ພິທີຈັດສົ່ງອັດຖິທະຫານອາສາສະໝັກ ແລະ ຊ່ຽວຊານຫວຽດນາມ ທີເສຍສະຫຼະ ຊີວິດໃນປາງສົງຄາມຢູ່ລາວ ຈຳນວນ 13 ອັດຖິ  ເພຶ່ອນຳສົ່ງໄປແຂວງຮ່າຕິ່ງ ສສ ຫວຽດນາມ ໄດ້ເດີນທາງອອກຈາກແຂວງບໍລິຄຳໄຊ ໃນເວລາ 7 ໂມງເຊົ້າ ຂອງວັນທີ 7 ພຶດສະພາ 2018 ຜ່ານມານີ້ ໃນທ່າມກາງບັນຍາກາດ ການໂບກມືອຳລາ ປະສານກັບທຸງຊາດລາວ ແລະ ທຸງຊາດຫຽດນາມ ໄດ້ປີວສະບັດຢູ່ເຕັມສອງຟາກຝັງຕາມເສັ້ນທາງໃນຕົວເມືອງປາກຊັນ ແລະ ຕາມທາງເລກທີ 13 ໃຕ້ ເຂົ້າສູ່ເສັ້ນທາງເລກ 8.

     ຂະບວນສົ່ງອັດຖິໄດ້ເດີນທາງຮອດເມືອງຄຳເກີດໃນເວລາ 11 ໂມງ ແລະ ໄດ້ຈັດພິທີໄຫ້ວອາໄລເຖິງດວງວິນຍານຂອງນັກຮົບປະຕິວັດຜູ້ກ້າຫານ ຢູ່ທີ່ກອງບັນຊາການທະຫານເມືອງຄຳເກີດ, ດ່ານສາກົນນໍ້າພາວ ເພື່ອໃຫ້ພະນັກງານ-ລັດຖະກອນ ທັງສອງຝ່າຍໄດ້ກາບໄຫວ້ບູຊາ. ຫຼັງຈາກນັ້ນຂະບວນສົ່ງອັດຖິກໍ່ໄດ້ເດີນທາງເຂົ່າສູ່ດິນແດນ ສສ ຫວຽດນາມ ຕາມສາຍທາງກໍ່ໄດ້ມີພະນັງງານ, ພໍ່ແມ່ປະຊາຊົນ ຕະຫຼອດຮອດນັກຮຽນ-ນັກສຶກສາ ເປັນຈໍານວນຫຼວງຫຼາຍ ມາຄອຍໂບກທຸງຊາດຫວຽດນາມເພຶ່ອຕ້ອນຮັບ ເມື່ອມາຮອດຕາແສງຈົງເຕີມ ກໍ່ໄດ້ຈັດພິທີໃຫ້ປະຊາຊົນເຂດດັ່ງກ່າວໄດ້ເຄົາລົບ ບູຊາອັດຖິດັ່ງກ່າວອີກຄັ້ງໜຶ່ງ ດ້ວຍບັນຍາກາດແຫ່ງຄວາມໂສກເສົ້າອາໄລອາວອນ ຈາກຍາດພີ່ນ້ອງຮ່ວມຊາດດ້ວຍກັນ.ຈາກນັ້ນໃນເວລາ 15 ໂມງ ກໍ່ໄດ້ເຄື່ອນອັດຖິເຂົ້າສູ່ສຸສານນັກຮົບນິລະນາມແຫ່ງຊາດ ເມືຶອງເຮືຶອງເຊີນ ແຂວງຮ່າຕິ່ງຢ່າງເປັນທາງການ. ໃນກາງຄືນຂອງວັນດຽວກັັນກໍ່ໄດ້ມີການສວດມົນ, ໄຕ້ທູບທຽນບູຊາ ຕາມພິທີທາງສາສະໜາຂອງຊາວຫວຽດນາມ ໂດຍມີຄະນະປະຕິບັດພິເສດແຂວງບໍລິຄຳໄຊ ນໍາໂດຍທ່ານ ແດນປີ ມູນທະດີ ຮອງເລຂາພັກແຂວງ ຫົວໜ້າຄະນະຈັດຕັ້ງແຂວງ ທັງເປັນຫົວໜ້າຄະນະປະຕິບັດງານພິເສດແຂວງບໍລິຄໍາໄຊ, ການນຳແຂວງຮ່າຕິ່ງ ແລະ ນະຄອນຫຼວງ ພ້ອມດ້ວຍມວນຊົນຊາວເມືອງເຮືອງເຊີນ ແຂວງຮ່າຕິ່ງ ເຂົ້າຮ່ວມ. ໃນຕອນເຊົ້າຂອງວັນທີ 8 ພຶດສະພາ 2018 ທາງການກໍ່ໄດ້ນຳເອົາອັດຖິເຂົ້າບັນຈຸໄວ້ສຸສານນັກຮົບວິລະນາມຢ່າງສົມກຽດ.