ໃນວັນທີ 15 ພຶດສະພາ 2018 ຢູ່ທີ່ຫ້ອງຮັບຮອງຂອງແຂວງ ທ່ານ ປອ ກອງແກ້ວ ໄຊສົງຄາມ ເຈົ້າແຂວງບໍລິຄໍາໄຊ ໄດ້ເປັນກຽດຕ້ອນຮັບການເຂົ້າພົບປະຢ້ຽມຢາມຂອງ ເອກອັກຄະລັດຖະທູດອົດສະຕຣາລີ ປະຈຳ ສປປ ລາວ ທ່ານ ຈີ່ນເບີນາດ ຄາລາສ໌ໂກ່

   ການມາຢ້ຽມຢາມຄັ້ງນີ້ ເຊິ່ງເປັນການເສີມສ້າງສາຍພົວພັນມິດຕະພາບ ທີ່ມີຕໍ່ກັນໃຫ້ແໜ້ນແຟ້ນຍິ່ງຂຶ້ນກວ່າເກົ່າ ພ້ອມດຽວກັນນັ້ນທ່ານເຈົ້າແຂວງຍັງໄດ້ນໍາສະເໜີລາຍງານສະພາບລວມ ໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມໂດຍຫຍໍ້ຂອງແຂວງ ແຕ່ລະດ້ານໃນໄລຍະຜ່ານມາ ໃຫ້ກັບທ່ານເອກອັກຄະລັດຖະທູດພ້ອມດ້ວຍຄະນະໄດ້ຮັບຊາບ ແລະ ສອງຝ່າຍກໍ່ໄດ້ຕີລາຄາສູງ ຕໍ່ຜົນການຮ່ວມມືໃນໄລຍະຜ່ານມາ ເປັນຕົ້ນແມ່ນວຽກງານການສຶກສາ-ສາທາລະນະສຸກ, ການພັດທະນາດ້ານກະສິກຳ, ບັນດາທ່າແຮງອັນພົ້ນເດັ່ນຂອງແຂວງ ແລະ ອື່ນໆ ທັງນີ້ກໍ່ເປັນການສໍາຫຼວດ ແລະ ຊອກຫາຂໍ້ມູນຕົວຈິງ ເພຶ່ອຈະໄດ້ນຳໄປໃຊ້ເຂົ້າໃນການພັດທະນາວຽກງານໃນດ້ານຕ່າງໆຢູ່ ສາທາລະນະລັດ ປະຊາທິປະໄຕ ປະຊາຊົນລາວ ເວົ້າລວມ, ເວົ້າສະເພາະກໍ່ຄືແຂວງບໍລິຄໍາໄຊ ໃຫ້ມີການເຕີບໃຫ່ຍຂະຫຍາຍຕົວຢ່າງຕໍ່ເນື່ອງ ແລະ ມີບາດກ້າວຂະຫຍາຍຕົວທຽບເທົ່າກັບລະດັບສາກົນ ຈາກນັ້ນ ທ່ານເອກອັກຄະລັດຖະທູດພ້ອມດ້ວຍຄະນະ ຍັງຈະໄດ້ໄປຢ້ຽມຢາມເຂດພື້ນທີ່ການກໍ່ສ້າງທ່າງຜ່ານປາຂຶ້້ນວາງໄຂ່ ຢູ່ເຂດອ່າງນໍ້າປາກປຶງ ບ້ານປາກປຶງ ເມືອງປາກຊັນ ທີ່ໄດ້ຮັບການຊ່ວຍເຫຼືອຈາກລັດຖະບານອົດສະຕຣາລີໃນການກໍ່ສ້າງ.