ຜົນການຈັດຕັ້ງປະຕິບັດແຜນງົບປະມານ ປະຈຳປີ 2017 ​ແຂວງ​ບໍລິ​ຄຳ​ໄຊ ສາມາດ​ຈັດ​ເກັບ​ລາຍ​ຮັບ​ເຂົ້າ​ງົບປະມານ ທັງ​ພູດ​ສູນ​ກາງ ​ແລະ ພູດ​ທ້ອງ​ຖິ່ນ ໄດ້​ລື່ນ​ແຜນ​ທີ່ກຳນົດໄວ້ ທ່ານ ຄໍາແຫວນ ປັນຍານຸວົງ ຫົວໜ້າພະແນກການເງິນແຂວງ ລາຍງານຕໍ່ກອງປະຊຸມສະໄໝສາມັນ ເທື່ອທີ 4 ສະພາປະຊາຊົນແຂວງບໍລິຄຳໄຊ ຊຸດທີ I ໃນວັນທີ 22 ມັງກອນ 2018.

      ທ່ານ ຄຳແຫວນ ປັນຍານຸວົງ ໄດ້ລາຍງານ ວ່າ: ພາຍ​ໃຕ້​ການ​ຊີ້​ນໍາ-ນໍາພາ​​ຂອງອົງການ​ປົກຄອງ​ແຕ່ລະ​ຂັ້ນ ໃນໄລຍະທີ່ຜ່ານມາ ​ພະແນກການເງິນໄດ້​ຜັນ​ຂະຫຍາຍ​ບັນດາ​ນິຕິ​ກຳ, ລະບຽບ​ກົດໝາຍ​ເຂົ້າ​ສູ່​ວຽກ​ງານ​ຕົວ​ຈິງ ​ເຮັດ​ໃຫ້​ຜູ້​ປະກອບ​ການ, ຫົວໜ່ວຍ​ທຸລະ​ກິດ, ປະຊາຊົນ ມີ​ຄວາມ​ຮັບ​ຮູ້​ເຂົ້າໃຈປະກອບສ່ວນ​ປະຕິບັດ​ພັນທະ​ຂອງຕົນ, ໄດ້ຂຸ້ນຂ້ຽວຜັນຂະຫຍາຍແຜນງົບປະມານ 2017 ເຂົ້າສູ່​ຫົວໜ່ວຍ​ງົບປະມານທັນ​ກັບ​ກຳນົດ​ເວລາ​, ປະຕິບັດ​ການ​ເບີກ​ຈ່າຍ​ເງິນ​ເດືອນ, ​ເງິນ​ອຸດ​ໜູນ ​ໄດ້​ເປັນ​ປົກກະຕິ ພ້ອມດຽວກັນ ໄດ້​ສ້າງກົນ​ໄກຄູ້​ມຄອງການ​ຈັດ​ເກັບ​ລາຍ​ຮັບ ລະຫວ່າງ​ສູນ​ກາງ, ​ແຂວງ, ​ເມືອງ ແລະ ບ້ານ ​ໃຫ້​ມີ​ຄວາມ​ສະດວກ​ວ່ອງ​ໄວ​ ໂປ່​ງ​ໃສ ແລະ ມີ​ປະ​ສິດທິ​ຜົນ​ກວ່າ​ເກົ່າ, ນອກນັ້ນ ຍັງໄດ້​ເກັບ​ກໍາ​ຂໍ້​ມູນ ​ແລະ ສຳ​ຫຼວດຖານ​ລາຍ​ຮັບ​ຄືນ​ໃໝ່ໃນ​ທົ່ວ​ແຂວງ, ​ໄດ້ເພີ້​ມທະວີ​ການກວດກາປະຕິບັດວິໄນການເງິນຢ່າງເຂັ້ມງວດ ແນ່ໃສ່ອັດຊ່ອງວ່າງການຮົ່ວໄຫຼຂອງງົບປະມານ, ປະສານສົມທົບກັບຂະແໜງການທີ່ກ່ຽວຂ້ອງ ໃນການສະໜອງຂໍ້ມູນຄິດໄລ່ຈັດເກັບລາຍຮັບຈາກສ່ວຍສາອາກອນ, ຊັບສິນ, ພາສີ ໃຫ້ຖືກຕ້ອງຄົບຖ້ວນ ແລະ ທັນເວລາ, ເອົາໃຈໃສ່ການ​ເກັບ​ຄ່າ​ທໍານຽມ​ທີ່​ດິນ​ຢ່າງ​ມີ​ຈຸດ​ສຸມ, ເລັ່ງທວງ ແລະ ແກ້​ໄຂ​ໜີ້​ສິນທີ່ຄ້າງມອບ​ເຂົ້າ​ງົບປະມານ. ການຈັດຕັ້ງປະຕິບັດແຜນງົບປະມານ ປະຈຳປີ 2017 ທີ່ຜ່ານມາ ເຫັນວ່າ ​ແຂວງ​ບໍລິ​ຄຳ​ໄຊ ໄດ້​​ຈັດ​ເກັບ​ລາຍ​ຮັບ​ເຂົ້າ​ງົບປະມານ ທັງ​ພູດ​ສູນ​ກາງ ​ແລະ ພູດ​ທ້ອງ​ຖິ່ນ ໄດ້​ລື່ນ​ແຜນ​ການທີ່​ວາງໄວ້ ດ້ານລາຍຮັບພູດ​ສູນ​ກາງ ​ແລະ ພູດ​ທ້ອງ​ຖິ່ນປະຕິບັດໄດ້ທັງ​ໝົດ 759,82 ຕື້ກີບ ເທົ່າກັບ 136% ຂອງແຜນການປີ, ທຽບໃສ່ໄລຍະດຽວກັນ ເພີ່ມຂື້ນ 50,49% ໃນນັ້ນ ລາຍຮັບພູດສູນກາງ ປະຕິບັດໄດ້ 569,28 ຕື້ກີບ ເທົ່າກັບ 146,56% ຂອງແຜນການປີ ທຽບໃສ່ໄລະດຽວກັນ ເພີ່ມຂື້ນ 79,86% ແລະ ລາຍຮັບພູດທ້ອງຖິ່ນ ປະຕິບັດໄດ້ 190,54 ຕື້ກີບ ເທົ່າກັບ 112,14% ຂອງແຜນການປີ ທຽບໃສ່ໄລະດຽວກັນ ເພີ່ມຂື້ນ 1,14%.

     ສຳລັດທິດທາງແຜນການໃນຕໍ່ໜ້າ ແມ່ນຈະເອົາ​ໃຈ​ໃສ່ເພີ້ມທະວີການສຶກສາອົບຮົມການເມືອງແນວຄິດ ຕໍ່ສະມາຊິກພັກພະນັກງານ ຂະແໜງການເງິນ ໃຫ້ມີຄວາມໜັກແໜ້ນ ມີຄວາມຮັບຜິດຊອບສູງຕໍ່ໜ້າທີ່ວຽກງານ ມີຄວາມສື່ສັດ ໂປ່ງໃສ ເອົາໃຈໃສ່ບໍລິການຮັບໃຊ້ປະຊາຊົນ, ຜູ້ປະກອບການ ດ້ວຍຈັນຍາບັນຈັນຍາທຳ​, ສືບຕໍ່ຄູ້​ມຄອງຂຸດຄົ້ນ​ຈັດ​ເກັບ​ລາຍ​ຮັບຈາກ​ຖານ​ທີ່​ມີ​ຢູ່​ແລ້ວ​ ແລະ ສຸມໃສ່ຊອກ​ຄົ້ນ​ແຫ​ລ່ງລາຍ​ຮັບ​ທີ່​ຍັງ​ບົ່ມ​ຊ້ອນໃຫ້​ຖືກຕ້ອງ​ຄົບ​ຖ້ວນ, ​ເອົາ​ໃຈ​ໃສ່​ໃນ​ການ​ຄູ້​ມຄອງ​ລາຍ​ຈ່າຍ​ງົບປະມານຕາມແຜນທີ່ສະພາຮັບຮອງ, ​ເພີ້​ມທະວີ​ຄວາມ​ຮັບຜິດຊອບ​ໃນ​ການ​ປະສານ​ສົມທົບ​ກັບ​ຂະ​ແໜງ​ການ​ສາຍ​ຕັ້ງ-ສາຍ​ຂວາງ ຂະ​ແໜງ​ການ​ທີ່​ກ່ຽວຂ້ອງ​ ເພື່ອ​ໃຫ້​ມີ​ສ່ວນ​ຮ່ວມ​ໃນ​ການ​ຊີ້​ນຳ, ຕິດຕາມ​ກວດກາ ​ການ​ເກັບ​ລາຍ​ຮັບ ​ແລະ​ ແກ້​ໄຂຜົນ​ການກວດ​ສອບໃຫ້​ໄວ​ຂື້ນ.