ພິທີ​ມອບ​ໃບ​ຢັ້ງຢືນ​ໜ່ວຍ​ພັກ​ເຂັ້ມ​ແຂງ-​ຮູ້​ນຳພາຮອບດ້ານ ​ຄັ້ງ​ທີ່ 5 ປະຈຳປີ 2017 ​ໃຫ້​ໜ່ວຍ​ພັກ​ຮາກ​ຖານ​ສະພາ​ປະຊາຊົນ​ແຂວງ​ບໍລິ​ຄຳ​ໄຊ ​ໄດ້​ຈັດ​ຂື້ນ​ໃນ​ຕອນ​ເຊົ້າ​ຂອງ​ວັນ​ທີ 10 ພຶດສະພາ 2018 ຜ່ານມາ ທີ່​ຫ້ອງ​ປະຊຸມ​ສະພາ​ປະຊາຊົນ​ແຂວງ ​ ໂດຍເຂົ້າ​ຮ່ວມ​ຂອງ ​ສະຫາຍ ປອ ສຸວັນ​ນີ ​ໄຊຊະນະ ຮອງ​ເລຂາ​ພັກ​ແຂວງ, ປະທານ​ສະພາ​ປະຊາຊົນ​ແຂວງ ມີ​ສະມາຊິກ​ພັກ​ພາຍ​ໃນ​ໜ່ວຍ ແລະ ແຂກ​ຖືກ​ເຊີນ​ຈາກ​ໜ່ວຍ​ພັກ​ອ້ອມ​ຂ້າງ​ເຂົ້າ​ຮ່ວມ.

   ​ໃນ​ພິທີ​ ສະຫາຍ ລົມ ​ແພງ​ສຸກ ​ເລຂາ​ໜ່ວຍ​ພັກ​ຮາກ​ຖານສະພາ​ປະຊາຊົນ​ແຂວງ ​ໄດ້​ສະຫຼຸບ​ລາຍ​ງານ​ການ​ສ້າ​ງໜ່ວຍ​ພັກ​ເຂັ້ມ​ແຂງ-ຮູ້​ນຳພາ​ຮອບດ້ານ ບົນພື້ນຖານ 4 ເຂັ້ມແຂງ ແລະ 5 ເນື້ອໃນ ໃນ​ປີຜ່ານມາ ​ເຊິ່ງ​ໄດ້​ຍົກ​ໃຫ້​ເຫັນ​ເຖິງ​ດ້ານ​ດີ, ດ້ານ​ອ່ອນ, ຂໍ້ຄົງຄ້າງ ແລະ ບົດຮຽນ​ທີ່​ຖອດ​ຖອນ​ໄດ້ ຜ່ານການສະຫຼຸບຕີລາຄາໃນແຕ່ລະມາດຖານ ສາມາດປະຕິບັດໄດ້ 90 ກວ່າສ່ວນຮ້ອຍຂື້ນໄປ ພ້ອມດຽວກັນນັ້ນຍັງໄດ້ວາງແຜນການທິດທາງ ການສ້າງໜ່ວຍພັກເຂັ້ມແຂງ-ຮູ້ນຳພາຮອບດ້ານປີ 2018. ຈາກນັ້ນຍັງໄດ້ຜ່ານມະຕິຕົກລົງ ຂອງຄະນະປະຈຳພັກແຂວງ ເລກທີ 303/ຄປພ,ຂບຊ ລົງວັນທີ 15 ກຸມພາ 2018 ວ່າດ້ວຍການຮັບຮອງເອົາ ໜ່ວຍພັກຮາກ​ຖານ​ສະພາ​ປະຊາຊົນ ແຂວງບໍລິຄຳໄຊ ເປັນໜ່ວຍພັກເຂັ້ມແຂງ-ຮູ້ນຳພາຮອບດ້ານ ໃຫ້ກຽດມອບໂດຍ ສະຫາຍ ປອ ສຸວັນ​ນີ ​ໄຊຊະນະ ຮອງ​ເລຂາພັກແຂວງ ປະທານສະພາ​ປະຊາຊົນແຂວງ ຮັບໂດຍສະຫາຍ ລົມ ​ແພງ​ສຸກ ເລຂາໜ່ວຍພັກຮາກຖານ ສະພາ​ປະຊາຊົນ​ແຂວງ.

    ພ້ອມດຽວກັນນີ້ໃນຕອນທ້າຍຂອງພິທີ ສະຫາຍ ປອ ສຸວັນ​ນີ ​ໄຊຊະນະ ຍັງໄດ້ເນັ້ນໃຫ້ສະມາຊິກ​ທຸກ​ສະຫາຍ ຈົ່ງພ້ອມກັນເອົາໃຈໃສ່​ເສີດ​ຊູ​ຄວາມ​ເປັນ​ເຈົ້າ​ການ ຕໍ່ໜ້າ​ທີ່​ວຽກ​ງານ, ມີ​ທັດສະນະ​ຫຼັກ​ໝັ້ນ, ອຸ່ນ​ອຽນ​ທຸ່ນ​ທ່ຽງ, ມີ​ຄວາມ​ສາມັກຄີ​ພາຍ​ໃນ​ພັກ​ຢ່າງ​ໜັກ​ແໜ້ນ ​ແລະ ມີ​​ຄວາມ​ເປັນ​ແບບ​ຢ່າງ ​ໃນ​ການ​ປະຕິບັດ​ກົດ​ລະບຽບຂອງ​ພັກ ​ແລະ ກົດໝາຍ​ວາງ​ອອກ ​ຄວບ​ຄູ່​ກັບ​ການ​ຍົກ​ສະດັບ​ຄວາມ​ຮູ້​ຄວາມ​ສາມາດ, ວິຊາ​ສະ​ເພາະ​ຂອງ​ຕົນ ​ເພື່ອ​ຕອບ​ສະໜອງ​​ກັບ​ໜ້າ​ທີ່​ວຽກ​ງານ​ໃນ​ໄລຍະ​ໃໝ່ ​ແລະ ​ ​ຕ້ອງ​ສຶບຕໍ່​ຮັກສາ​ມູນ​ເຊື້ອ​ໜ່ວຍ​ພັກ​ເຂັ້ມ​ແຂງ-ຮູ້​ນຳພາ​ຮອບດ້ານ​ ນີ້​ໄວ້​ໃຫ້​ໝັ້ນຄົງ.