ເພື່ອກໍານົດກ່ຽວກັບຫຼັກການ, ລະບຽບການຂອງໜ່ວຍງານຊ່ວຍວຽກບ້ານ ຈາກໃນເມື່ອກ່ອນມີ 8 ຕໍາແໜ່ງງານ ປັດຈຸບັນໄດ້ຫັນປ່ຽນມາເປັນ 5 ໜ່ວຍງານ ຈຶ່ງຈັດຊຸດຝຶກອົມຮົບການສ້າງຄວາມເຂັ້ມແຂງໃຫ້ອົງການປົກຄອງຂັ້ນບ້ານ 2 ບ້ານ ຄື: ບ້ານປາກທວາຍ ແລະ ບ້ານນໍ້າໂລ້ ເມືອງທ່າພະບາດ ຂຶ້ນໃນວັນທີ 9 ພຶດສະພາ 2018 ຢູ່ຫ້ອງການບ້ານປາກທວາຍ ເມືອງທ່າພະບາດ ພາຍໃຕ້ການເປັນປະທານຂອງທ່ານ ບຸນສົງ ເພັດຈະເລີນ ກຳມະການພັກແຂວງ ເລຂາພັກເມືອງ ເຈົ້າເມືອງທ່າພະບາດ, ມີພະນັກງານກໍ່ສ້າງຮາກຖານ, ເລຂາພັກບ້ານນາຍບ້ານທັງ 2 ບ້ານ ພ້ອມດ້ວຍຫົວໜ້າໜ່ວຍງານທັງ 5 ໜ່ວຍ ແລະ ພາກສ່ວນທີ່ກ່ຽວຂ້ອງ ເຂົ້າຮ່ວມ.

         ຊຸດອົບຮົມໃນຄັ້ງນີ້ ຜູ້ເຂົ້າຮ່ວມ ໄດ້ຮັບຟັງການເຜີຍແຜ່ເຊື່ອມຊື່ມເອກະສານຕ່າງໆເປັນຕົ້ນເອກະສານເລກທີ່ 25/ ກມສພ, ເລກທີ່ 24/ນຍ, ເລກທີ່ 649/ພນ, ເຜີຍແຜ່ກົດໝາຍວ່າດ້ວຍການປົກຄອງທ້ອງຖິ່ນສະບັບປັບປຸງ 2015 ເຊີ່ງເປັນພື້ນຖານທາງດ້ານລະບຽບການ ແລະ ຄວາມຮູ້ກ່ຽວກັບການບໍລິຫານການປົກຄອງຂັ້ນບ້ານ, ຕອນທ້າຍ ທ່ານບຸນສົງ ເພັດຈະເລີນ ເຈົ້າເມືອງທ່າພະບາດ ໄດ້ເນັ້ນໜັກໃຫ້ອົງການຈັດຕັ້ງທຸກພາກສ່ວນ ຈົ່ງພ້ອມກັນເອົາໃຈໃສ່ຮ່ວມມືສົມທົບກັນ ເພື່ອແນ່ໃສ່ສ້າງອົງການປົກຄອງຂອງບ້ານໃຫ້ມີຄວາມເຂັ້ມແຂງຮອບດ້ານ, ປະ ຕິບັດຕາມແນວທາງອັນຖືກຕ້ອງຂອງພັກ- ລັດ ພ້ອມກັນສຶກສາອົບຮົມປຸກລະດົມຄວາມສາມັກຄີ, ປຸກລະດົມຈິດໃຈຄົນພາຍໃນຄອບຄົວຂອງບ້ານໃຫ້ກາຍເປັນຄົນທີ່ມີແນວຄິດໃໝ່ຫັນປ່ຽນຈາກແນວຄິດທີ່ຫຼ້າຫຼັງ ພ້ອມນຳເອົາບົດຮຽນໃໝ່ທີ່ດີເຂົ້າໃນການພັດທະນາຄອບຄົວ ແລະ ບ້ານ, ສ້າງແຜນພັດທະນາຂອງບ້ານໃຫ້ມີປະສິດທິພາບ ພ້ອມຮັກສາສິ່ງແວດລ້ອມຂອງບ້ານຢ່າງເປັນລະບົບ ເພື່ອແນ່ໃສ່ແກ້ໄຂຄວາມທຸກຢ່າງໃຫ້ກ້າວໄປສູ່ການສ້າງບ້ານທີ່ເຂັ້ມແຂງຮອບດ້ານຕາມທິດສາມສ້າງທີ່ວາງໄວ້.