ໃນວັນທີ 07 ມີນາ 2018 ທ່ານ ປອ ກອງແກ້ວ ໄຊສົງຄາມ ເຈົ້າແຂວງບໍລິຄຳໄຊ ພ້ອມດ້ວຍຄະນະຮັບຜິດຊອບຊົດເຊີຍຜົນກະທົບ ຈາກໂຄງການເຂື່ອນໄຟຟ້ານໍ້າຕົກນໍ້າເທີນ 1 ໄດ້ລົງພົບປະພໍ່ແມ່ປະຊາຊົນບ້ານຫ້ວຍຫອຍ ເມືອງວຽງທອງ ໂດຍການນຳພາທາງຂອງ ທ່ານ ວົງສີ ທອງສີອິນທິປັນຍາ ເຈົ້າເມືອງວຽງທອງ.

    ທ່ານ ແກ້ວວົງເດືອນ ພັນທະນຸສີ ຄະນະຮັບຜິດຊອບຊົດເຊີຍຜົນກະທົບ ຈາກໂຄງການເຂື່ອນໄຟຟ້ານໍ້າຕົກນໍ້າເທີນ 1 ໄດ້ລາຍງານຄວາມຄືບໜ້າ ການຍົກຍ້າຍຈັດສັນປະຊາຊົນປະຊາຊົນທີ່ຖືກຜົນກະທົບຈາກໂຄງການ ໃນນັ້ນມີ 7 ບ້ານ, 624 ຄອບຄົວ ແມ່ນຈະໄດ້ຍົກຍ້າຍມາຢູ່ບ້ານຫ້ວຍຫອຍ ປະຈຸບັນທາງໂຄງການໄດ້ສຳເລັດການສຳຫຼວດ, ອອກແບບຈັດສັນເນື້ອທີ່ດິນສຳລັບປຸກສ້າງເຮືອນ, ດິນສຳລັບການຜະລິດກະສິກຳ, ດິນສຳລັບປຸກສ້າງອາຄານໂຮງຮຽນ, ຕະຫຼາດ ແລະ ຄິວລົດໂດຍສານ ໃນນັ້ນເນື້ອທີ່ດິນຈັດສັນຈຳນວນໜຶ່ງແມ່ນມີຜົນກະທົບໂດຍກົງ ຕໍ່ເນື້ອທີ່ທຳການຜະລິດຂອງປະຊາຊົນ ແລະ ທາງໂຄງການຈະໄດ້ຈັດສັນທົດແທນເນື້ອທີ່ທຳການຜະລິດ ຂອງປະຊາຊົນບ້ານຫ້ວຍຫອຍທີ່ຖືກຜົນກະທົບໃຫ້ ໄປຢູ່ຮ່ວມກັບເຂດຈັດສັນການຜະລິດ ທີ່ປະຊາຊົນຍົກຍ້າຍມາຈາກບ້ານຕ່າງໆໃນເນື້ອທີ່ 800 ກວ່າເຮັກຕ່າ ດ້ວຍຄວາມເໝາະສົມ. ພ້ອມນັ້ນທ່ານເຈົ້າແຂວງພ້ອມດ້ວຍຄະນະ ຍັງໄດ້ຮັບຟັງການສະເໜີ ແລະ ຕອບຂໍ້ຂ້ອງໃຈຂອງພໍ່ແມ່ປະຊາຊົນຕື່ມອີກ ໂອກາດນີ້ ທ່ານ ປອ ກອງແກ້ວ ໄຊສົງຄາມ ໄດ້ສະແດງຄວາມຍ້ອງຍໍຊົມເຊີຍພໍ່ແມ່ປະຊາຊົນ ທີ່ໄດ້ໃຫ້ຄວາມຮ່ວມມືເປັນຢ່າງດີ ຮັບຮູ້ເຂົ້າໃຈຕໍ່ແນວທາງຂອງພັກ ແຜນພັດທະນາເສດຖະກິດ-ສັງຄົມແຫ່ງຊາດ ກໍ່ຄືການພັດທະນາແຂວງບໍລິຄຳໄຊ, ເຫັນໄດ້ຄວາມສຳຄັນໂຄງການດັ່ງກ່າວນີ້ ທີ່ຈະເປັນທ່າແຮງອັນໃຫຍ່ຫຼວງຕໍ່ການດຳລົງຊີວິດຂອງປະຊາຊົນໂດຍກົງ ສ້າງໃຫ້ປະຊາຊົນມີອາຊີບທຳມາຫາກິນ ແລະ ມີລາຍຮັບທີ່ໝັ້ນຄົງ ເຮັດໃຫ້ທຸກຄອບຄົວຫຼຸດພົ້ນອອກຈາກຄວາມທຸກຍາກ. ພ້ອມທັງຮຽກຮ້ອງໃຫ້ພໍ່ແມ່ປະຊາຊົນ ຈົ່ງໄດ້ເອົາໃຈໃສ່ປົກປັກຮັກສາຊັບພະຍາກອນທຳມະຊາດ, ເຕົ້າໂຮມຄວາມສາມັກຄີປອງດອງເຊິ່ງກັນ ແລະ ກັນໃຫ້ແໜ້ນແຟ້ນ, ຮັກສາມູນເຊື້ອຮີດຄອງປະເພນີອັນດີງາມໃຫ້ໝັ້ນຄົງຕະຫຼອດໄປ, ເຊື້ອໝັ້ນຕໍ່ການນຳພາຂອງພັກ, ການຈັດຕັ້ງທຸກຂັ້ນ ສືບຕໍ່ທຳການຜະລິດໃຫ້ກາຍເປັນສິນຄ້າ ຕາມເຕັກນິກທີ່ທັນສະໄໝ.

   ໃນໂອກາດທີ່ລົງມາເຄື່ອນໄຫວເຮັດວຽກຢູ່ເມືອງວຽງທອງ ທ່ານ ປອ ກອງແກ້ວ ໄຊສົງຄາມ ເຈົ້າແຂວງ ພ້ອມດ້ວຍຄະນະ ຍັງໄດ້ລົງຢ້ຽມຢາມຊຸກຍູ້ການຜະລິດຂອງຊາວກະສິກອນເມືອງວຽງທອງ ເປັນຕົ້ນແມ່ນໄດ້ລົງເບີ່ງການຜະລິດທົດລອງປູກຜັກທຽມຫົວຢູ່ບ້ານນໍ້າກ້າງ ຂອງຫ້ອງການກະສິກຳ ແລະ ປ່າໄມ້ເມືອງ ແລະ ສວນປູກຜັກປອດສານພິດຂອງປະຊາຊົນບ້ານນໍ້າຢ້າງຕື່ມອີກ.