ເນື່ອງໃນໂອກາດ ວັນເດັກນ້ອຍສາກົນ ຢ ມິຖຸນາ ທີ່ໄດ້ບັນຈົບຄົບຮອບໝູນວຽນມາອີກວາລະໜຶ່ງ ວັນທີ 31 ພຶດສະພາ 2018 ຢູ່ຫ້ອງການສຶກສາທິການ ແລະ ກິລາເມືອງທ່າພະບາດ ໄດ້ຈັດງານສະເຫຼີມສະຫຼອງຕ້ອນຮັບວັນເດັກນ້ອຍສາກົນ ໂດຍເປັນກຽດເຂົ້າຮ່ວມຂອງທ່ານ ບົວສອນ ບຸດຊາວດອນ ຮອງເຈົ້າເມືອງທ່າພະບາດ, ທ່ານ ສົມພູ ສົງຄາມຮັກ ກໍາມະການພັກເມືອງ ຫົວໜ້າຫ້ອງການສຶກສາທິການ ແລະ ກິລາເມືອງ, ມີບັນດາຫ້ອງການອ້ອມຂ້າງ, ພໍ່ແມ່ຂອງເດັກ ແລະ ຫຼານນອ້ຍນັກຮຽນ ເຂົ້າຮ່ວມຢ່າງຫຼວງຫຼາຍ.

    ໃນພິທີ ໄດ້ເລົ່າຄືນປະຫວັດ ແລະ ຄວາມເປັນມາຂອງວັນເດັກນ້ອຍສາກົນ ຊື່ງແມ່ນວັນທີ່ພວກເດັກນ້ອຍລູກຫຼານຂອງຊາວກໍາມະກອນ ແລະ ປະຊາຊົນຜູ້ອອກແຮງງານ ໄດ້ຖືກພວກຈັກກະພັດສັກດີນາ, ນາຍທຶນປະຕິການຢຽບຢໍ່າ, ຂົ່ມຂູ່ທໍາລາຍຢ່າງໂຫດຮ້າຍປ່າເຖື່ອນ ແລະ ກໍ່ແມ່ນວັນທີ່ເອື້ອຍອ້າຍນ້ອງແມ່ຍິງໄດ້ສາມັກຄີກັນລຸກຂຶ້ນຕໍ່ສູ້ ທວງໃຫ້ມີການປົກປ້ອງ ແລະ ເສີມຂະຫຍາຍສິດທິເດັກ ເພື່ອນໍາເອົາຄວາມຄວາມຈະເລີນກ້າວໜ້າມາສູ່ເດັກນ້ອຍລູກຫຼານຂອງປະຊາຊົນຜູ້ອອກແຮງງານ, ມາຮອດປີ 1949 ກອງປະຊຸມວ່າດ້ວຍສິດທີເດັກທີ່ໄຂຂື້ນຢູ່ນະຄອນຫລວງມົດສະກູ ໄດ້ຕົກລົງກຳນົດເອົາວັນທີ 1 ມິຖຸນາ ເປັນວັນປົກປ້ອງເດັກນ້ອນສາກົນ ຈົນມາຮອດປັດຈຸບັນ, ພິທີ ຍັງໄດ້ມີກິດຈະກໍາການແຂ່ງຂັນກິລາບານເຕະ, ຊົມການສະແດງສິລະປະຂອງຫຼານນ້ອຍນັກຮຽນ ແລະ ແຈກຂອງຂັວນໃຫ້ຫຼານນ້ອຍ ພ້ອມທັງມອບໂລ້, ຫຼຽນ ແລະ ໃບຢັ້ງຢືນໃຫ້ນັກກິລາບານເຕະຕື່ມອີກ.