ໃນລະຫວ່າງວັນທີ 8-10 ພຶດສະພາ 2018 ຄະນະກໍ່ສ້າງຮາກຖານການເມືອງພັດທະນາຊົນນະບົດ ຕິດພັນວຽກງານ 3 ສ້າງແຂວງບໍລິຄຳໄຊ ນໍາໂດຍທ່ານ ໄມຈອມ ວັນນະສານຄໍາ ຫົວໜ້າພະແນກພາຍໃນແຂວງ, ຮອງຄະນະຮັບຜິດຊອບກໍ່ສ້າງຮາກຖານການເມືອງພັດທະນາຊົນນະບົດ ຕິດພັນວຽກງານ 3 ສ້າງແຂວງ ໄດ້ເດີນທາງໄປພົບປະແລກປຽ່ນບົດຮຽນຮ່ວມກັບ 2 ແຂວງພາກເໜືອ: ແຂວງບໍ່ແກ້ວ ແລະ ແຂວງອຸດົມໄຊ. 

   ຈຸດປະສົງໃນການພົບປະແລກປຽ່ນບົດຮຽນວຽກງານກໍ່ສ້າງຮາກຖານການເມືອງພັດທະນາຊົນນະບົດ ຕິດພັນກັບວຽກງານ 3 ສ້າງໃນຄັ້ງນີ້ ກໍ່ເພື່ອປະຕິບັດຕາມມະຕິເລກທີ່ 03/ກມສພ ລົງວັນທີ 30 ພຶດສະພາ 2011 ວ່າດ້ວຍການສ້າງບ້ານເປັນຫົວໜ່ວຍພັດທະນາ ສ້າງບ້ານໃຫ່ຍໃຫ້ກາຍເປັນຕົວເມືອງນ້ອຍຢູ່ຊົນນະບົດ ແລະ ທິດທາງເປົ້າໝາຍມາດຕະຖານສ້າງແຂວງເປັນຫົວໜ່ວຍຍຸດທະສາດ ສ້າງເມືອງເປັນຫົວໜ່ວຍເຂັ້ມແຂງຮອບດ້ານ ສ້າງບ້ານເປັນຫົວໜ່ວຍພັດທະນາ ໂດຍປະຕິບັດຕາມທິດນໍາການລົງກໍ່ສ້າງຮາກຖານການເມືອງ ຕາມ 4 ເນື້ອໃນ 4 ຂາດໝາຍ ໃນການເຜີຍແຜ່ເຊື່ອມຊຶມເອກະສານ ໃຫ້ພໍ່ແມ່ປະຊາຊົນຢ່າງເປັນປົກກະຕິຕໍ່ເນື່ອງ ແລະ ສຶກສາອົບຮົມການເມືອງແນວຄິດ ໃຫ້ພໍ່ແມ່ປະຊາຊົນບັນດາເຜົ່າ ໄດ້ມີຄວາມຮັບຮູ້ ແລະ ເຂົ້າໃຈຕໍ່ແນວທາງນະໂຍບາຍຂອງພັກ, ລະບຽບກົດໝາຍຂອງລັດຢ່າງທົ່ວເຖິງ ພ້ອມກັນຕ້ານ ແລະ ສະກັດກັ້ນ ແກ້ໄຂທຸກປະກົດການຫຍໍ້ທໍ້ທີ່ເກີດຂຶ້ນໃນສັງຄົມ ເຮັດໃຫ້ສັງຄົມມີຄວາມສະຫງົບ, ປະຊາຊົນມີຄວາມຕື່ນຕົວຫັນປຽ່ນ ແບບແຜນດໍາລົງຊິວິດ ແບບຮີດເກົ່າຄອງເດີມ ມາດໍາລົງຊິວິດມີແບບແຜນສ້າງລາຍຮັບໃຫ້ແກ່ຄອບຄົວ ສາມາດແກ້ໄຂຄວາມທຸກຫຍາກໃຫ້ລຸດລົງເທື່ອລະກ້າວ. ໃນກອງປະຊຸມຄະນະຜູ້ແທນຍັງໄດ້ພັດປຽ່ນກັນສະເໜີລາຍງານແບບກົງໄປກົງມາ ກຽ່ວກັບການຈັດຕັ້ງວຽກງານກໍ່ສ້າຮາກຖານການເມືອງ ພັດທະນາຊົນນະບົດ ຕິດພັນກັບວຽກງານ 3 ສ້າງ ຂອງແຂວງຕົນ ທັງນີ້ກໍ່ເພື່ອແນໃສ່ເຮັດໃຫ້ວຽກງານດັ່ງກ່າວໃຫ້ໄດ້ຮັບກການປັບປຸງແກ່ໄຂ  ແລະ ມີການຂະຫຍາຍຕົວດີຂຶ້ນໃນຕໍ່ໜ້າ.