ເນື່ອງໃນໂອກາດທີ່ມາເຄື່ອນໄຫວເຮັດວຽກງານຢູ່ແຂວງບໍລິຄຳໄຊ ໃນວັນທີ 11 ພຶດສະພາ 2018  ຢູ່ທີ່ຫ້ອງປະຊຸມຫ້ອງວ່າການປົກຄອງແຂວງບໍລິຄຳໄຊ ທ່ານ ທອງລຸນ ສີສຸລິດ  ນາຍົກລັດຖະມົນຕີ  ໄດ້ໃຫ້ກຽດພົບປະໂອ້ລົມພະນັກງານການນຳ-ພະນັກງານຫຼັກແຫຼ່ງແຂວງບໍລິຄຳໄຊ.

     ທ່ານນາຍົກ ໄດ້ຮັບຟັງການລາຍງານຫຍໍ້ສະພາບການພັດທະນາເສດຖະກິດ-ສັງຄົມຂອງແຂວງບໍລິຄຳໄຊ ຈາກ ທ່ານ  ປອ ກອງແກ້ວ ໄຊສົງຄາມ ເຈົ້າແຂວງບໍລິຄໍາໄຊ ໃນໄລຍະທີ່ຜ່ານມາທາງຄະນະນຳຂອງແຂວງແຕ່ລະຂັ້ນ ໄດ້ເອົາໃຈໃສ່ຊີ້ນຳຫຼາຍວຽກງານທີ່ສຳຄັນ ເປັນຕົ້ນແມ່ນວຽກງານການເມືອງ-ແນວຄິດ, ວຽກງານພັດທະນາເສດຖະກິດ, ວຽກງານກໍ່ສ້າງຮາກຖານການເມືອງ-ແກ້ໄຂຄວາມທຸກຍາກ ແລະ ວຽກງານອື່ນໆ ຈົນສາມາດປະສົບຜົນສຳເລັດໃນຫຼາຍດ້ານ ເຊິ່ງມັນໄດ້ສະແດງອອກຄື: ທາງດ້ານການເມືອງສືບຕໍ່ມີສະຖຽນລະພາບຢ່າງໜັກແໜ້ນ, ສັງຄົມມີຄວາມເປັນລະບຽບຮຽບຮ້ອຍ, ເສດຖະກິດມີການຂະຫຍາຍຕົວຢ່າງຕໍ່ເນື່ອງ-ໝັ້ນທ່ຽງ ໃນປີ 2017 ເສດຖະກິດ​ຂອງ​ແຂວງ​ ຍັງສືບ​ຕໍ່​ມີ​ການ​ເຕີບ​ໂຕ​ຢ່າງ​ຕໍ່​ເນື່ອງ​ໃນ​ລະດັບ 8,03% (ແຜນ 7,8%), ລວມຍອດຜະລິດພັນພາຍໃນ (GDP) ບັນລຸ 5.041 ຕື້ກີບ (ແຜນ 5.022 ຕື້ກີບ) ສະເລ່ຍໃສ່ຫົວຄົນ​ໄດ້ 2.151 ​ໂດ​ລາ ເທົ່າກັບ 17,9 ລ້ານ​​ກີບ/ຄົນ/ປີ, ມີຍອດການລົງທຶນທັງໝົດ 1,718.54 ຕຶ້ກີບ, ການຈັດ​ຕັ້ງ​ປະຕິບັດ​ລາຍຮັບພູດ​ສູນ​ກາງ​ ແລະ ທ້ອງ​ຖີ່ນ ລື່ນແຜນ 36,09%, ຄອບຄົວທຸກຍາກຍັງເຫຼືອພຽງແຕ່ 2,76%. ນອກຈາກນັ້ນວຽກງານການແກ້ໄຂບັນຫາ 4 ເຖື່ອນ: ຄົນເຖື່ອນ, ລົດເຖື່ອນ, ອາວຸດເຖື່ອນ ແລະ ສິນຄ້າເຖື່ອນ ກໍ່ໄດ້ມີການຈັດຕັ້ງປະຕິບັດຢ່າງຈິງຈັງ ແລະ ຄຳສັ່ງ 15/ນຍ ກໍ່ໄດ້ຮັບການປະຕິບັດຢ່າງເຂັ້ມງວດ ພ້ອມດຽວກັນນັ້ນກໍ່ຍັງໄດ້ເອົາໃຈໃສ່ພັດທະນາ, ປັບປຸງຍົກລະດັບວຽກງານການພັດທະນາ ວັດທະນະທຳ-ສັງຄົມ ໃຫ້ດີຂື້ນເປັນກ້າວໆ.

     ໃນຕອນທ້າຍ ທ່ານນາຍົກລັດຖະມົນຕີ ໄດ້ສະແດງຄວາມຍ້ອງຍໍຊົມເຊີຍພ້ອມຕີລາສູງຕໍ່ຄະນະພັກແຂວງ ທີ່ໄດ້ເອົາໃຈໃສ່ ພ້ອມກັນພັດທະນາແຂວງບໍລິຄຳໄຊ ໃຫ້ມີໃບໜ້າໃໝ່ ແລະ ມີທ່າກ້າວຂະຫຍາຍຕົວຢ່າງຕໍ່ເນື່ອງ ພ້ອມດຽວກັນທ່ານຍັງເນັ້ນໃຫ້ຄະນະພັກທຸກຂັ້ນ ຈົ່ງພ້ອມກັນສືບຕໍ່ປະຕິບັດໜ້າທີ່ຂອງຕົນດ້ວຍຄວາມຮັບຜິດຊອບສູງ ເປັນຕົ້ນແມ່ນວຽກງານກໍ່ສ້າງຮາກຖານການເມືອງ ແລະ ແກ້ໄຂຄວາມທຸກຍາກ ຕິດພັນກັບວຽກງານສາມສ້າງ ໃຫ້ໄດ້ຮັບການຈັດຕັ້ງປະຕິບັດຢ່າງມີປະສິດທິພາບ, ຕິດແທດກັບປະຊາຊົນ ເພຶ່ອແນໃສ່ພັດທະນາຊີວິດການເປັນຢູ່ຂອງພໍ່ແມ່ປະຊາຊົນບັນດາເຜົ່າໃຫ້ດີຂື້ນເປັນລຳດັບ ແລະ ຫຼຸດພົ້ນອອກຈາກຄວາມທຸກຍາກ, ຫັນການເກັບລາຍຮັບເຂົ້າງົບປະມານຂອງລັດ ໄປສູ່ລະບົບທັນສະໄໝ ເພຶ່ອຮັບປະກັນຄວາມໂປ່ງໃສ ແລະ ອັດຊ່ອງວ່າງການຮົ່ວໄຫຼ, ເອົາໃຈໃສ່ຍົກລະດັບຂອງພັກນັກງານ-ລັດຖະກອນໃຫ້ມີຄຸນນະພາບ, ຕິດຕາມກວດກາ ແລະ ຕ້ານການສໍ້ລາດບັງຫຼວງໃຫ້ໄດ້ຢ່າງຂາດຕົວ, ສືບຕໍ່ດຶງດູດການລົງທຶນຂອງນັກລົງທຶນພາຍໃນ, ຕ່າງປະເທດໃຫ້ຫຼາຍຂື້ນ ແລະ ນຳໃຊ້ທ່າແຮງຂອງແຂວງທີ່ມີຢູ່ເຂົ້າໃນການພັດທະນາເສດຖະກິດສັງຄົມ ໃຫ້ມີທ່າກ້າວຂະຫຍາຍຕົວຢ່າງໝັ້ນຄົງ.