ເພື່ອເປັນການບັນເທົາຄວາມໜາວ ແລະ ຫຼຸດຜ່ອນຄວາມທຸກຍາກຈົນຂອງປະຊາຊົນບັນດາເຜົ່າ ໃນເຂດຫ່າງໄກສອກຫຼີກ ໃນລະຫວ່າງວັນທີ່ 16-18 ມັງກອນ 2018 ນີ້ ອົງການແນວລາວສ້າງຊາດແຂວງ, ແນວລາວສ້າງຊາດ 7 ຕົວເມືອງ, ອົງການກາແດງປະຈຳແຂວງ, ອົງການພຸດທະສາສະໜາປະຈຳແຂວງ ແລະ ສະມາຄົມນັກທຸລະກິດໜຸ່ມ  ໄດ້ລົງໄປມອບເຄື່ອງບັນເທົາທຸກ ແລະ ຕ້ານໄພໜາວໃຫ້ແກ່ປະຊາຊົນ 3 ບ້ານ ຂອງເມືອງວຽງທອງ ແຂວງບໍລິຄໍາໄຊ ລວມມີບ້ານນາຕັນ, ນາຍາງ ແລະ ວັງພຽງ ໂດຍການນໍາພາ ຂອງທ່ານ ລໍາສະໄໝ ວໍລະສານ ຄະນະປະຈໍາພັກແຂວງ ປະທານແນວລາວສ້າງຊາດແຂວງ.

ການລົງມອບເຄື່ອງບັນເທົາທຸກ ແລະ ຕ້ານໄພໜາວໃນຄັ້ງນີ້ ແມ່ນໄດ້ຮັບການບໍລິຈາກ - ຈາກພາກສ່ວນໃນສັງຄົມຢູ່ພາຍໃນແຂວງເຊັ່ນ: ຈາກອົງການແນວລາວສ້າງຊາດແຂວງຈຳນວນ 23 ລ້ານກີບ, ແນວລາວສ້າງຊາດເມືອງ ທ່າພະບາດ, ປາກກະດິງ, ຄຳເກີດ, 14,212,000 ກີບ, ສະມາຄົມນັກທຸລະກິດໜຸ່ມແຂວງ ແລະ ເມືອງວຽງທອງ ຈຳນວນ 9,380,000 ກີບ, ອົງການພຸດທະສາສະໜາສຳພັນລາວປະຈໍາແຂວງ2.600.000 ກີບ ແລະ ອົງການກາແດງລາວ ແລະ ແຂວງ 46,200,000 ກີບ, ກອງບັນຊາການທະຫານແຂວງ3,000,000 ກີບ, ຈາກນັກທູລະກິດພາຍໃນແຂວງ 25,500,000 ກີບ, ລວມມູນຄ່າທັງໝົດ 127 ລ້ານກວ່າກີບ. ໃນນັ້ນໄດ້ຊື້ເຄື່ອງນຸ່ງ-ຫົ່ມ, ອຸປະກອນການສຶກສາ ໃຫ້ແກ່ປະຊາຊົນທົ່ວໄປຈໍານວນ 100 ກວ່າຄອບຄົວ ແລະ ຄອບຄົວທຸກຍາກຈໍານວນ 30 ກວ່າຄອບຄົວ, ໃນເຂດບ້ານດັ່ງກ່າວນີ້ ແມ່ນເປັນເຂດຫ່າງໄກສອກຫຼີກ ການພັດທະນາຍັງບໍ່ທັນເທົ່າທຽມເຂດໃນເມືອງ ແຕ່ທາງອໍານນາດການປົກຄອງແຂວງ ແລະ ເມືອງ ທຸກພາກສ່ວນໃນສັງຄົມ ກໍ່ໄດ້ເອົາໃຈໃສ່ຊ່ວຍເຫຼືອ ຈຳນວນບ້ານດັ່ງກ່າວນັ້ນ ໃຫ້ມີການພັດທະນາເທົ່າທຽມກັນ.