮັບຜົນສໍາເລັດຢ່າງມີປະສິດທິຜົນສູງ.

           ໂອກາດທີ່ທ່ານ ພັນເອກ ໄກສອນ ແກ້ວມະນີ ລົງມາເຮັດວຽກຢູ່ແຂວງບໍລິຄໍາໄຊ ທ່ານຍັງໄດ້ໂອ້ລົມ ແລະ ໃຫ້ທິດຊິ້ນໍາຕື່ມອີກ ເຊິ່ງທ່ານໄດ້ຍ້ອງຍໍຊົມເຊີຍຄະນະພັກ, ຄະນະກອງບັນຊາການທີ່ໄດ້ເອົາໃຈໃສ່ຊີ້ນໍາ-ນໍາພາ ພະນັກງານວິຊາສະເພາະເຮັດສໍາເລັດໜ້າທີ່ຕາມການມອບໝາຍຂອງຂັ້ນເທິງ, ທ່ານໄດ້ເນັ້ນໜັກໃຫ້ເອົາໃຈໃສ່ສືກສາອົບຮົມການເມືອງ-ແນວຄິດໃຫ້ພະນັກງານ-ນັກຮົບ ໃຫ້ມີຄວາມປອດໃສ, ເຂັ້ມແຂງ , ໜັກແໜ້ນ ເຊື່ອໝັ້ນຕໍ່ແນວທາງນະໂຍບາຍຂອງພັກ, ເຄົາລົບລະບຽບກົດໝາຍຂອງລັດຢ່າງເຂັ້ມງວດ, ປະສານສົມທົບ, ແລກປ່ຽນບົດຮຽນ ແລະ ສະພາບການ ຮ່ວມກັນຢ່າງເປັນປົກກະຕິກັບບັນດາ ຫ້ອງ, ກອງ , ປກສ ເມືອງ  ເພື່ອຮ່ວມກັນແກ້ໄຂບັນຫາ 4 ເຖື່ອນ, ບັນຫາຂີ້ລັກງັດແງະ, ປຸ້ນຊັບຊິງຊັບ, ບັນຫາກຸ່ມແກ້ງກວນເມືອງ ແນ່ໃສ່ເຮັດໃຫ້ສັງຄົມມີຄວາມສະຫງົບປອດໄພ, ເອົາໃຈໃສ່ຝືກອົບອົບຮົມຫັດແອບວິຊາສະເພາະໃຫ້ພະນັກງານ-ນັກຮົບ ໃຫ້ມີຄວາມສໍານິສໍານານ ແລະ ມີຄວາມພ້ອມໃນການປະຕິບັດໜ້າທີ່ວຽກງານວິຊາສະເພາະ ໃຫ້ມີປະສິດທິພາບ ແລະ ແກ້ໄຂທ່ວງທັນກັບສະພາບການທີ່ເກີດຂື້ນ.