ເພື່ອເປັນການກະກຽມຂໍ້ມູນໃຫ້ແກ່ຄະນະສະມາຊິກສະພາແຫ່ງຊາດປະຈຳເຂດເລືອກຕັ້ງ ເຂົ້າຮ່ວມກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດ ຊຸດທີ VIII, ໃນ​ວັນ​ທີ 9 ພຶດສະພາ 2018 ທ່ານ ປອ ສຸວັນ​ນີ ​ໄຊຊະນະ ຮອງເລຂາພັກແຂວງ ປະທານ​ສະພາ​ປະຊາຊົນ​ແຂວງ​ບໍລິ​ຄຳ​ໄຊ ພ້ອມດ້ວຍຄະນະ ແລະ ​ ພະ​ແນ​ກການ​ທີ່​ກ່ຽວ​ຂ້ອງຂອງ​ແຂວງ ​ໄດ້​ລົງ​ເຄື່ອນ​ໄຫວຕິດຕາມກວດກາກ່ຽວກັບການຂຸດຄົ້ນຫີນສົ່ງອອກນອກປະເທດ, ບັນຫາຕະຝັ່ງເຈື່ອນຕາມແຄມຂອງ ແລະ ໂຄງການປູກໝາກມ່ວງ ຢູ່ບ້ານນ້ຳເດື່ອ ເມືອງປາກກະດິງ.

    ການລົງເຄື່ອນໄຫວເຮັດວຽກໃນຄັ້ງນີ້ ທ່ານປະທານພ້ອມຄະນະ ໄດ້ຮັບຟັງການລາຍງານກ່ຽວກັບການ​ເກັບລາຍ​ຮັບຈາກ​ການ​ສົ່ງຫີນ​ກໍ່ສ້າງ​ອອກ​ໄປ​ປະ​ເທດ​ໄທ ຈາກທ່ານ ຄຳໂກ້ ເກັ່ງວົງພັນ ຄະນະດ່ານປະເພນີທ່າສະອາດ ວ່າ​ ຢູ່ເມືອງປາກກະດິງ ມີ​ແຫຼ່ງຂຸດຄົ້ນ​ຫີນ​ເພຶ່ອສົ່ງ​ອອກ​ 3 ​ຈຸດ​ ຄື: ຈຸດ​ທີ່​ 1 ຢູ່​ຜາ​ນາ​ລຽງ, ຈຸດ​ທີ່​ 2 ​ຢູ່ບ້ານ​ນາ​ພົງ ​ແລະ ຈຸດ​ທີ່​ 3 ​ຢູ່ບ້ານ​ນາບ​ວຍ ໂດຍມີສອງ​ບໍລິສັດທີ່ຮັບຜິດຊອບ ຄື: ບໍລິສັດ ​ໄຊ​ລັດຕະນະ​ຂຸດ​ຄົ້ນ​ບໍ່​ແຮ່​ຈຳກັດ ​ແລະ ບໍລິສັດ​ປາ​ລາ​ມີກະສິກຳການ​ຄ້າ ​ແລະ ​ຂົນ​ສົ່ງ​ຄົບ​ວົງ​ຈອນ​ຈຳກັດ ​​ເຊິ່ງສອງ​ບໍລິສັ​ດດັ່ງກ່າວ ແມ່ນ​ໄດ້​ຮັບ​ມອບ​ສິດ​ຈາກກຸ່ມ​ບໍລິສັດດວງ​ຈະ​ເລີ​ນພັດທະນາ​ກໍ່ສ້າງ​ຈຳກັດ ​ໃນ​ນັ້ນ ​ໄດ້​ມອບ​ໃຫ້​ບໍລິສັດ​ໄຊ​ລັດຕະນະ​ຂຸດ​ຄົ້ນ​ບໍ່​ແຮ່​ຈຳກັດ ສົ່ງ​ອອກ​ຈຳນວນ 5 ພັນ​ແມ້ດກ້ອນ, ສາມາດ​ສົ່ງ​ອອກ​ແລ້ວ 3 ພັນ​ກວ່າ​ແມ້ດກ້ອນ ​ແລະ ບໍລິສັດ​ປາ​ລາ​ມີ​ກະສິກຳ ການ​ຄ້າ ​ແລະ ຂົນ​ສົ່ງຄົບ​ວົງ​ຈອນຈຳກັດ ສົ່ງ​ອອກ​ຈຳນວນ 1​0 ພັນ​ແມ້ດກ້ອນ, ສາມາດ​ສົ່ງ​ອອກ​ແລ້ວ 2 ພັນ​ກວ່າ​ແມ້ດກ້ອນ, ມາ​ຮອດ​ປະຈຸບັນ ​ສາມາດ​ເກັບ​ລາຍ​ຮັບຈາກການເສຍພັນທະຄ່າທຳນຽມຕ່າງໆ​ ຂອງການ​ສົ່ງຫີນ​ກໍ່ສ້າງ​ອອກຈາກ​ສອງ​ບໍລິສັດ​ດັ່ງກ່າວ ​ລວມທັງ​ໝົດ 68 ລ້ານ​ກວ່າ​ກີບ, ໃນໂອກາດນີ້ ທ່ານ ປອ ສຸວັນນີ ໄຊຊະນະ ຍັງ​ໄດ້​ເນັ້ນ​ໃຫ້​ບໍລິສັດ​ທີ່​ກ່ຽວ​ຂ້ອງ ຈົ່ງພ້ອມ​ກັນ​ເອົາ​ໃຈ​ໃສ່​ປະຕິບັດ​​ຕາມ​ລະບຽບ​ກົດໝາຍກຳນົດໄວ້ ​ໂດຍ​ສະ​ເພາະ​ແມ່ນການ​ກຳ​ກົດຂະໜາດ, ບໍລິ​ມາດ​ຫີນ​ຂອງ​ການ​ສົ່ງ​ອອກ, ການ​ເສຍ​ພັນທະຄ່າ​ທຳນຽມ​ຕ່າງໆ​ ເພື່ອຈັດເກັບງົບປະມານເຂົ້າລັດ ແລະ ໄດ້​ເນັ້ນ​ໜັກໃຫ້​ບັນດາ​ພະ​ແນ​ກການ​ທີ່​ກ່ຽວຂ້ອງ ​ຈົ່ງ​ເອົາ​ໃຈ​ໃສ່​ຕິດຕາມ​ກວດກາໃນ​ການ​ຂຸດ​ຄົ້ນ ​ແລະ ການ​ສົ່ງ​ອອກ ຢ່າງ​ເປັນ​ປົກກະຕິ ທັງ​ນີ້​ກໍ່​ເພື່ອ​​ແນ​ໃສ່ຮັບປະກັນມີ​ຄວາມ​ຖືກຕ້ອງ​ ​ແລະ ສອດ​ຄ້ອງ​ຕາມ​ລະບຽບ​ກົດໝາຍ​ທີ່​ກຳນົດໄວ້.

     ຫຼັງຈາກນັ້ນ ທ່ານ ປອ ສຸວັນນີ ໄຊຊະນະ ພ້ອມດ້ວຍຄະນະ ກໍ່​ໄດ້ຂີ່​ເຮືອ​ກວດ​ກາເບິ່ງ​​​ບັນຫາຕະຝັ່ງເຈື່ອນຕາມແຄມແມ່ນ້ຳຂອງ ຕາມຄຳ​ສະ​ເໜີຂອງ​ພໍ່ແມ່ປະຊາຊົນ, ຈາກການໃຫ້​ຂໍ້​ມູນ​ຂອງ​ພະ​ແນ​ກ​ໂຍທາ​ທິການ ​ແລະ ຂົນ​ສົ່ງ​ແຂວງ ໃຫ້ຮູ້ວ່າ ສຳລັບ​ຈຸດ​ຫຼໍ່​ແຫຼມ​ທີ່​ມີ​ການ​ເຊາະ​ເຈື່ອນ​ຮ້າຍ​ແຮງ​ ​ຢູ່ເຂດ​ແຂວງ​ບໍລິ​ຄຳ​ໄຊ ​​ແມ່ນມີ 3 ​ເມືອງ​ ຄື: ​ເມືອງ​ປາກ​ກະດິງ​ມີ 5 ບ້ານ ລວມທັງ​ໝົດ 5.600 ​ແມ້ດ ​ໃນ​ນັ້ນມີ​ສອງ​ບ້ານ​ທີ່​ຮ້າຍ​ແຮງ​​ຄື: ບ້ານ​ທົ່ງ​ນ້ອຍ ​ແລະ ບ້ານ​ບຸ່ງ​ກວາງ; ​ເມືອງ​ປາກ​ຊັນ​ມີ 7 ບ້ານ, ລວມທັງ​ໝົດ 7.000 ​ແມ້ດ ​ໃນ​ນັ້ນ​ຮ້າຍແຮງ​ແມ່ນ​ມີ 3 ບ້ານ​ ຄື: ບ້ານ​ປາກຊັນ​ໃຕ້, ບ້ານ​ປາກ​​ປຶ​ງ ​ແລະ ບ້ານ​ແກ້ງ​ສະ​ດອກ; ​ເມືອງ​ທ່າ​ພະ​ບາດ​ມີ 4 ບ້ານ, ລວມທັງ​ໝົດ 2.500 ​ແມ້ດ ​ໃນ​ນັ້ນ​ຮ້າຍ​ແຮງ​ແມ່ນ​ເຂດ​ບ້ານ​ທ່າ​ໂພນ​ສັນ, ຕໍ່​ກັບ​ການ​ກວດກາ​ເບິ່ງ​ຕະຝັ່ງ​ເຈື່ອນ​ຄັ້ງ​ນີ້ ກໍ່​ເພື່ອ​ເປັນ​ການ​ເກັບ​ກຳ​ຂໍ້​ມູນ ​​ແລະ ​ນຳ​ເອົາ​ບັນຫາ​ດັ່ງກ່າວ ມາ​ປຶກສາ​ຫາລື​ກັບບັນດາພະ​ແນ​ກການ ​ແລະ ພາກສ່ວນ​ທີ່​ກ່ຽວຂ້ອງ ​​ເພື່ອ​ນຳ​ໄປສະ​ເໜີ​ເຂົ້າ​ແຜນ​ງົບປະມານ ​​ການ​ກໍ່ສ້າງປ້ອງ​ກັນ​ຕະຝັ່ງ​ເຈື່ອນ​ຢູ່​ຈຸດ​ທີ່​ຮ້າຍ​ແຮງດັ່ງກ່າວ, ພ້ອມ​ດຽວ​ກັນນັ້ນ ທ່ານ​ປະ​ທານ​ສະພາ​ປະຊາຊົນ​ແຂວງ​ ພ້ອມ​ຄະນະ ​ຍັງ​ໄດ້​ໄປ​ເບິ່ງສວນ​ໝາກມ່ວງ​ ຢູ່​ເຂດ​ບ້ານ​ນ້ຳ​ເດື່ອ ​ໂດຍ​ແມ່ນ​ບໍລິສັດ​ຊຽນຕາ​ລີ ​ເປັນ​ຜູ້​ສຳ​ປະທານ ​ເຊິ່ງມີ​ເນື້ອ​ທີ່​ທັງ​ໝົດ 1,700 ກ່ວາ​ເຮັກ​ຕ່າ ປະຈຸ​ບັນ​ປູກ​ແລ້ວ 1 ພັນ​ກ່ວາ​ເຮັກ​ຕ່າ ຕາມ​ການສະ​ເໜີ​ຂອງ​ປະຊາຊົນ​ແມ່ນ ​ໃນ​​ເຂດເນື້ອ​ທີ່​​ດັ່ງກ່າວ ​ໄດ້​ກວມ​ເອົາ​ດິນທຳການ​ຜະລິດ​ຂອງປະຊາຊົນ​ຈຳນວນ​ໜຶ່ງ.