ຕົ້ນ​ເດືອນ ມີນາ ປີ 2018 ນີ້, ກອງພັນ​ໃຫຍ່ 642 ​ໄດ້ເປີດກອງປະຊຸມ​ເຜີຍ​ແຜ່​ຜົນສຳ​ເລັດກອງ​ປະຊຸມ​ສະ​ໄໝ​ສາມັນ​ເທື່ອ​ທີ IV ຊຸດ​ທີ VIII ຂອງ​​ສະພາ​ແຫ່ງ​ຊາດ ​ແລະ ກອງ​ປະຊຸມ​ສະພາ​ປະຊາຊົນ​ແຂວງ​ບໍລິ​ຄຳ​ໄຊ​ເທື່ອ​ທີ I ຊຸດ​ທີ I ​ໂດຍ​ການ​ເປັນ​ປະທານ ​ແລະ ​ເຜີຍ​ແຜ່​ຂອງ​ທ່ານ ລົມ ແພງ​ສຸກ ສະມາຊິກ​ສະພາ​ແຫ່ງ​ຊາດ​ເຂດ​ເລືອກ​ຕັ້ງ​ທີ 11 ທັງ​ເປັນ​ເລຂາທິການສະມາຊິກ​ສະພາ​ປະຊາຊົນ​ແຂວງ​ບໍລິ​ຄຳ​ໄຊ, ​ເປັນ​ກຽດ​ເຂົ້າ​ຮ່ວມ​ຂອງ​ທ່ານ ພັ.ອ ​ແສງ​ມະນີ​ວອນ ຄຳ​ມະນີ ​ເລຂາຄະນະ​ພັກ ຫົວໜ້າ​ການ​ເມືອງ​ກອງພັນ​ໃຫຍ່ 642 ພ້ອມ​ດ້ວຍ​ຄະນະ​, ຕະຫຼອດຮອດ​ພະນັກງານ -ນັກຮົບ​ໃນ​ກົມ​ກອງ​ເຂົ້າ​ຮ່ວມ.

       

     ກອງປະຊຸມ ໄດ້ຮັບຟັງເນື້ອໃນຜົນສຳເລັດກອງປະຊຸມສະ​ໄໝ​ສາມັນ​ເທື່ອ​ທີ IV ຊຸດ​ທີ VIII ຂອງ​​ສະພາ​ແຫ່ງ​ຊາດ ​ແລະ ຜົນສຳເລັດກອງ​ປະຊຸມ​ສະພາ​ປະຊາຊົນ​ແຂວງ​ບໍລິ​ຄຳ​ໄຊ​ເທື່ອ​ທີ I ຊຸດ​ທີ I ​ຄື: ໄດ້​ຮັບຮອງ​ເອົາ​ບົດ​ລາຍ​ງານ​ແຜນ​ພັດທະນາ​ເສດຖະກິດ - ​ສັງຄົມ, ​ແຜນ​ງົບປະມານ​ແຫ່ງ​ລັດ​ໃນ​ສົກ​ປີ 2018, ຮັບຮອງ​ເອົາ​ແຜນການ​ປັບປຸງກົດໝາຍ​​ບາງສະບັບໃນປີ 2018 ​ແລະ ຮັບ​ເອົາ​ກົດໝາຍ​ໃໝ່ ຈຳນວນ 08 ສະບັບ, ກອງ​ປະຊຸມສະພາປະຊາຊົນແຂວງ ​ຍັງ​ໄດ້​ຮັບ​ຟັງ​ບົດ​ລາຍ​ງານ​ຈາກ​ອົງການຈັດຕັ້ງ​ຕ່າງໆ​ ເປັນ​ຕົ້ນ​ແມ່ນ: ບົດລາຍງານຂອງພະແນກກວດກາລັດແຂວງ ກ່ຽວກັບຜົນການກວດກາປີ 2017, ບົດລາຍງານຂອງອົງການ​ໄອ​ຍະ​ການ - ​ສານ​ປະຊາຊົນ​ແຂວງ ແລະ ພະແນກ​ຍຸຕິ​ທຳ ກ່ຽວກັບການດຳເນີນຄະດີຕາມຂະບວນການຍຸຕິທຳ.

        ​ໂອກາດ​ດັ່ງກ່າວ ທ່ານ​ ລົມ ​ແພງ​ສຸກ ຍັງ​ໄດ້​ຍົກ​ໃຫ້​ເຫັນ​ບັນດາ​ເນື້ອ​ໃນ​​ ທີ່​ປິ່ນ​ອ້ອມວຽກງານຂົງເຂດລັດບໍລິຫານ, ວຽກງານ ປກຊ - ປກສ ທີ່ກອງປະຊຸມຄັ້ງນີ້ ຈະໄດ້ນໍາໄປພິຈາລະນາແກ້ໄຂ, ທ່ານ​ຍັງ​ໄດ້​ນຳ​ເອົາ​ຄຳ​ສະ​ເໜີ, ຂໍ້​ຂັດຂ້ອງ​ໝອງ​ໃຈຈາກ​ພະນັກງານ - ນັກຮົບຢູ່​ກອງພັນ​ໃຫຍ່ 642 ຈຳນວນ​ໜື່ງ​ ໃນ​ນາມ​ເປັນ​ຕົວ​ແທນ​ສິດ ​ແລະ ຜົນ​ປະ​ໂຫຍ​ດຂອງ​ປະຊາຊົນ​ເພື່ອ​ນຳ​ໄປສະ​ເໜີ​ຄົ້ນ​ຄ້ວາພິຈາລະນາ ນຳອີກ.