ໃນວັນທີ 10 ພຶດສະພາ 2018 ທີ່ຫ້ອງປະຊຸມສະພາປະຊາຊົນແຂວງບໍລິຄຳໄຊ ໄດ້ຈັດກອງປະຊຸມມອບ-ຮັບໃບຢັ້ງຢືນຂໍ້ແຂ່ງຂັນ 4 ບຸກ ຂອງຊາວໜຸ່ມຮາກຖານສະພາປະຊາຊົນແຂວງ ໂດຍການເປັນປະທານຂອງ ສະຫາຍ ນາງ ຕາທອງ ຄູນປະເສີດ ຮອງເລຂາຊາວໜຸ່ມຮາກຖານສະພາປະຊາຊົນແຂວງ, ໃຫ້ກຽດເຂົ້າຮ່ວມໂດຍ ສະຫາຍ ສົມສົດ ແສງອາພອນ ຮອງເລຂາໜ່ວຍພັກສະພາປະຊາຊົນແຂວງ ແລະ ສະຫາຍ ນາງ ຄຳໃບ ບໍລິວັນ ຮອງເລຂາຄະນະບໍລິຫານງານຊາວໜຸ່ມແຂວງ ມີບັນດາສະມາຊິກຊາວໜຸ່ມພາຍໃນ ແລະ ແຂກທີ່ຖືກເຊີນເຂົ້າຮ່ວມ.

       ໃນພິທີໄດ້ຮັບຟັງການຜ່ານບົດສະຫຼຸບການຈັດຕັ້ງປະຕິບັດ ຂໍ້ແຂ່ງຂັນ 4 ບຸກ ປະຈຳປີ 2017 ຂອງຊາວໜຸ່ມຮາກຖານສະພາປະຊາຊົນແຂວງ ໃນນັ້ນມີທັງດ້ານດີ ແລະ ຜົນງານທີ່ຍາດມາໄດ້ໃນໄລຍະຜ່ານມາ. ຫຼັງຈາກນັ້ນກໍ່ໄດ້ມີພິທີຜ່ານຂໍ້ຕົກລົງ ຂອງຄະນະບໍລິຫານງານຊາວໜຸ່ມແຂວງ ສະບັບເລກທີ່ 754/ຄຊໜ,ຂບຊ ລົງວັນທີ່ 25 ຕຸລາ 2017 ວ່າດ້ວຍການມອບໃບຢັ້ງຢືນ 4 ບຸກ ໃຫ້ແກ່ຊາວໜຸ່ມຮາກຖານສະພາປະຊາຊົນແຂວງ ໃຫ້ກຽດມອບໂດຍ ສະຫາຍ ນາງ ຄຳໃບ ບໍລິວັນ ແລະ ຮັບໂດຍ ສະຫາຍ ນາງ ຕາທອງ ຄູນປະເສີດ.

        ໃນຕອນທ້າຍສະຫາຍ ນາງ ຄຳໃບ ບໍລິວັນ ຮອງເລຂາຄະນະບໍລິຫານງານຊາວໜຸ່ມແຂວງ ຍັງໄດ້ໃຫ້ຄຳເຫັນໂອ້ລົມ ແລະ ເນັ້ນໃຫ້ສະມາຊິກຊາວໜຸ່ມພາຍໃນຮາກຖານສະພາປະຊາຊົນແຂວງຈົ່ງຕັ້ງໜ້າຜັນຂະຫຍາຍແນວທາງຂອງພັກ-ລັດ ເວົ້າລວມ, ເວົ້າສະເພາະ ກໍຄື ມະຕິ, ຄໍາສັ່ງ ຂອງຄະນະບໍລິຫານງານສູນກາງຊາວໜຸ່ມ, ສຶບຕໍ່ມູນເຊື້ອການຈັດຕັ້ງປະຕິບັດຂໍ້ແຂ່ງຂັນ 4 ບຸກ ໃຫ້ປະກົດຜົນ ແລະ ເປັນຮູບປະທຳຢ່າງແທ້ຈິງ.