ໃນປີ 2018 ດ່ານ​ພາສີ​ສາກົນ​ປາກ​ຊັນ ​ໄດ້​ມີ​ແຜນການ​ເກັບ​ລາຍ​ຮັບ​ໝົດ​ປີ 204,41 ຕື້​ກີບ ແລະ ​ຜ່ານ​ການຈັດ​ຕັ້ງ​ປະຕິບັດ​ພາຍ​ໃນ 3 ​ເດືອນ​ຕົ້ນ​ປີ ສາມາດ​ປະຕິບັດ​ໄດ້ 79,91 ຕື້​ກີບ ​ເທົ່າ​ກັບ 131,37% ຂ​ອງ​ແຜນ​ງວດ ​ແລະ ​ເທົ່າ​ກັບ 39,09% ຂອງ​ແຜນ​ການ​ປີ ທຽບ​ໃສ່ໄລຍະ​ດຽວ​ຂອງ​ປີຜ່ານ​ມາ​ເທົ່າ​ກັບ 184,77% ສ່ວນ​ລາຍ​ຮັບ​ຫຼັກໆ​ແມ່ນໄດ້​ຈາກ​ການເກັບພາສີ​ນຳ​ເຂົ້າ​ພາຫະນະ​ ​ແລະ​ ນ້ຳມັນ​ເຊື້ອ​ໄຟ.​

       ທ່ານ ​ໄຊຊະນະ ວົງ​ຊົມ​ພູ ຮອງ​ຫົວໜ້າ​ດ່ານ​ພາສີ​ສາກົນ​ປາກ​ຊັນ ​​ໄດ້ໃຫ້​​ສຳ​ພາດ​ຕໍ່​ນັກຂ່າວແຂວງບໍ​ລິ​ຄຳ​ໄຊ​ໃນ​ວັນ​ທີ 7 ມິ​ຖຸ​ນາ​ນີ້​ວ່າ: ດ່ານ​ພາສີ​ສາກົນ​ປາກ​ຊັນ​ແມ່ນ​ປະກອບມີ 3 ດ່ານ​ປະ​ເພນີ​ ​ແລະ 1 ຈຸ​ງານ​ທີ່​ຂຶ້ນ​ກັບ ​ໃນ​ນັ້ນ ສະ​ເພາະ​ດ່ານ​ພາສີ​ສາກົນ​ປາກ​ຊັນ​ເກັບ​ລາຍ​ຮັບ​ໄດ້ 79,19 ຕື້​ກີບ ​ເທົ່າ​ກັບ 158,21% ຂອງ​ແຜນ​ງວດ, ດ່ານ​ປະ​ເພນີ​ປາກ​ກະດິງ ປະຕິບັດ​ໄດ້ 17,11 ລ້ານ​ກີບ​ ​ເທົ່າ​ກັບ 66,71%, ດ່ານ​ປະ​ເພນີ​ທ່າ​ສະອາດ ​ເກັບ​ລາຍ​ຮັບ​ໄດ້ 33,85 ລ້ານ​ກີບ ​ເທົ່າ​ກັບ 90,28%, ດ່ານ​ປະ​ເພນີ​ບ້ານ​ທວາຍ ​ເກັບ​ໄດ້ 100 ລ້ານ​ກວ່າ​ກີບ ​ເທົ່າ​ກັບ 134,98% ​ແລະ​ ຈຸ​ງານ​ຄຸ້ມ​ຄອງ​ພາຫະນະ​-ຜູ້​ໂດຍສານ ປະຕິບັດ​ໄດ້ 570,38 ລ້ານ​ກີບ ​ເທົ່າ​ກັບ 62,51% ຂອງ​ແຜນ​ງວດ, ສາ​ເຫດ​ທີ່​ເກັບ​ລາຍ​ຮັບ​ໄດ້​ລື່ນ​ແຜນ​​ ແມ່ນຍ້ອນ​ການ​ນຳ​ເຂົ້າ​ພາຫະນະ​ເສຍ​ພາສີ ​ແລະ​ ນ້ຳມັນ​ເຊື້ອ​ໄຟ​ມີ​ການ​ນຳ​ເຂົ້າ​ເພີ່ມ​ຂຶ້ນ., ​ລາຍ​ຮັບ​ຫຼັກທີ່​ດ່ານ​ພາສີ​ສາກົນ​ປາກ​ຊັນ​ເກັບ​ລາຍ​ຮັບ​ໄດ້​ລື່ນ​ແຜ​ນການ ​ແມ່ນ​ໄດ້​ຈາກ​ຄ່າ​ຊັກ​ພິ​ເສດ 54,77 ລ້ານ​ກີບ, ການ​ນຳ​ເຂົ້າ​ນ້ຳມັນ​ເຊື້ອ​ໄຟ 43,46 ຕື້​ກີບ ກວມ​ເອົາ 54,39% ຂອງ​ລາຍ​ຮັບ​ທັງ​ໝົດ​, ພາຫະນະ 23,71 ຕື້​ກີບ ກວມ​ເອົາ 29,68% ຂອງ​ລາຍ​ຮັບ, ວັດ​ສະ​ດຸ​ກໍ່​ສ້າງ 233 ລ້ານ​ກີບ, ​ເຄື່ອງ​ອຸປະ​ໂພ​ກ-ບໍລິ​ໂພ​ກ 1 ຕື້​ກວ່າ​ກີບ, ສິນຄ້າ​ນຳ​ເຂົ້າ​ເພື່ອ​ສົ່ງ​ອອກ 3,17 ຕື້​ກີບ, ຄັງ​ແຮ 7,48 ຕື້​ກີບ, ຄ່າ​ທຳນຽມ 652 ລ້ານ​ກວ່າ​ກີບ ​ແລະ​ ອື່ນໆ.

     ​ແນວ​ໃດ​ກໍ​ດີ ທ່ານ ​ໄຊຊະນະ ວົງ​ຊົມ​ພູ ຍັງເວົ້າຕື່ມ​ວ່າ: ສຳລັບ​ງວດ​ທີ​ສອງ ​ແມ່ນ​ມີ​ແຜນການ​ເກັບ​ລາຍ​ຮັບ​ທັງ​ໝົດ 51,10 ຕື້ກີບ ​ໃນ​ນັ້ນປະກອບ​ມີຄ່າ​ຊັກ​ພິ​ເສດ 107,77 ລ້ານ​ກີບ, ພາສີ-ອາກອນ​ຂາ​ເຂົ້າ 42,77 ຕື້​ກີບ, ນຳ​ເຂົ້າ-ສົ່ງ​ອອກ 2,23 ຕື້​ກີບ, ຄ່າ​ປັບ​ໄໝ​ຂາຍ​ເຄື່ອງ​ຢຶດ 2,62 ລ້ານ​ກີບ ​ແລະ​ ຄ່າ​ທຳນຽມ 5,98 ຕື້​ກີບ ຊຶ່ງ​ໃນ​ຕົວ​ເລກ​ດັ່ງກ່າວ​ ບັນດາ​ດ່ານ​ຈະ​ຕ້ອງ​ສູ້​ຊົນ​ເກັບ​ໃຫ້​ໄດ້​ຕາມ​ແຜນການ ​ເປັນ​ຕົ້ນ ດ່ານ​ປາກ​ຊັນ ​ຕ້ອງ​ສູ້​ຊົນ​ເກັບ​ໃຫ້​ໄດ້ 50 ຕື້​ກີບ, ດ່ານ​ປາກ​ກະດິງ 25,65 ລ້ານ​ກີບ​, ດ່ານທ່າ​ສະອາດ 37,50 ລ້ານ​ກີບ, ດ່ານ​ບ້ານ​ທວາຍ 75 ລ້ານ​ກີບ ​ແລະ​ ຈຸ​ງານ​ຄຸ້ມ​ຄອງ​ພາຫະນະ ​ເກັບ​ໃຫ້​ໄດ້ 912,52 ລ້ານ​ກີບ.