ພິທີສອບເສັງຈົບຊັ້ນມັດທະຍົມສຶກສາ ມໍ 4 ແລະ ມໍ 7 ໄດ້ເລີ່ມຂື້ນຢ່າງເປັນທາງການພ້ອມໆກັນໃນຂອບເຂດທົ່ວປະເທດ ໃນຕອນເຊົ້າວັນທີ 11 ມິຖຸນາ 2018, ສະເພາະຢູ່ແຂວງບໍລິຄຳໄຊ ແມ່ນໄດ້ກຳນົດເອົາສະໂມສອນຂອງໂຮງ ມສ ສີທ່ານາໄຊ ເປັນສະຖານທີ່ເປີດການສອບເສັງ ໂດຍການເຂົ້າຮ່ວມຂອງທ່ານ ບຸນມາ ບຸຈະເລີນ ຮອງເລຂາພັກແຂວງ ຮອງເຈົ້າແຂວງບໍລິຄຳໄຊ ທັງເປັນປະທານຊີ້ນຳການຈັດການສອບເສັງຈົບຊັນຂັ້ນແຂວງ, ມີບັນດາຕາງໜ້າພະແນກການອ້ອມຂາງແຂວງ, ເມືອງ, ຄະນະກຳມະການຮັບຜິດຊອບການສອບເສັງ ຕະຫຼອດຮອດຄູ-ອາຈານ, ນັກສອບເສັງ ມໍ 4 ແລະ ມໍ 7 ປະຈຳສູນສອງເສັງແຫ່ງຕ່າງໆເຂົ້າຮ່ວມ.

          ໃນພິທີ ທ່ານຄຳສີ ຍົມມະລາດ ຫົວໜ້າພະແນກສຶກສາທິການ ແລະ ກິລາ ໄດ້ຂື້ນຜ່ານບົດລາຍງານການຫ້າງຫາກະກຽມການສອບເສັງຈົບຊັນມັດທະຍົມສາຍສາມັນ ສົກຮຽນ 2017-2018 ວ່າ: ຊັ້ນມັດທະຍົມສຶກສາ ມໍ 4 ຈະໄດ້ສອບເສັງໃນວັນທີ 12-14 ມິຖຸນາ 2018 ທົ່ວແຂວງມີນັກສອບເສັງທັງໝົດ ຈຳນວນ 4.700 ກວ່າຄົນ, ຍິງ 2.000 ກວ່າຄົນ ໂດຍໄດ້ແບ່ງອອກເປັນ 14 ສູນ, ມີ 223 ຫ້ອງສອບ ເຊິ່ງແຕ່ລະຫ້ອງຈະມີນັກສອບເສັງ 20-23 ຄົນ ແລະ ຈະໄດ້ສອບເສັງໃນ 6 ວິຊາຮຽນ ຄື: ວິຊາພາສາລາວ-ວັນນະຄະດີ, ສຶກສາພົນລະເມືອງ, ວິທະຍາສາດທຳມະຊາດ, ວິທະຍາສາດ-ສັງຄົມ, ຄະນິດສາດ ແລະ ພາສາອັງກິດ. ສຳລັບຊັ້ນ ມໍ 7 ຈະໄດ້ສອບເສັງ ໃນວັນທີ 19-20 ມິຖຸນາ 2018 ທົ່ວແຂວງມີນັກສອບເສັງທັງໝົດ ຈຳນວນ 3.200 ກວ່າຄົນ, ຍິງ 500 ກວ່າຄົນ ໂດຍໄດ້ແບ່ງອອກເປັນ 9 ສູນ, ມີ 153 ຫ້ອງສອບ ເຊິ່ງແຕ່ລະຫ້ອງຈະມີນັກສອບເສັງ 21-23 ຄົນ ແລະ ຈະໄດ້ສອບເສັງໃນ 4 ວິຊາຮຽນ ຄື: ວິຊາພາສາລາວ-ວັນນະຄະດີ, ຊີວະສາດ, ຄະນິດສາດ ແລະ ພູມສາດ.

     ໃນໂອກາດນີ້ທ່ານ ບຸນມາ ບຸຈະເລີນ ຍັງໄດ້ມີຄຳເຫັນໂອລົມ ແລະ ຮຽກຮ້ອງມາຍັງຄະນະກຳມະການຮັບຜິດຊອບການສອບເສັງຈົບຊັ້ນ ຈົ່ງໄດ້ເພີ່ມທະວີດ້ວຍຄວາມຮັບຜິດຊອບສູງຕໍ່ໜ້າທີ່ຂອງຕົນ, ຮັກສາຈັນຍາບັນ, ກົດລະບຽບຂອງການສອບເສັງໃຫ້ໜັກແໜ້ນ ແລະ ມີຄວາມໂປ່ງໃສຍຸຕິທຳ, ຕ້ອງເປັນເຈົ້າຕົນເອງໃນການແກ້ບົດສອບ, ປະຕິບັດກົດລະບຽບວິໄນ ທີ່ຄະນະກຳມະການວາງອອກຢ່າງເຂັ້ມງວດ ພ້ອມກັນສຸມສະຕິປັນຍາເຂົ້າໃນການກວດແກ້ບົດສອບເສັງຂອງຕົນໃຫ້ສຳເລັດ ແລະ ທ່ວງທັນກັບເວລາ ເພື່ອໃຫ້ບັນລຸຕາມຄາດໝຍ, ພາຍຫຼັງສຳເລັດພິທີ ທ່ານປະທານພ້ອມດ້ວຍບັນດາແຂກທີ່ເຂົ້າຮ່ວມ ຍັງໄດ້ພ້ອມກັນຮ່ວມປູກຕົ້ນໄມ້ ໄວ້ເປັນທີ່ລະນຶກຢູ່ທີ່ເດີນໂຮງຮຽນແຫ່ງດັ່ງກ່າວ.