ໃນຕອນບ່າຍຂອງວັນທີ 11 ມິຖຸນາ 2018 ທ່ານ ພັນໂທ ແສງປະເສີດ ສຸທຳມະວົງ ຮອງຫົວໜ້າກົມສື່ສານ ກະຊວງ ປ້ອງກັນຄວາມສະຫົງບ ໄດ້ລົງຊີ້ນຳວຽກງານສື່ສານດ້ວຍລະບົບທັນສະໄໝ ຢູ່ ປກສ ແຂວງ ບໍລິຄຳໄຊ ເປັນກຽດເຂົ້າຮ່ວມໂດຍ ທ່ານ ພັນເອກ ທອງໃບ ລໍວັນໄຊ ຫົວໜ້າ ກອງບັນຊາການ ປກສ ແຂວງ ບໍລິຄຳໄຊ, ມີຄະນະກອງບັນຊາການ, ບັນດາຄະນະຫ້ອງ, ກອງພັນປ້ອງກັນເຄື່ອນທີ່, ຄ້າຍຄຸມຂັງ-ດັດສ້າງ, ໂຮງຮຽນ ປກສ ຊັ້ນຕົ້ນເລກ 04, ປກສ ເມືອງ 07 ຕົວເມືອງ, ພ້ອມດ້ວຍພະນັກງານວິຊາສະເພາະສື່ສານເຂົ້າຮ່ວມ.

          ທ່ານ ພັນໂທ ແສງປະເສີດ ສຸທຳມະວົງ ຮອງຫົວໜ້າກົມສື່ສານ ກະຊວງ ປ້ອງກັນຄວາມສະຫົງບໄດ້ກ່າວວ່າ ວຽກງານສື່ສານເປັນວຽກງານໜື່ງທີ່ສຳຄັນຂອງກຳລັງປ້ອງກັນຄວາມສະຫງົບ, ເຊິ່ງເປັນເສນາທິການໃຫ້ແກ່ຄະນະພັກ, ຄະນະບັນຊາທຸກຂັ້ນ, ເອົາໃຈໃສ່ໃນການຕິດຕາມ, ກວດກາ ແລະ ສະກັດກັ້ນການເຄື່ອນໄຫວທີ່ບໍ່ຖືກຕ້ອງຂອງພວກກຸ່ມຄົນບໍ່ດີ ທີ່ຫວັງມ້າງເພທຳລາຍຄວາມສະຫົງບ, ຄວາມເປັນລະບຽບຮຽບຮ້ອຍໃນສັງຄົມ, ສະນັ້ນ ເພື່ອເປັນການປັບປຸງໃຫ້ກຳລັງເຫຼົ່າຮົບວິຊາສະເພາະສື່ສານຂອງກຳລັງປ້ອງກັນຄວາມສະຫງົບໃນຂອບເຂດທົ່ວປະເທດ ເວົ້າລວມ, ເວົ້າສະເພາະ ກໍ່ຄືວຽກງານສື່ສານຢູ່ກອງບັນຊາການ ປກສ ແຂວງ ບໍລິຄຳໄຊ ໄດ້ນຳໃຊ້ອຸປະກອນທີ່ທັນສະໄໝ ເຂົ້້າໃນວຽກງານດັ່ງກ່າວໃຫ້ມີຄວາມສະດວກວ່ອງໄວ ແລະ ທັນສະໄໝຂື້ນກວ່າເກົ່າ ທາງກົມສື່ສານ ກະຊວງ ປກສ ຈຶ່ງໄດ້ນຳເອົາອຸປະກອນຮັບໃຊ້ເຂົ້າໃນວຽກງານສື່ສານດ້ວຍລະບົບທັນສະໄໝມາປະກອບໃຫ້ແກ່ ກຳລັງສື່ສານຂອງກອງບັນຊາການ ປກສ ແຂວງບໍລິຄຳໄຊ ເພື່ອຕິດຕັ້ງ ແລະ ນຳໃຊ້ໃນ 08 ຈຸດ, ມີຈຳນວນ 235 ເຄື່ອງ, ມີ 02 ຊະນິດ ຄື: ຊະນິດ PD788 ຈໍານວນ 80 ເຄື່ອງ, PD688 ຈຳນວນ 155 ເຄື່ອງ, ຄອມພິວເຕີໂນດບຸກ 01 ເຄື່ອງ, ປິ່ນເຕີສີ 01 ເຄື່ອງ, ໂດຍນຳໃຊ້ເຊື່ອມຕໍ່ກັບລະບົບເຄື່ອຂ່າຍອິນເຕີເນັດ 4G, ຈາກນັ້ນ ບັນດາຄະນະທີ່ມາຈາກກົມສື່ສານກະຊວງ ປກສ ກໍ່ໄດ້ອະທິບາຍວິທີການຕິດຕັ້ງ, ການນຳໃຊ້ ອຸປະກອນສື່ສານດ້ວຍລະບົບທີ່ທັນສະໄໝ, ການຄຸ້ມຄອງ ແລະ ວິທີການປົກປັກຮັກສາໃຫ້ຖືກຕ້ອງພ້ອມໃຊ້ງານຕະຫຼອດເວລາ.

    ຕອນທ້າຍ ທ່ານ ພັນເອກ ທອງໃບ ລໍວັນໄຊ ຫົວໜ້າກອງບັນຊາການ ປກສ ແຂວງ ກໍໄດ້ກ່າວສະແດງຄຳຂອບໃຈມາຍັງທ່ານພັນໂທ ແສງປະເສີດ ສຸທຳມະວົງ ຮອງຫົວໜ້າກົມສື່ສານ ກະຊວງ ປ້ອງກັນຄວາມສະຫົງບ ທີ່ໄດ້ນຳເອົາອຸປະກອນນຳໃຊ້ເຂົ້າໃນວຽກງານສື່ສານດ້ວຍລະບົບທີ່ທັນສະໄໝມາປະກອນໃຫ້ກຳລັງສື່ສານຂອງກອງບັນຊາການ ປກສ ແຂວງ ບໍລິຄຳໄຊໃນຄັ້ງນີ້ ແລະ ໄດ້ຊີ້ນຳໃຫ້ຄະພັກຄະນະບັນຊາທຸກຂັ້ນ ພ້ອມດ້ວຍພະນັກງານ-ນັກຮົບຜູ້ທີ່ເຮັດວຽກງານສື່ສານທຸກສະຫາຍ ຈົ່ງພ້ອມກັນເພີ່ມທະວີຄວາມຮັບຜິດຊອບໃນການເຮັດໜ້າທີ່ວຽກງານ ແລະ ເອົາໃຈໃສ່ຄົ້ນຄ້ວາຮ່ຳຮຽນການນຳໃຊ້ເຄື່ອງມື ແລະ ອຸປະກອນວຽກງານສື່ສານດ້ວຍລະບົບທີ່ທັນສະໄໝໃຫ້ຖືກວິທີ ເພື່ອຮັບປະກັນຮັກສາໄດ້ຄວາມລັບໃນການປະຕິບັດໜ້າທີ່ວຽກງານວິຊາສະເພາະຢ່າງຖືກຕ້ອງສອດຄ່ອງກັບສະພາບການຕົວຈິງໃນປະຈຸບັນ ກໍ່ຄືສະເພາະໜ້າ, ເອົາໃຈໃສ່ປົກປັກຮັກສາຄຸ້ມຄອງອຸປະກອນດັ່ງກ່າວໃຫ້ຢູ່ໃນສະພາບທີ່ດີ ແລະ ສາມາດນຳໃຊ້ເຂົ້າໃນວຽກງານວິຊາສະເພາະໄດ້ຍາວນານ.