ກອງປະຊຸມປະຈຳປີ 2017 ຂອງຄະນະສະມາຊິກສະພາແຫ່ງຊາດ ປະຈຳເຂດເລືອກຕັ້ງເຂດທີ 11 ແຂວງບໍລິຄຳໄຊ ໄດ້ຈັດຂຶ້ນໃນຕອນເຊົ້າຂອງວັນທີ 27 ມັງກອນ 2018 ຢູ່ທີ່ຫ້ອງປະຊຸມຂອງສະພາປະຊາຊົນແຂວງບໍລິຄຳໄຊ ໂດຍພາຍໃຕ້ການເປັນປະທານຂອງທ່ານ ປອ ສຸວັນນີ ໄຊຊະນະ ປະທານສະພາ​ປະຊາຊົນ​ແຂວງບໍລິຄຳໄຊ, ມີບັນດາສະມາຊິກສະພາແຫ່ງຊາດປະຈຳແຂວງ, ເມືອງ ພ້ອມດ້ວຍແຂກຖືກເຊີນເຂົ້າຮ່ວມ.

          ທ່ານນາງ ສີໄຄ ສີປະເສີດ ຮອງປະທານສະມາຊິກສະພາປະຊາຊົນແຂວງບໍລິຄຳໄຊ ໄດ້ຂຶ້ນຜ່ານບົດສະຫຼຸບການເຄື່ອນໄຫວວຽກງານປະຈຳປີ 2017 ແລະ ທິດທາງແຜນການປະຈຳປີ 2018 ວ່າ: ສະມາຊິກສະພາປະຊາຊົນແຂວງບໍລິຄຳໄຊ ແມ່ນກົງຈັກການຈັດຕັ້ງໜຶ່ງຂອງສະພາແຫ່ງຊາດ ເຮັດໜ້າທີ່ເປັນເສນາທິການຮອບດ້ານໃຫ້ແກ່ຄະນະປະຈຳສະພາແຫ່ງຊາດ ໃນການຈັດຕັ້ງປະຕິບັດພາລະບົດບາດ, ສິດ ແລະ ໜ້າທີ່ ເປັນຕົວແທນແຫ່ງສິດ ແລະ ຜົນປະໂຫຍດລວມຂອງຊາດ ກໍ່ຄືຂອງປະຊາຊົນບັນດາເຜົ່າພາຍໃນແຂວງບໍລິຄຳໄຊ, ສະມາຊິກສະພາປະຊາຊົນແຂວງບໍລິຄຳໄຊ ປະກອບມີ 6 ທ່ານ ຍິງ 2 ທ່ານ, ປະຈຳຢູ່ສູນກາງ 2 ທ່ານ ຍິງ 1 ທ່ານ, ໃນນີ້ເປັນຄະນະສະມາຊິກສະພາແຫ່ງຊາດ ປະຈຳການ 3 ທ່ານ ຍິງ 1 ທ່ານ, ມີໂຄງຮ່າງການຈັດຕັ້ງຄົບຊຸດ, ການປະຕິບັດພາລະບົດບາດ ການຕົກລົງບັນຫາສຳຄັນພື້ນຖານສຳຄັນຂອງຊາດ, ຂອງທ້ອງຖິ່ນ ໄດ້ຄົ້ນຄວ້າປະກອບຄຳເຫັນຕໍ່ບັນຫາສຳຄັນຂອງຊາດທີ່ໄດ້ນຳເຂົ້າພິຈາລະນາ, ຮັບຮອງໃນກອງປະຊຸມສະໄໝສາມັນເທື່ອທີ 3 – 4 ຂອງສະພາແຫ່ງຊາດ ເປັນຕົ້ນ ແຜນວຽກຈຸດສຸມປີ 2017 ແລະ ທິດທາງແຜນການປີ 2018 ຂອງລັດຖະບານ, ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານ 2017 ແລະ ທິດທາງແຜນການ 2018, ບົດລາຍງານການເຄື່ອນໄຫວ 2017 ແລະ ທິດທາງແຜນການ 2018 ຂອງສະພາແຫ່ງຊາດ, ວຽກງານຂອງອົງການໄອຍະການປະຊາຊົນສູງສຸດ ແລະ ສານປະຊາຊົນສູງສຸດ ຕໍ່ກັບການເຄື່ອນໄຫວໃນໄລຍະຜ່ານມາ ແລະ ການກຳນົດວຽກງານໃນປີ 2018,  ນອກນັ້ນ ຍັງໄດ້ເຂົ້າຮ່ວມໃນການຄົ້ນຄວ້າປະກອບຄຳເຫັນຕໍ່ຮ່າງແຜນພັດທະນາເສດຖະກິດ-ສັງຄົມ, ບັນດາໂຄງການລົງທຶນຂອງແຂວງ ໂດຍສະເພາະ ກ່ຽວກັບການນະໂຍບາຍ ແລະ ຫົວໜ່ວຍລາຄາຊົດເຊີຍຄ່າຜົນເສຍຫາຍຜູ້ທີ່ໄດ້ຮັບຜົນກະທົບຈາກໂຄງການພັດທະນາເຂດບໍລິການສົ້ນຂົ້ວແມ່ນ້ຳຂອງແຫ່ງທີ 5 ປາກຊັນ-ບຶງການ, ລາຄາຊົດເຊີຍຈາກແລວສາຍສົ່ງໂຄງການເຂື່ອນໄຟຟ້ານ້ຳງຽບ 1 ແລະ ຂໍອະນຸມັດຂຸດຄົ້ນໄມ້ ແລະ ເຄື່ອງປ່າຂອງດົງຢູ່ເຂດນ້ຳຖ້ວມຈາກການກໍ່ສ້າງເຂື່ອນໄຟຟ້ານ້ຳງຽບ 1, ນ້ຳເທີນ 1 ແລະ ໂຄງການຂຸດຄົ້ນຄຳ-ຄຳເກີດແສນອຸດົມປະຈຳປີ 2018 ເພື່ອນຳສະເໜີຕໍ່ລັດຖະບານ, ດ້ານເສດຖະກິດ ການລົງທຶນຂອງລັດ ໂຄງການປະເພດ 1-4 ທີ່ສະພາແຫ່ງຊາດຮັບຮອງ 77 ໂຄງການ, ມູນຄ່າຕາມສັນຍາ 4.985.785.55, ປີ 2017 ສະພາແຫ່ງຊາດໄດ້ສົ່ງຄຳຮ້ອງທຸກຂອງປະຊາຊົນໃຫ້ສະພາປະຊາຊົນແຂວງພິຈາລະນາແກ້ໄຂທັງໝົດ 4 ເລື່ອງກ່ຽວກັບການທວງກຳມະສິດທີ່ດິນ, ສັນຍາກູ້ຢືມ, ຜົນກະທົບຈາກໂຄງການປູກຢ່າງພາລາຂອງຊາວໜຸ່ມແຂວງບໍລິຄຳໄຊ-ຮ່າຕີ້ງ ຢູ່ເມືອງຄຳເກີດ ແລະ ຜົນກະທົບຈາກໂຄງການສຳປະທານປູກໜໍ່ໄມ້ກິມສຸມຂອງບໍລິສັດພອນສັກ ຢູເມືອງປາກກະດິງ, ໃນນີ້ເປັນຄຳສະເໜີ 2 ເລື່ອງ, ຄຳຮ້ອງຄວາມເປັນທຳ 2 ເລື່ອງ, ໄດ້ພິຈາລະນາສຳເລັດພ້ອມທັງລາຍງານຄືນໃຫ້ສະພາແຫ່ງຊາດທັງໝົດແລ້ວ, ລົງໂຄສະນາເຜີຍແຜ່ຜົນສຳເລັດກອງປະຊຸມສະໄໝສາມັນເທື່ອທີ 2-3 ຂອງສະພາແຫ່ງຊາດຊຸດທີ 8 ແລະ ສະພາປະຊາຊົນແຂວງ ຊຸດທີ 1 ໄດ້ 38 ຈຸດ ໃນທົ່ວແຂວງ.

          ສຳລັບທິດທາງແຜນການໃນປີ 2018: ສືບຕໍ່ຜັນຂະຫຍາຍມະຕິກອງປະຊຸມສະໄໝສາມັນເທື່ອ 4-5 ສະພາແຫ່ງຊາດຊຸດທີ 8 ໃຫ້ເປັນແຜນການອັນລະອຽດໃນແຕ່ລະດ້ານຂອງຕົນ, ປະກອບສ່ວນສ້າງ ແລະ ປັບປຸງກົດໝາຍ ໃຫ້ໄດ້ 26 ສະບັບຕາມແຜນການ ຂອງສະພາແຫ່ງຊາດ, ກວດກາ ແລະ ຊຸກຍູ້ການສ້າງນິຕິກຳລຸ່ມກົດໝາຍຂັ້ຂແຂວງໃຫ້ໄດ້ 5 ສະບັບ, ຮັບປະກັນການແກ້ໄຂຜົນການຕິດຕາມກວດກາຂອງສະມາຊິກສະພາແຫ່ງຊາດ ປະຈຳເຂດເລືອກຕັ້ງໃຫ້ມີຜົນສັກສິດ ໂດຍສອດຄ່ອງກັບກົດໝາຍ ແລະ ລະບຽບການທີ່ວາງໄວ້, ເພີ່ມທະວີການປະສານງານລະຫວ່າງ ຄະນະສະມາຊິກສະພາແຫ່ງຊາດປະຈຳເຂດເລືອກຕັ້ງ ແລະ ສະພາປະຊາຊົນແຂວງ ເພື່ອຮັບປະກັນການປະຕິບັດພາລະບົດບາດ, ສິດ ແລະ ໜ້າທີໃນການເປັນຕົວແທນຂອງປະຊາຊົນໃຫ້ມີຄຸນນະພາບ.