ພິທີຖະແຫຼງຂ່າວງານສະເຫຼີມສະຫຼອງວັນໂອແລມປີກສາກົນ ຄົບຮອບ 124 ປີ ໄດ້ຈັດຂຶ້ນໃນຕອນບ່າຍຂອງວັນທີ 08 ມິຖຸນາ 2018 ຢູ່ທີ່ຫ້ອງປະຊຸມເບີ 02 ຂອງແຂວງ ໂດຍໃຫ້ກຽດເຂົ້າເປັນປະທານຂອງທ່ານ ບົວລານ ສິລິປັນຍາ ຮອງລັດຖະມົນຕີກະຊວງສຶກສາທິການ ແລະ ກີລາ, ທ່ານ ບຸນມາ ບຸຈະເລີນ ຮອງເຈົ້າແຂວງບໍລິຄຳໄຊ, ມີບັນດາທ່ານຈາກກະຊວງສຶກສາທິການ ແລະ ກີລາ, ຫົວໜ້າ, ຮອງຫົວໜ້າພະແນກການ ແລະ ຄະນະຮັບຜິດຊອບງານຂັ້ນແຂວງ-ເມືອງ ພ້ອມດ້ວຍພະນັກງານວິຊາການທີ່ກ່ຽວເຂົ້າຮ່ວມ.

          ຈຸດປະສົງໃນການຖະແຫຼງຂ່າວການກະກຽມ ແລະ ແຜນການຈັດຕັ້້ງປະຕິບັດງານສະເຫຼີມສະຫຼອງວັນໂອແລມປີກສາກົນ ຄົບຮອບ 124 ປີ ທີ່ແຂວງບໍລິຄຳໄຊ ກໍ່ເພື່ອໃຫ້ປະຊາຊົນບັນດາເຜົ່າທັງພາຍໃນ ແລະ ຕ່າງປະເທດ ໄດ້ຮັບຮູ້ເຖິງຄວາມໝາຍຄວາມສຳຄັນກ່ຽວກັບງານດັ່ງກ່າວ ເຊິ່ງໃນວັນທີ 08 ພຶດສະພາ 2018 ທີ່ຜ່ານມາ ຢູ່ທີຫ້ອງປະຊຸມກິລາ-ກາຍະກຳ ໄດ້ເປີດກອງປະຊຸມປຶກສາຫາລື ແລະ ໄດ້ຕົກລົງກັນ ຄື: ແຕ່ງຕັ້ງຄະນະກະກຽມ, ຄະນະຮັບຜິດຊອບ ແລະ ວິຊາການຂັ້ນສູນກາງໄປເຮັດວຽກການແຂ່ງຂັນຊ່ວຍແຂວງຕາມໜ້າວຽກຕົວຈິງ, ງົບປະມານຮັບໃຊ້ຄະນະຮັບຜິດຊອບວິຊາການ, ອຸປະກອນຮັບໃຊ້ພິທີການຕ່າງໆຮ່ວມກັບແຂວງ, ຜະລິດຫຼຽນທີ່ລະນຶກ ແລະ ຂອງຂວັນລາງວັນ, ສົມທົບກັບແຂວງ ສຳຫຼວດສະຖານທີ່ ແລະ ຄວາມພ້ອມ ເພື່ອຄວາມເປັນເອກະພາບຮ່ວມກັບແຂວງ, ເຊີນຊວນພາກສ່ວນສູນກາງ ແລະ ແຂວງເຂົ້າຮ່ວມ, ແຈ້ງການປຸກລະດົມມວນຊົນທາງພາກລັດ ແລະ ເອກະຊົນ, ປະຊາຊົນທົ່ວໄປທຸກເພດ-ໄວເຂົ້າຮ່ວມ ໃຫ້ໄດ້ 1000 ຄົນຂຶ້ນໄປ, ສະຖານທີ່ເປີດງານ ໄດ້ກຳນົດເອົາຂອບເຂດສະໜາມກິລາດອກປີກໄກ່ ແລະ ເດີ່່ນກິລາເປຕັງໃນຮົ່ມ ໃນນັ້ນ ໃຫ້ມີການອະນາໄມ, ປະດັບປະດາ, ກຳນົດສະຖານທີ່ເຕັ້ນອອກກຳລັງກາຍລໍຖ້າພິທີເປີດ ແລະ ຖືເອົາສະຖານທີ່ດັ່ງກ່າວເປັນຈຸດປ່ອຍຍ່າງອອກກຳລັງກາຍການນຳ, ອາວຸໂສ, ສຳລັບກິດຈະກຳທີ່ຈະແຂ່ງຂັນແມ່ນມີກິລາດຶງເຊືອກຈາກພາກສ່ວນຕ່າງໆ, ຍ່າງການນຳອາວຸໂສ ຊາຍ-ຍິງ 2 ກິໂລແມັດ ໂດຍຍ່າງອອກຈາກຈຸດດັ່ງກ່າວໄປຕາມເສັ້ນທາງໃຫຍ່ຕໍ່ໜ້າລົງໄປ ລ້ຽວຢູ່ 4 ແຍກຫ້ອງວ່າການປົກຄອງແຂວງກັບມາສູ່ຈຸດເລີ່ມຕົ້ນ, ກິລາແລ່ນລຸນທົ່ວໄປ ຊາຍ-ຍິງ 4 ກິໂລແມັດ ແມ່ນແລ່ນອອກຈາກສະໜາມກິລາດອກປີກໄກ່ໃນຮົ່ມ ລ້ຽວຊ້າຍໄປຕາມເສັ້ນທາງເລກ 4 ລົງໄປຮອດ 4 ແຍກໄຟແດງທ່າດ່ານ ກັບຄືນມາສູ່ຈຸດເດີມ ແລ້ວຈະມີພິທີມອບຫຼຽນລາງວັນ.

         ໃນຕອນທ້າຍຂອງພິທີ ຍັງໄດ້ມີການມອບ-ຮັບ ການອຸປະຖຳຈາກບໍລິສັດຮ່ວມພັດທະນາ ເບຍລາວ ມູນຄ່າ 70.175.000 ກີບ ໃນນັ້ນ ມີຜະລິດຕະພັນເຄື່ອງດື່ມ, ປ້າຍໂຄສະນາ ແລະ ເສື້ອທີ່ລະນຶກ, ຕົວແທນຈຳໜ່າຍອຸປະກອນ FBT ເສື້ອທີ່ລະນຶກ 1200 ຜືນ ມູນຄ່າ 54 ລ້ານກີບ, ເພື່ອຮັບໃຊ້ໃນງານດັ່ງກ່າວ ເປັນກຽດຮັບໂດຍທ່ານ ສົມພູ ພົງສາ ຜູ້ຊ່ວຍລັດຖະຕີ ຮອງປະທານເລຂາທິການຄະນະກຳມະການໂອແລມປີກແຫ່ງຊາດລາວ, ງານດັ່ງກ່າວຈະໄດ້ຈັດຂຶ້ນຢູ່ທີ່ສະໜາມກິລາຄົບວົງຈອນແຂວງບໍລິຄຳໄຊ ໃນວັນທີ 23 ມິຖຸນາ 2018 ທີ່ຈະມາເຖິງນີ້.