ເພື່ອກະກຽມໃຫ້ແກ່ກອງປະຊຸມໃຫ່ຍ 3 ຂັ້ນ ແລະ ການປົບປຸງການຈັດຕັ້ງ ໃນວັນທີ 14 ພຶດສະພາ 2018 ຢູ່ທີ່ຫ້ອງປະຊຸມຫ້ອງວ່າການປົກຄອງແຂວງ ຄະນະຈັດຕັ້ງແຂວງໄດ້ຈັດກອງປະຊຸມສ້າງແຜນກຳນົດພະນັກງານນຳພາ-ຄຸ້ມຄອງຂື້ນ ພານໃຕ້ການເປັນປະທານຂອງ ທ່ານ ແດນປີ ມູນທະດີ ຮອງເລຂາພັກແຂວງ ຫົວໜ້າຄະນະຈັດຕັ້ງແຂວງບໍລິຄຳໄຊ ມີຄະນະ, ຫົວໜ້າ-ຮອງຂະແໜງ ພ້ອມດ້ວຍພະນັກງານລັດຖະກອນພາຍໃນເຂົ້າຮ່ວມ.

       ໃນພິທີໄດ້ຮັບຟັງການການເຜີຍແຜ່ມະຕິຂອງກົມການເມືອງສູນກາງພັກ ສະບັບເລກທີ 030/ກມສພ, ລົງວັນທີ 3 ມັງກອນ 2018 ວ່າດ້ວຍມາດຖານຂອງພະນັກງານນຳພາ-ຄຸ້ມຄອງ ລວມມີ III ພາກ 16 ມາດຕາ ທີ່ມີເນື້ອໃນເວົ້າເຖິງການກຳນົດເນື້ອໃນມາດຖານລວມ, ມາດຖານສະເພາະຂອງຕຳແໜ່ງງານ ແລະ ກຸ່ມຕຳແໜ່ງພະນັກງານນຳພາ-ຄຸ້ມຄອງ ໃນທົ່ວລະບົບການເມືອງແຫ່ງ ສປປ ລາວ ເພື່ອເປັນພື້ນຖານເລື້ອກເຟັ້ນສ້າງແຜນກຳນົດ, ກໍ່ສ້າງ, ຕີລາຄາ, ສັບຊ້ອນ, ຈັດວາງ, ແຕ່ງຕັ້ງພະນັກງານເຂົ້າໃນຕຳແໜ່ງນຳພາ-ຄຸ້ມຄອງແຕ່ລະຂັ້ນ. ພ້ອມດຽວກັນຍັງໄດ້ຮັບຟັງການເຜີຍແຜ່ມະຕິຂອງກົມການເມືອງສູນກາງພັກ ສະບັບເລກທີ 032/ກມສພ, ລົງວັນທີ 3 ມັງກອນ 2018 ວ່າດ້ວຍວຽກງານສ້າງແຜນກຳນົດພະນັກງານນຳພາ-ຄຸ້ມຄອງ ທີ່ລວມມີ III ພາກ 13 ມາດຕາ ແລະ ດຳລັດຂອງລັດຖະບານ ສຳບັບເລກທີ 461/ລບ, ລົງວັນທີ 9 ຕຸລາ 2012 ວ່າດ້ວຍມາດຕະຖານຕຳແໜ່ງບໍລິຫານຂອງລັດຖະກອນ ແຫ່ງ ສປປ ລາວ.