ເພຶ່ອເປັນການສົງເສີມວຽກງານການທ່ອງທ່ຽວ ແລະ ອະນຸລັກຮັກສາວັດທະນະທໍາ, ຮີດຄອງປະເພນີດັ່ງເດີມ ຂອງປະຊາຊົນລາວບັນດາເຜົ່າໃຫ້ຢູ່ຄູ່ກັບສັງຄົມລາວຕະຫຼອດໄປ ໃນວັນທີ 13 ພຶດສະພາ 2018 ຢູ່ທີ່ຟາມພູຕາເວັນ ບ້ານນາໄຊ ເມືອງທ່າພະບາດ ແຂວງບໍລິຄໍາໄຊ ໄດ້ຈັດກິດຈະກໍາເປີດໝູ່ບ້ານຈໍາລອງຂຶ້ນ ເຊິງເປັນກຽດເຂົ້າຮ່ວມງານຂອງທ່ານ ເຄນ ລໍມະນີ ຫົວໜ້າພະແນກຖະແຫຼ່ງຂ່າວ, ວັດທະນະທໍາ ແລະ ທ່ອງທ່ຽວແຂວງ, ທ່ານ ທະວີພັດ ຮອງຫົວໜ້າກົມພັດທະນາການທ່ອງທ່ຽວ ກະຊວງ ຖວທ ມີບັນດາແຂກຖືກເຊີນ ພ້ອມດ້ວຍບັນດາອົງການຈັດຕັ້ງຂັ້ນຕ່າງໆເຂົ້າຮ່ວມ.

    ທ່ານ  ໄກເພັດ ດວງປະເສີດ ຮອງປະທານບໍລິສັດພູຕາເວັນການທ່ອງທ່ຽວຈຳກັດຜູ້ດຽວ ໄດ້ລາຍງານວ່າ: ເພຶ່ອເຮັດໃຫ້ບັນດານັກທ້ອງທ່ຽວ ທັງພາຍໃນ ແລະ ຕ່າງປະເທດ ທີ່ເຂົ້າມາທ່ຽວຊົມຟາມພູຕາເວັນ ໄດ້ຮຽນຮູ້ ແລະ ເຂົ້າໃຈກ່ຽວກັບວີຖີການດໍາລົງຊີວິດທີລຽບງ່າຍຂອງປະຊາຊົນໃນເມືອກ່ອນ ພ້ອມທັງເປັນການອະນຸລັກຮັກສາ, ເຜີຍແຜ່ ວັດທະນະທໍາ ແລະ ຮີດຄອງປະເພນີ ຂອງປະຊາຊົນລາວບັນດາເຜົ່າ ເປັນຕົ້ນແມ່ນ ການຕໍາຫູກ-ທໍ່ໄໝ່, ການຈັກສານ, ການຕໍ່ສາດ ໃຫ້ຄົນຮຸ່ນໃໝ່ໄດ້ຮັບຮູ້ ແລະ ຊ່ວຍກັນອະນຸລັກຮັກສາໄວ້ໃຫ້ຢູ່ຄູ່ກັບສັງຄົມລາວຕະຫຼອດໄປ. ນອກນັ້ນຍັງມີຮູບພາບຈໍາລອງຈັດວາງສະແດງ ທີ່ສະແດງເຖິງວີຖີການດຳລົງຊີວິດຂອງປະຊາຊົນລາວໃນເມື່ອກ່ອນ ໄວ້ໃຫ້ນັກທ່ອງທ່ຽວໄດ້ຢ້ຽມຊົມ. ຫຼັງຈາກນັ້ນກໍ່ໄດ້ມີພິທີຕັດແຖບຜ້າເປີດພິທີຢ່າງເປັນທາງການ.