ລະຫວ່າງວັນທີ 06 - 07 ມີນາ 2018 ນີ້ ກອງບັນຊາການ ປກສ ແຂວງ ບໍລິຄໍາໄຊ ໄດ້ເປີດກອງປະຊຸມວຽກງານພັກ-ວຽກງານການເມືອງ ຄັ້ງທີ I ທົ່ວກໍາລັງປ້ອງກັນຄວາມສະຫງົບແຂວງຂື້ນຢ່າງເປັນທາງການ ໂດຍການເປັນປະທານຂອງສະຫາຍ ພັນເອກ ທອງໃບ ລໍວັນໄຊ ກຳມະການພັກແຂວງ ເລຂາອົງຄະນະພັກ ຫົວໜ້າກອງບັນຊາການ ປກສ ແຂວງບໍລິຄໍາໄຊ, ໃຫ້ກຽດເຂົ້າຮ່ວມຂອງສະຫາຍ ພົນຈັດຕະວາ ອາລູ ວາລີຊື ຄະນະພັກກະຊວງ, ຫົວໜ້າກົມໃຫ່ຍການເມືອງກະຊວງປ້ອງກັນຄວາມສະຫງົບ, ມີຄະນະຕິດຕາມກວດກາຊຸກຍູ້ກອງປະຊຸມວຽກງານພັກ-ວຽກງານການເມືອງຂັ້ນແຂວງ, ມີຄະນະພັກ-ຄະນະກອງບັນຊາການ ປກສ ແຂວງ, ຄະນະຫ້ອງ, ກອງ,  ໂຮງຮຽນ ປກສ ຊັ້ນຕົ້ນ ເລກ 04 , ຄ້າຍຄຸມຂັງ-ດັດສ້າງ, ຫົວໜ້າກອງບັນຊາການ ປກສ 7 ຕົວເມືອງ, ຕະຫຼອດຮອດພະນັກງານຫຼັກແຫຼ່ງທົ່ວກອງບັນຊາການ ປກສ ແຂວງ ເຂົ້າຮ່ວມ.

         

        ກອງປະຊຸມໄດ້ຜ່ານບົດສະຫຼຸບວຽກງານພັກ-ວຽກງານການເມືອງ ໄລຍະ 05 ປີ ຜ່ານມາ ແລະ ທິດທາງແຜນການ 05 ປີຕໍ່ໜ້າ, ພ້ອມທັງຜ່ານບົດສະຫຼຸບການຕີລາຄາການສ້າງກົມກອງເຂັ້ມແຂງ-ໜ່ວຍພັກຮູ້ນໍາພາຮອບດ້ານ    ປະຈໍາປີ 2017 ເຊີ່ງຍາດໄດ້ຜົນສໍາເລັດໃນຫຼາຍດ້ານ ເຊັ່ນ: ດ້ານການເມືອງ-ແນວຄິດ: ໄດ້ຖືເອົາວຽກງານການເມືອງ-ນໍາພາແນວຄິດເປັນບັນຫາສໍາຄັນຕົ້ນຕໍຕໍ່ຖັນແຖວພະນັກງານ, ເຮັດໃຫ້ພະນັກງານສະມາຊິກພັກ, ພະນັກງານ-ນັກຮົບ ມີແນວຄິດອຸ່ນອ່ຽນທຸ່ນທ່ຽງ, ມີຄຸນສົມບັດສີນທຳປະຕິວັດ , ເຊື່ອໝັ້ນຕໍ່ແນວທາງນະໂຍບາຍຂອງພັກ, ເຄົາລົບລະບຽບກົດໝາຍຂອງລັດຢ່າງເຂັ້ມງວດ; ດ້ານການຈັດຕັ້ງ ແລະ ພະນັກງານ: ສາມາດປັບປຸງກົງຈັກການຈັດຕັ້ງພັກຢູ່ອ້ອມຂ້າງກອງບັນຊາການ ປກສ ແຂວງ ໄດ້ 10 ຮາກຖານພັກ, ບົ່ງຕົວແຕ່ງຕັ້ງຄະນະພັກຮາກຖານໄດ້ 03 ຮາກຖານ, ຂະຫຍາຍມະຫາຊົນເຂົ້າພັກສໍາຮອງ ໄດ້ 165 ສະຫາຍ, ຍິງ 72 ສະຫາຍ, ນອກນັ້ນຍັງໄດ້ສົ່ງພະນັກງານ-ນັກຮົບ ຜູ້ທີ່ມີຄວາມຫ້າວຫັນກ້າວໜ້າໄດ້ໄປຍົກລະດັບວິຊາສະເພາະ ທັງພາຍໃນ ແລະ ຕ່າງປະເທດ ຈໍານວນ 725 ສະຫາຍ, ຍິງ 61 ສະຫາຍ, ໄປຍົກລະດັບທິດສະດີການເມືອງ-ການປົກຄອງ 47 ສະຫາຍ, ຍິງ 03 ສະຫາຍ;  ດ້ານແບບແຜນວິທີນໍາພາ: ໄດ້ນໍາເອົາແນວທາງນະໂຍບາຍຂອງພັກ, ມະຕິ, ຄໍາສັ່ງຂອງຂັ້ນເທິງມາຫັນເປັນແບບແຜນວິທີເຮັດວຽກ, ປະຕິບັດໜ້າທີ່ວຽກງານຕາມຫຼັກການລວມສູນປະຊາທິປະໄຕ, ນໍາພາເປັນໝູ່ຄະນະ, ແບ່ງວຽກໃຫ້ບຸກຄົນຮັບຜິດຊອບ; ດ້ານວຽກງານປ້ອງກັນຊາດ-ປ້ອງກັນຄວາມສະຫງົບ: ໄດ້ເອົາໃຈໃສ່ຊີ້ນໍາ-ນໍາພາ ພະນັກງານສະມາຊິກພັກ, ພະນັກງານ-ນັກຮົບ ເຄື່ອນໄຫວເຮັດວຽກງານປ້ອງກັນຄວາມສະຫງົບຢ່າງເປັນປົກກະຕິຕໍ່ເນື່ອງ, ແກ້ໄຂບັນຫາປະກົດການຫຍໍ້ທໍ້ຕ່າງໆທີ່ເກີດຂື້ນໃນສັງຄົມໄດ້ວ່ອງໄວ ແລະ ທັນເວລາ; ດ້ານວຽກນະໂຍບາຍ ແລະ ອົງການຈັດຕັ້ງມະຫາຊົນ: ສະເໜີເລື່ອນຊັ້ນໃຫ້ພະນັກງານ-ນັກຮົບ ຈໍານວນ 989 ສະຫາຍ, ຍິງ 145 ສະຫາຍ, ສະເໜີຍ້ອງຍໍສັນລະເສີນບຸກຄົນ ແລະ ກົມກອງ ປະເພດຫຼຽນໄຊ ແລະ ຫຼຽນກາ ຈໍານວນ 1,095 ໜ່ວຍ, ໃບຍ້ອງຍໍ 2,139 ໃບ, ສະເໜີຍ້ອງຍໍໃຫ້ສະມາຊິກຊາວໜຸ່ມ-ແມ່ຍິງ  ຈໍານວນ 532 ສະຫາຍ.

         ໂອກາດທີ່ ສະຫາຍ ພົນຈັດຕະວາ ອາລູ ວາລີຊື ຄະນະພັກກະຊວງ, ຫົວໜ້າກົມໃຫ່ຍການເມືອງກະຊວງປ້ອງກັນຄວາມສະຫງົບ ເຂົ້າຮ່ວມກອງປະຊຸມວຽກງານພັກ-ວຽກງານການເມືອງ ຄັ້ງທີ I ໃນຄັ້ງນີ້ ສະຫາຍກໍ່ໄດ້ຍ້ອງຍໍຊົມເຊີຍ ຄະນະພັກ-ຄະນະກອງບັນຊາການ ທີ່ໄດ້ເອົາໃຈໃສ່ຊີ້ນໍາ - ນໍາພາ ພະນັກງານສະມາຊິກພັກ, ພະນັກງານ-ນັກຮົບ ເຮັດສໍາເລັດໜ້າທີ່ທີ່ການຈັດຕັ້ງຂັ້ນເທິງມອບໝາຍໃຫ້, ສະຫາຍຍັງໄດ້ຮຽກຮ້ອງໃຫ້ຄະນະພັກ-ຄະນະບັນຊາ ຈົ່ງສືບຕໍ່ເຮັດວຽກງານການເມືອງ -ແນວຄິດ ໃຫ້ພະນັກງານ - ນັກຮົບ, ເອົາໃຈໃສ່ແກ້ໄຂບັນຫາປະກົດການຫຍໍ້ທໍ້ຕ່າງໆທີ່ເກີດຂື້ນໃຫ້ຫຼຸດໜ້ອຍຖອຍລົງ, ສືບຕໍ່ຂະຫຍາຍມະຫາຊົນຜູ້ກ້າວໜ້າເຂົ້າພັກຕາມມາດຖານ, ເງື່ອນໄຂ ແລະ ລະບຽບຂອງພັກປະຊາຊົນປະຕິວັດລາວວາງອອກ, ເອົາໃຈໃສ່ກໍ່ສ້າງພະນັກງານສືບທອດ, ພະນັກງານນໍາພາ-ບັນຊາ ເພື່ອເຮັດໃຫ້ກໍາລັງປ້ອງກັນຄວາມສະຫງົບແຂວງບໍລິຄໍາໄຊ ມີຄວາມເຕີບໃຫ່ຍຂະຫຍາຍຕົວທັນສະໄໝຂື້ນເປັນກ້າວໆ.