ໃນວັນທີ່ 28 ກຸມພາ 2018 ນີ້ ຢູ່ສະໂມສອນກຸ່ມບ້ານ ທົ່ງພັນຄໍາ ເມືອງບໍລິຄັນ ໄດ້ຈັດພີທີປະກາດຮັບຮອງເອົາບ້ານ ທົ່ງພັນຄໍາ ແລະ ບ້ານໂພນມີໄຊ ເປັນບ້ານວັດທະນະທໍາຂອງເມືອງຂື້ນຢ່າງເປັນທາງການ ໃຫ້ກຽດເຂົ້າຮ່ວມພິທີຂອງທ່ານ ລໍາສະໄໝ ວໍລະສານ ຄະນະປະຈໍາພັກແຂວງ ປະທານແນວລາວສ້າງຊາດແຂວງບໍລິຄໍາໄຊ, ທ່ານ ນາງສີດາ ພັນທະລາ ຄະນະປະຈໍາພັກເມືອງ ຮອງເຈົ້າເມືອງບໍລິຄັນ, ທ່ານ ສົນທອງ ວີບູນກ້ວາງ ຄະນະພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວແຂວງ, ມີອໍານາດການປົກຄອງບ້ານພ້ອມດ້ວຍແຂກຖືກເຊີນຈາກພາກສ່ວນທີ່ກ່ຽວຂ້ອງຂັ້ນແຂວງ, ຂັ້ນເມືອງ ຕະຫຼອດຮອດພໍ່ແມ່ປະຊາຊົນບັນດາເຜົ່າເຂົ້າຮ່ວມ.

        ບ້ານ ທົ່ງພັນຄໍາ ແລະ ບ້ານ ໂພນມີໄຊ ເປັນກຸ່ມບ້ານພັດທະນາທີ່ນອນຢູ່ໃນ 6 ກຸ່ມບ້ານຂອງເມືອງ, ຕັ້ງຫ່າງຈາກເທດສະບານເມືອງປະມານ 26 ກີໂລແມັດ, ມີເນື້ອທີ່ທັງໜົດ 8,927.63 ເຮັກຕ່າ, ປະກອບມີ 417 ຄອບຄົວ, ມີພົນລະເມືອງ 2407 ຄົນ, ຍີງ 1.175 ຄົນ, ມີ 3 ຊົນເຜົ່າຢູ່ຮ່ວມກັນ. ໄລຍະຜ່ານມາ ປະຊາຊົນພາຍໃນບ້ານ ແມ່ນເຊື່ອໝັ້ນຕໍ່ການນຳພາຂອງພັກ, ເຄົາລົບລະບຽບກົດໝາຍຂອງລັດ, ມີຄວາມຕື່ນຕົວປະກອບສ່ວນເຂົ້າໃນການຈັດຕັ້ງປະຕິບັດແຜນພັດທະນາເສດທະກິດສັງຄົມຂອງບ້ານ, ເປັນເຈົ້າການໃນການສ້າງສາພັດທະນາແກ້ໄຂຊີວິດການເປັນຢູ່ດີຂື້ນ, ຄວາມທຸກຢາກໄດ້ຮັບການແກ້ໄຂ, ມີຄອບຄົວຕົວແບບໃນການປູກຝັງ ແລະ ລ້ຽງສັດ ກາຍເປັນຄອບຄົວພັດທະນາຫຼາຍຂື້ນ, ປະຊາຊົນມີຄວາມອູ່ນອຽງທຸ່ນທ່ຽງເຊື່ອໜັ້ນຕໍ່ການນໍາພາຂອງການຈັດຕັ້ງບ້ານ, ມີຄວາມສາມັກຄີເປັນປືກແຜ່ນແໜ້ນໜາຮັກແພງຊ່ວຍເຫຼືອເຊີ່ງກັນ ແລະ ກັນ ຕີດພັນກັບການສ້າງບ້ານເປັນຫົວໜ່ວຍພັດທະນາ.

     ທ່ານ ລໍາສະໄໝ ວໍລະສານ ປະທານແນວລາວສ້າງຊາດແຂວງບໍລິຄໍາໄຊ ໄດ້ສະແດງຄວາມຍ້ອງຍໍຊົຍເຊີຍຕໍ່ຜົນງານແລະ ໄຊຊະນະຂອງບັນດາອໍານາດການປົກຄອງບ້ານ ແລະ ພໍ່ແມ່ປະຊາຊົນບັນດາເຜົ່າທີ່ຍາດມາໄດ້ຫຼາຍດ້ານໃນໄລຍະຜ່ານມາ ຈົນສາມາດຮັບຮອງເອົາບ້ານດັ່ງກ່າວເປັນບ້ານວັດທະນະທໍາ, ທ່ານ ຍັງໄດ້ຮຽກຮ້ອງມາຍັງອໍານາດການປົກຄອງບ້ານ ແລະ ພໍ່ແມ່ປະຊາຊົນວ່າ ຈົ່ງເອົາໃຈໃສປະຕີບັດຕາມ 4 ເນື້ອໃນ 4 ຄາດໜາຍ, ແຜນພັດທະນາເສດຖະກີດ-ສັງຄົມຂອງແຂວງ, ເມືອງວາງອອກໃຫ້ສອດຄ່ອງກັບສະພາບຄວາມເປັນຈີງຂອງທ້ອງຖີ່ນ, ຮັກສາຄາມສາມັກຄີເປັນປືກແຜ່ນແໜ້ນໜາ ສືບຕໍ່ວຽກງານປ້ອງກັນຊາດ-ປ້ອງກັນຄວາມສະຫງົບເຮັດໃຫ້ຂອບເຂດຂອງຕົນຮັບຜິດຊອບມີຄວາມສະຫງົບປອດໄພຂື້ນເປັນກ້າວໆ. ຈາກນັ້ນ ບັນດາການນໍາພັກລັດຂັ້ນແຂວງ, ຂັ້ນເມືອງ ແລະ ພໍ່ແມ່ປະຊາຊົນບັນດາເຜົ່າໄດ້ເຂົ້າຮ່ວມພິທີຕັດແຖບຜ້າ ເປີດປ້າຍ ແລະ ລັ່ນຄ້ອງ 9 ບາດເພື່ອເປັນສິຣິມຸງຄຸນ ແລະ ຍັ້ງຢືນວ່າ ບ້ານ ໂພນມີໄຊ ແລະ ບ້ານທົ່ງພັນຄໍາ ເມືອງບໍລິຄັນ ໄດ້ຮັບຮອງເປັນບ້ານວັດທະນະທໍາແລ້ວ.