ກອງ​ປະຊຸມ​ແລກປຽ່ນບົດຮຽນ ການຈັດຕັ້ງປະຕິບັດ​ວຽກງານ​ກອງ​ທຶນທ່ອງ​ທຽ່ວ ລະຫວ່າງ​ພະ​ແນ​ກ ຖ ວ ທ ​ແຂວງ​ບໍລິ​ຄຳ​ໄຊ ​ແລະ ພະ​ແນ​ກ ຖ ວ ທ ​ແຂວງ​ຊຽງຂວາງ ​ໄດ້​ຈັດ​ຂຶ້ນ​ໃນ​ວັນ​ທີ່ 15 ມັງກອນ 2018 ນີ້ ຢູ່​ທີ່​ຫ້ອງ​ປະຊຸມ​ສຳນັກງານຫ້ອງ​ວ່າການ​ເມືອງ​ຄຳ​ເກີດ, ເຂົ້າຮ່ວມກອງປະຊຸມຄັ້ງນີ້ ຝ່າຍ​ແຂວງ​ບໍລິ​ຄຳ​ໄຊ ນຳ​ໂດຍ​ທ່ານ ສົນ​ທອງ ວິ​ບຸນ​ກວ້າງ ຮອງ​ຫົວໜ້າພະ​ແນ​ກ ຖ ວ ທ ​ແຂວງພ້ອມ​ຄະນະ, ຝ່າຍ​ແຂວງ​ຊຽງຂວາງ ນຳໂດຍ​​ທ່ານ ວົງສາ ດວງ​ທອງ​ລາ ຫົວໜ້າພະ​ແນ​ກ ຖ ວ ທ ​ແຂວງ​ ພ້ອມ​ຄະນະ.

    ​ໂອກາດ​ນີ້ທ່ານ ນາງ ຄຳ​ຍອງ ຈອມ​ມະນີວົງ ຮອງ​ຫົວໜ້າພະ​ແນ​ກ ຖວທ ​ແຂວງ​ບໍລິ​ຄຳ​ໄຊ ຜູ້​ຊີ້ນຳ​ວຽກງານ​ທ່ອງ​ທຽ່ວ ​ໄດ້​ລາຍ​ງານຫຍໍ້​ກຽ່ວກັບ​ການຈັດຕັ້ງປະຕິບັດ ​ເງິນ​ກອງ​ທຶນ​ພັດທະນາ​ການທ່ອງທຽ່ວພາຍ​ໃນ ​ໃຫ້​ຄະນະ​ຜູ້​ແທນ​ພະ​ແນ​ກ ຖວທ ​ແຂວງ​ຊຽງຂວາງ​ໄດ້​ຮັບ​ຟັງ, ໂດຍປະຕິບັດ​ຕາມລັດຖະບັນຍັດຂອງປະທານປະເທດ ​ແຫ່ງ ສ ປປ ລາວ ສະບັບ​ເລກ​ທີ່ 003/ປປທ, ລົງ​ວັນ​ທີ່ 26 ທັນວາ 2012 ວ່າ​ດ້ວຍ​ຄ່າ​ທໍານຽມ ​ແລະ ​ຄ່າ​ບໍລິການ, ອີງ​ຕາມ ​ດໍາລັດ​ວ່າ​ດ້ວຍ​ກອງ​ທຶນ​ການທ່ອງທຽ່ວ ສະບັບ​ເລກ​ທີ່ 119/ລບ, ລົງ​ວັນ​ທີ່ 10 ​ເມສາ 2017, ອິງ​ຕາມ ຂໍ້​ຕົກລົງ​ຂອງ​ເຈົ້າ​ແຂວງ​ບໍລິ​ຄຳ​ໄຊ ສະບັບ​ເລກ​ທີ່ 494/ຂບຊ, ລົງ​ວັນ​ທີ່ 10 ກໍລະກົດ 2017 ວ່າ​ດ້ວຍ​ການ​ແຕ່ງຕັ້ງຄະນະ​ຮັບຜິດຊອບ​ເງິນ​ກອງ​ທຶນ​ສົ່ງ​ເສີມ​ການທ່ອງທຽ່ວຂັ້ນ​ແຂວງ ​ໄດ້​​ເລີ່​ມຈັດຕັ້ງປະຕິບັດ​ມາ​ແຕ່ງ​ວັນ​ທີ່ 1 ກຸມພາ 2017 ​ເປັນຕົ້ນມາ ໂດຍປະຕິບັດເກັບເງິນຢູ່ດ່ານສາກົນນໍ້າພາວເກົາແຈວ ແລະ ດ່ານສາກົນປາກຊັນບຶງການ ຕາມລະບົບບໍລິການຜ່ານປະຕູດຽວ, ເພື່ອຄວາມໂປ່ງໃສ ໃນການບໍລິການນັກທ່ອງທ່ຽວ ໜ່ວຍງາານກ່ຽວຂ້ອງ ໄດ້ຈັດພິມປ້ານໂຄສະນາ ກຽ່ວກັບລະບຽບການເກັບເງິນກອງທຶນ ພິມແຜ່ນຜັບເພື່ອແຈກຢາຍໃຫ້ນັກທ່ອງທ່ຽວ ແລະ ປ້າຍຂະໜາດ 1x2 ແມັດ ຕັ້ງໃສ່ໂຄງເຫຼັກຢູ່ແຕ່ລະດ່ານ.

    ສໍາລັບການພົບປະແລກປຽ່ນບົດຮຽນໃນຄັ້ງນີ້ ທາງແຂວງຊຽງຂວາງແມ່ນມີຄວາມສົນໃຈ ກຽວ່ກັບນິຕິກຳ, ລະບົບການດຳເນີນງານ, ການເກັບເງິນກອງທຶນທ່ອງທຽ່ວຢູ່ແຂວງບໍລິຄຳໄຊ ເພື່ອຈະໄດ້ນຳໄປຈັດຕັ້ງຜັນຂະຫຍາຍຢູ່ແຂວງຂອງຕົນ, ກອງປະຊຸມທັງສອງຝ່າຍໄດ້ພົບປະແລກປຽ່ນບົດຮຽນ ຮ່ວມກັນແບບກົງໄປກົງມາ ທັງເປັນການຮັດແໜ້ນຄວາມສາມັດຄີ ລະຫວ່າງພະແນກ ຖວທ ແຂວງບໍລິຄຳໄຊ ແລະ ພະແນກ ຖວທ ແຂວງຊຽງຂວາງ ໃຫ້ມີບາດກ້າວຂະຫຍາຍຕົວຍິ່ງຂຶ້ນ, ຈາກນັ້ນຜູ້ແທນທັງສອງແຂວງຍັງໄດ້ໄປຢ້ຽມຢາມ ເບີ່ງການເກັບເງິນກອງທຶນທ່ອງທຽ່ວ ຢູ່ດ້ານສາກົນນໍ້າພາວເກົາແຈວ ແລະ ແຫລ່ງທ່ອງທຽ່ວວັງນຳເຢັນ ຢູ່ບ້ານນາປາຫວ່ານ ເມືອງຄຳເກີດຕື່ມອີກ.