ໃນວັນທີ 6 ມິຖຸນາ 2018 ຢູ່ຫ້ອງປະຊຸມພະແນກຖະແຫຼງຂ່າວ ວັດທະນະທຳ ແລະ ທ່ອງທ່ຽວແຂວງບໍລິຄຳໄຊ ໄດ້ຈັດກອງປະຊຸມຝຶກອົບຮົມວຽກງານຫ້ອງການ ໃນຫົວຂໍ້: ເອກະສານທາງການ ໂດຍການເປັນປະທານຂອງ ທ່ານ ເຄນ ລໍມະນີ ກຳມະການພັກແຂວງ ຫົວໜ້າພະແນກ ຖວທ ແຂວງບໍລິຄຳໄຊ, ມີຄະນະພະແນກ, ຫົວໜ້າຂະແໜງ, ຫົວໜ້າກອງວິຊາການ, ຫ້ອງການ ຖວທ 7 ຕົວເມືອງ ແລະ ພະນັກງານ-ລັດຖະກອນພາຍໃນພະແນກ ເຂົ້າຮ່ວມ.

    ກອງປະຊຸມ ໄດ້ຮັບຟັງການເຜີຍແຜ່ດຳລັດຂອງລັດຖະບານ ສະບັບເລກທີ 239/ລບ, ລົງວັນທີ 13 ສິງຫາ 2015 ວ່າດ້ວຍເອກະສານທາງການ ທີ່ປະກອບດ້ວຍ 7 ໝວດ, 36 ມາດຕາ ແລະ ມີເນື້ອໃນເວົ້າເຖິງຫຼັກການ, ລະບຽບການກ່ຽວກັບວຽກງານເອກະສານທາງການ ເພື່ອຮັບປະກັນໃນການຄຸ້ມຄອງ, ຕິດຕາມ, ກວດກາ ແລະ ການສຳເນົາເອກະສານທາງການໃຫ້ເປັນລະບົບ, ມີປະສິດທິພາບ ແລະ ເປັນເອກະພາບກັນໃນທົ່ວປະເທດ, ພ້ອມດຽວກັນ ໃນດຳລັດສະບັບນີ້ ຍັງຍົກໃຫ້ເຫັນເຖິງ 3 ປະເພດ ເອກະສານທາງການ ຄື: ເອກະສານນິຕິກຳ, ເອກະສານບໍລິຫານ ແລະ ເອກະສານຂະແໜງການ,  ນອກຈາກນັ້ນ ຍັງໄດ້ຮັບຟັງການເຜີຍແຜ່ເອກະສານຄຳແນະນຳ ຂອງກະຊວງພາຍໃນ ສະບັບເລກທີ 02/ພນ, ລົງວັນທີ 5 ເມສາ 2016 ກ່ຽວກັບການຈັດຕັ້ງປະຕິບັດດຳລັດວ່າດ້ວຍເອກະສານທາງການ ທີ່ສະແດງໃຫ້ເຫັນເຖິງເນື້ອໃນລະອຽດຕ່າງໆຂອງເອກະສານທາງການ, ຮູບແບບ ແລະ ຕົວຢ່າງ ໃນການສ້າງເອກະສານທາງການແຕ່ລະປະເພດ, ກອງປະຊຸມຄັ້ງນີ້ ຈະດຳເນີນໄປເປັນເວລາ 2 ວັນ ຈື່ງຈະສຳເລັດລົງ.