ໃນວັນທີ 12 ມີນາ 2018 ຢູ່ທີ່ຫ້ອງປະຊຸມພະແນກ ຖວທ ແຂວງບໍລິຄຳໄຊ ໄດ້ດຳເນີນກອງປະຊຸມປຶກສາຫາລື ເພື່ອເປັນການກະກຽມຈັດງານປະກວດນາງສາວງາມບັນດາເຜົ່າ ແລະ ນັກຮ້ອງສຽງດີທົ່ວແຂວງຂື້ນ ໂດຍການເປັນປະທານຂອງທ່ານ ບຸນມາ ບຸຈະເລີນ ຮອງເຈົ້າແຂວງບໍລິຄຳໄຊ ຜູ້່ຊີ້ນຳຂົງເຂດວັດທະນະທຳ-ສັງຄົມ ມີບັນດາອະນຸກຳມະການ, ຄະນະຮັບຜິດຊອບຈັດງານຂັ້ນແຂວງເຂົ້າຮ່ວມ.

      ໃນກອງປະຊຸມໄດ້ຮັບຟັງການລາຍງານຄວາມຄືບໜ້າ ໃນການຫ້າງຫາກະກຽມ ແລະ ຕົກລົງແຕ່ງຕັ້ງ ບັນດາອະນຸກຳມະການກໍ່ໄດ້ມີການຈັດຕັ້ງປະຕິບັດໜ້າວຽກຂອງຕົນຢ່າງເອົາໃຈໃສ່ ເຮັດໃຫ້ຫຼາຍວຽກງານໄດ້ຮັບຜົນສຳເລັດເປັນຢ່າງດີ ເປັນຕົ້ນແມ່ນໄດ້ສຳເລັດການຮ່າງເອກະສານ, ເນື້ອໃນ, ວາງແຜນດຳເນີນງານໃນຂັ້ນພື້ນຖານ ແລະ ປະກາດຮັບສະໝັກນາງສາວ ແລະ ນັກຮ້ອງສຽງດີເຂົ້າຮ່ວມງານປະກວດ, ໄດ້ແຈ້ງຂ່າວອອກທາງວິທະຍຸ, ໜັງສືພີມ ແລະ ເວັບໄຊ ຂອງແຂວງ, ຫຼັງຈາກນັ້ນບັນດາອະນຸກຳມະການ ກໍ່ຍັງໄດ້ປະກອບຄຳຄິດຄຳເຫັນໃສ່ບາງ ວຽການທີ່ສຳຄັນເຊັ່ນ: ວຽກງານຕະຫຼາດນັດຂາຍສິນຄ້າ, ວຽກງານເສດຖະກິດໃນການຄາດຄະເນລາຍຮັບ-ລາຍຈ່າຍ, ເນື້ອໃນມາດຖານການໃຫ້ຄະແນນ, ວາລະດຳເນີນການສະແດງ ແລະ ວຽກງານອື່ນໆອີກຈຳນວນໜຶ່ງ.

    ງານປະກວດນາງສາວອາພອນເພດຊົນເຜົ່າ ແລະ ປະກວດນັກຮ້ອງສຽງດີ ທີ່ແຂວງບໍລິຄຳໄຊ ຈະໄດ້ຈັດຂື້ນແຕ່ວັນທີ 28-30 ມີນາ 2018 ທີ່ໃກ້ຈະມາເຖິງນີ້ ຢູ່ທີ່ເດີນກິລາຄົບວົງຈອນຂອງແຂວງ ພ້ອມທັງ ລາຍການສະແດງປະກອບສ້າງສີສັນໃຫ້ແກ່ງານດັ່ງກ່າວຈະໄດ້ມີການສະແດງຂອງກອງລະຄອນຕຸກກະຕາຂອງສູນກາງ ແລະ ງານຕະຫຼາດນັດຂາຍສິນຄ້າຕື່ມອີກ.