ຕອນບ່າຍ, ວັນທີ 24 ມັງກອນ 2018 ນີ້ ຢູ່ທີ່ຫ້ອງປະຊຸມຂອງ ກອງບັນຊາການ ປກສ ເມືອງ ປາກຊັນ, ແຂວງ ບໍລິຄໍາໄຊ ໄດ້ຈັດກອງປະຊຸມໃຫຍ່ຄະນະຮາກຖານຊາວໜຸ່ມ ປກສ ເມືອງ ປາກຊັນ ຄັ້ງທີ III ຂື້ນ, ໂດຍການເປັນປະທານຂອງ ສະຫາຍ ພັນຕີ ບຸນ ອິນທິລາດ ເລຂາຮາກຖານຊາວໜຸ່ມ ປກສ ເມືອງ ປາກຊັນ, ໃຫ້ກຽດເຂົ້າຮ່ວມຂອງ ສະຫາຍ ສົມສຸກ ໄຊບຸນມີ ເລຂາຄະນະບໍລິຫານງານຊາວໜຸ່ມ ເມືອງ ປາກຊັນ, ມີ ສະຫາຍ ພັນໂທ ທົນທະວີ ໂພຄໍາ ຄະນະພັກຮາກຖານ ຮອງຫົວໜ້າກອງບັນຊາການ ປກສ ເມືອງ ປາກຊັນ, ມີບັນດາຄະນະຮາກຖານ ຕະຫຼອດຮອດສະມາຊິກຊາວໜຸ່ມພາຍໃນກົມກອງເຂົ້າຮ່ວມ 63 ສະຫາຍ, ຍິງ 20 ສະຫາຍ.

         

      ສະຫາຍ ພັນຕີ ບຸນ ອິນທິລາດ ເລຂາຮາກຖານຊາວໜຸ່ມ ປກສ ເມືອງ ປາກຊັນ ໄດ້ຂື້ນຜ່ານບົດລາຍງານການເມືອງ ຕໍ່ທີ່ປະຊຸມ ເຊີ່ງໄດ້ຍົກໃຫ້ເຫັນຜົນສຳເລັດໃນການຊີ້ນຳ-ນຳພາວຽກງານຂະບວນການຕ່າງໆ ໃນການປະຕິບັດວຽກງານ 04 ບຸກຂອງສູນກາງຊາວໜຸ່ມປະຊາຊົນປະຕິວັດລາວວາງອອກ ກໍ່ຄືແຜນການເຄື່ອນໄຫວຈັດຕັ້ງປະຕິບັດວຽກງານຂອງຄະນະຮາກຖານຊາວໜຸ່ມ ປກສ ເມືອງ ປາກຊັນໃນໄລຍະ 03 ປີຜ່ານມາ ໂດຍມີຜົນງານທີ່ພົ້ນເດັ່ນຫລາຍດ້ານ ຄື: ດ້ານການເມືອງ - ແນວຄິດ: ໄດ້ເອົາໃຈໃສ່ສຶກສາອົບຮົມການເມືອງ-ແນວຄິດ ເພື່ອສ້າງສະມາຊິກຊາວໜຸ່ມໃຫ້ມີແນວຄິດຫຼັກໝັ້ນ, ມີນໍ້າໃຈຮັກຊາດ, ຮັກບ້ານເກີດເມືອງນອນ, ມີຄຸນສົມບັດສິນທຳປະຕິວັດ, ມີສະຕິເຄົາລົບລະບຽບກົດໝາຍ, ຕ້ານ ແລະ ສະກັດກັ້ນແນວຄິດການກະທຳສີ່ງບໍ່ຖຶກຕ້ອງ; ວຽກງານປັບປຸງການຈັດຕັ້ງ ແລະ ນະໂຍບາຍຕ່າງໆ: ໄດ້ສົ່ງພະນັກງານສະມາຊິກຊາວໜຸ່ມໄປຍົກລະດັບວິຊາສະເພາະຢູ່ພາຍໃນ ລະບົບຊັ້ນຕົ້ນ 01 ສະຫາຍ, ຊັ້ນກາງ 03 ສະຫາຍ, ຊັ້ນປະລິນຍາຕີ 03 ສະຫາຍ, ໄປຍົກລະດັບທິດສະດີ 02 ສະຫາຍ, ໄປຍົກລະດັບວິຊາສະເພາະຢູ່ຕ່າງປະເທດ 03 ສະຫາຍ, ຍິງ 01 ສະຫາຍ, ສະເໜີຍ້ອງຍໍຂັ້ນສູນກາງ 62 ສະຫາຍ, ຍິງ 14 ສະຫາຍ, ນອກນັ້ນຍັງມີນະໂຍບາຍຕໍ່ພະນັກງານຜູ້ເຈັບປ່ວຍນອນໂຮງຫມໍ, ເກີດລູກ ຈໍານວນ 6.169.000 ກີບ; ດ້ານວຽກງານວິຊາສະເພາະ: ໄດ້ຂື້ນທະບຽນຄຸ້ມຄອງສໍາມະໂນຄົວ, ຄຸ້ມຄອງການເຄື່ອນໄຫວຂອງພົນລະເມືອງໃນ 05 ກຸ່ມບ້ານມີ 9.803 ຄອບຄົວ, ແບ່ງການຄຸ້ມຄອງອອກເປັນ 827 ໜ່ວຍ ທີ່ຂື້ນກັບອໍານາດການປົກຄອງບ້ານ ແລະ ປກສ ກຸ່ມບ້ານ, ຂື້ນບັນຊີເປົ້າໝາຍຕ່າງໆໄດ້ທັງໝົດ 1.756 ຄົນ, ຍິງ 84 ຄົນ, ປະສານສົມທົບກັບພາກສ່ວນທີ່ກ່ຽວຂ້ອງ ສະກັດກັ້ນ ແລະ ແກ້ໄຂປະກົດການຫຍໍ້ທໍ້ໃນສັງຄົມທີ່ກະທໍາຜິດທາງອາຍາໄດ້ ຈໍານວນ 339 ລາຍ, ສາມາດກັກຕົວຜູ້ກະທໍາຜິດໄດ້ 446 ຄົນ, ຍິງ 61 ຄົນ, ມ້າງຄະດີຢາເສບຕິດໄດ້ 84 ລາຍ, ກັກຕົວຜູ້ກະທໍາຜິດ 87 ຄົນ, ຍິງ 10 ຄົນ, ຢຶດຂອງກາງປະເພດຢາບ້າໄດ້ 11.822 ເມັດ, ກັນຊາອັດແທ່ງ ຈໍານວນ 2.228 ກິໂລກຼາມ ກັກຕົວເປົ້າໝາຍເສບຢາເສບຕິດມາສຶກສາອົບຮົມໄດ້ 240 ຄົນ, ຍິງ 07 ຄົນ. ພາຍຫລັງຄະນະຮາກຖານຊາວໜຸ່ມຊຸດເກົ່າຂື້ນອໍາລາໜ້າທີ່ ກອງປະຊຸມໄດ້ມີການປ່ອນບັດເລືອກຕັ້ງເອົາຄະນະຮາກຖານຊາວໜຸ່ມຊຸດໃໝ່ ໂດຍມີຜູ້ລົງສະໝັກຈໍານວນ 07 ສະຫາຍ, ເລືອກເອົາ 05 ສະຫາຍ, ຜ່ານການປ່ອນບັດເລືອກຕັ້ງ ແລະ ກອງປະຊຸມຄັ້ງປະຖົມມະລຶກ ໄດ້ຕົກລົງເລືອກເອົາ ສະຫາຍ ຮ້ອຍເອກ ນາງ ນົງຄານ ຫຼ້າວິໄລ ເປັນເລຂາຮາກຖານ, ຮ້ອຍຕີ ອານຸສອນ ແສນມະນີ ເປັນຮອງ, ຮ້ອຍໂທ ສີອານ ຈັນທະມີໄຊ ເປັນປະທານກວດກາ ແລະ 02 ສະຫາຍ ເປັນກໍາມະການ.