ໃນວັນທີ 7-8 ມິນາ 2018 ຜ່ານມາ ທີ່ຫ້ອງການບ້ານນໍ້າກ້າງ ແລະ ບ້ານຈອມທອງ ເມືອງວຽງທອງ ແຂວງບໍລິຄຳໄຊ ໄດ້ມີພິທີຮັບຮອງຄອບຄົວສາມັກຄີປອງດອງຂື້ນ ໂດຍການເຂົ້າຮ່ວມຂອງທ່ານ ວົງສີ ທອງສີອິນທິປັນຍາ ເລຂາພັກເມືອງ, ເຈົ້າເມືອງວຽງທອງ, ມີບັນດາຄະນະປະຈຳພັກເມືອງ, ປະທານແນວລາວສ້າງຊາດເມືອງ, ປະທານແນວລາວສ້າງຊາດບ້ານ,  ເລຂາພັກບ້ານ-ນາຍບ້ານ, ຄະນະກຳມະການປະເມີນສ້າງຄອບຄົວສາມັກຄີປອງດອງ ພ້ອມດ້ວຍພໍ່, ແມ່ປະຊາຊົນພາຍໃນບ້ານເຂົ້າຮ່ວມ.

       ບ້ານນໍ້າກ້າງ ມີ 128 ຄອບຄົວ, ມີພົນລະເມືອງທັງໝົດ702ຄົນ, ຍິງ335ຄົນ, ມີ 1 ຊົນເຜົ່າ ຄື:ຊົນເຜົ່າກວນ, ບ້ານໃຫ່ຍຈອມທອງມີ 383 ຄອບຄົວ, ມີພົນລະເມືອງທັງໝົດ 2,459 ຄົນ, ຍີງ 1,189 ຄົນ, ມີ 3 ຊົນເຜົ່າ ຄື: ເຜົ່າລາວລຸ່ມ, ເຜົ່າມົ້ງ ແລະ ເຜົ່າລາວເທີງ, ໄລຍະຜ່ານມາ ທາງຄະນະພັກບ້ານ, ແນວລາວສ້າງຊາດບ້ານ ໄດ້ເອົາໃຈໃສ່ສຶກສາອົບຮົມການເມືອງແນວຄິດ ໃຫ້ແກ່ປະຊາຊົນພາຍໃນບ້ານ, ໃຫ້ຮັບຮູ້ ແລະ ເຫັນພ້ອມກັບແນວທາງນະໂຍບາຍຂອງພັກ ເຄົາລົບລະບຽບກົດໝາຍຂອງລັດ ຮູ້ເຕົ້າໂຮມຄວາມສາມັກຄີພາຍໃນ ພາຍນອກ ແລະ ຮູ້ພັດທະນາເສດຖະກິດຄອບຄົວໃຫ້ນັບມື້ດີຂື້ນເປັນກ້າວໆ. ດັ່ງນັ້ນ ຜ່ານການປະເມີນຜົນຈຳນວນຄອບຄົວພາຍໃນບ້ານ ທີ່ໄດ້ມາດຖານຂອງການສ້າງຄອບຄົວສາມັກຄີ ເປັນຕົ້ນກໍ່ແມ່ນມາດຖານ ທຸກຄົນໃນຄອບຄົວຕ້ອງມີຄວາມສາມັກຄີ, ເປັນຄອບຄົວທີເຂົ້າຮ່ວມກິດຈະກຳລວມຂອງບ້ານ ນັບຖືລະບຽບຂອງບ້ານ, ເປັນຄອບຄົວອະນຸລັກວັດທະນະທຳຂອງເຜົ່າ ແລະ ເປັນຄອບຄົວທີ່ດຳລົງຊິວິດປອດໃສຂາວສະອາດ ເຊິ່ງສາມາດປະເມີນໄດ້ 85% ຂື້ນໄປມີ 100 ຄອບຄົວ, ສະນັ້ນ ຄະນະພັກເມືອງວຽງທອງ ຈື່ງຕົງລົງມອບໃບຢັ້ງຢືນຄອບຄົວປອງດອງສາມັກຄີໃຫ້ ໄວ້ເປັນຫລັກຖານ ໃຫ້ສັງຄົມໄດ້ຮັບຮູ້ ແລະ ເອົາເປັນແບບຢ່າງຕໍ່ໄປ.