ການເຄື່ອນຍ້າຍໄປ-ມາ ແລະ ການຕັ້ງເຮືອນຕາມລໍາພັງໃຈ ແບບບໍ່ຖືກຕ້ອງຂອງປະຊາຊົນຈໍານວນໜຶ່ງ( ເອີ້ນວ່າສະນຳ ) ໂດຍສະເພາະແມ່ນການຕັ້ງສະນໍາຢູ່ບາງຈຸດທີ່ຢູ່ຫ່າງໄກສອກຫຼີກ ໄດ້ສ້າງຄວາມສັບສົນໃຫ້ແກ່ອໍານາດການປົກຄອງທ້ອງຖິ່ນ ແລະ ເພື່ອເປັນການແກ້ໄຂບັນຫາດັ່ງກ່າວ ໃນວັນທີ 9 ມີນາ 2018 ຢູ່ທີ່ຫ້ອງປະຊຸມຫ້ອງວ່າການປົກຄອງແຂວງບໍລິຄຳໄຊ ໄດ້ດຳເນີນກອງປະຊຸມວິທະຍາສາດແກ້ໄຂການຕັ້ງສະນຳ ພາຍໃຕ້ການເປັນປະທານຂອງ ທ່ານ ປອ ກອງແກ້ວ ໄຊສົງຄາມ ກຳມະການສູນກາງພັກ, ເລຂາພັກແຂວງ, ເຈົ້າແຂວງບໍລິຄຳໄຊ ມີຜູ້ຕາງໜ້າກະຊວງ ປກສ-ປກຊ, ກະຊວງພາຍໃນ ພ້ອມດ້ວຍຄະນະຮັບຜິດຊອບແກ້ໄຂການຕັ້ງສະນຳຂັ້ນແຂວງ ແລະ ຂັ້ນເມືອງເຂົ້າຮ່ວມ.

      ໃນພິທີ ທ່ານ ແດນປີ ມູນທະດີ ຮອງເລຂາພັກແຂວງ, ຫົວໜ້າຄະນະຈັດຕັ້ງແຂວງ ໄດ້ຜ່ານຮ່າງການແກ້ໄຂການຕັ້ງສະນຳຂອງປະຊາຊົນຢູ່ແຂວງບໍລິຄໍາໄຊ ວ່າ ວຽກງານດັ່ງກ່າວເປັນວຽກງານໜຶ່ງທີ່ສຳຄັນ ທ້າທາຍຕໍ່ກັບການປະຕິບັດແນວທາງນະໂຍບາຍຂອງພັກ-ລັດ ເຊິງໃນໄລຍະຜ່ານມາທາງຄະນະກຳມະການຂັ້ນແຂວງ, ຂັ້ນເມືອງ ກໍ່ໄດ້ສຸມໃສ່ຫຼາຍວຽກງານທີ່ຈຳເປັນ ເປັນຕົ້ນແມ່ນການຈັດກອງປະຊຸມປຶກສາຫາລື, ວາງແຜນທິດທາງການແກ້ໄຂ, ລົງເກັບກຳຂໍ້ມູນ ແລະ ບັນຫາຕ່າງໆ, ລົງພົບປະກັບອຳນາດການປົກຄອງບ້ານໃນບໍລິເວນຈຸດສະນຳ ແລະ ໄດ້ດຳເນີນວຽກງານອື່ນໆທີ່ຈຳເປັນ  ເພື່ອນຳມາສັງລວມວິເຄາະວິໄຈ. ຜ່ານການເຄື່ອນໄຫວເກັບກຳຂໍ້ມູນ ແຕ່ເດືອນຕຸລາ 2015 ເປັນຕົ້ນມາ ທົ່ວແຂວງມີປະຊາຊົນໄປຕັ້ງສະນຳຢູ່ 5 ເມືອງ ຄື: ເມືອງປາກກະດິງ, ບໍລິຄັນ, ວຽງທອງ, ຄໍາເກີດ ແລະ ເມືອງໄຊຈໍາພອນ ລວມທັງໝົດມີ 19 ເຂດ, 123 ຈຸດ ມີຄອບຄົວທັງໝົດ 836 ຄອບຄົວ, ມີ 3,777 ຄົນ ຍິງ 1,778 ຄົນ ປັດຈຸບັນສາມາດກແກ້ໄຂສໍາເລັດແລ້ວ 8 ເຂດ 20 ຈຸດ ຍັງເຫຼືອ 11 ເຂດ 103 ຈຸດ ໃນນັ້ນເມືອງປາກກະດິງມີ 8 ເຂດ 20 ຈຸດ ສໍາເລັດການເກັບຂໍ້ມູນ ແຕ່ຍັງບໍ່ທັນໄດ້ລົງກວດກາແກ້ໄຂ, ເມືອງບໍລິຄັນ ແກ້ໄຂສໍາເລັດ 11 ຈຸດ ຍັງເຫຼືອ 11 ຈຸດກໍາລັງແກ້ໄຂ, ເມືອງຄໍາເກີດ ແກ້ໄຂສໍາເລັດແລ້ວ 2 ຈຸດ ຍັງເຫຼືອ 15 ຈຸດກໍາລັງແກ້ໄຂ, ເມືອງວຽງທອງ ແກ້ໄຂສໍາເລັດຂາດຕົວ 3 ຈຸດ ຍັງເຫຼືອ 5 ຈຸດ ແລະ ເມືອງໄຊຈໍາພອນ ໄດ້ລົງເຄື່ອນໄຫວສຶກສາອົບຮົມໄດ້ແລ້ວ 2 ເຂດ 4 ຈຸດ ຍັງ 3 ເຂດ 49 ຈຸດ.