​        

     ກອງ​ປະຊຸມ​ສະໄໝສາມັນ ເທື່ອທີ 4 ​ສະພາ​ປະຊາຊົນ​ແຂວງ​ບໍລິ​ຄຳ​ໄຊ​ ຊຸດທີ I ໄດ້ໄຂຂື້ນຢ່າງເປັນທາງການ ​ໃນ​ວັນ​ທີ 22 ມັງກອນ 2018 ຢູ່​ທີ່​ຫ້ອງ​ປະຊຸມຫ້ອງວ່າການ​ປົກຄອງ​ແຂວງ ໂດຍພາຍໃຕ້ການ​ເປັນ​ປະ​ທານ​ຂອງ​ ທ່ານ ປອ ສຸວັນນີ ໄຊຊະນະ  ປະທານສະພາ​ປະຊາຊົນ​ແຂວງບໍລິຄຳໄຊ, ເປັນກຽດເຂົ້າຮ່ວມຂອງທ່ານ ນາງ ສີ​​ໃສ ລື​ເດດ​ມູນ​ສອນ ຮອງ​ປະທານ​ສະພາ​ແຫ່ງ​ຊາດ, ​ສະມາ​ຊິກ​ສະພາ​ແຫ່ງ​ຊາດ ປະຈໍາເຂດ​ເລືອ​ກຕັ້ງ​ທີ 11 ​ແຂວງ​ບໍລິ​ຄຳ​ໄຊ, ທ່ານ ປອ ​​ກອງ​ແກ້ວ ​ໄຊ​ສົງຄາມ ​ເຈົ້າ​ແຂວງ​ບໍລິ​ຄຳ​ໄຊ ມີສະມາຊິກສະພາແຫ່ງຊາດ, ສະພາປະຊົນແຂວງ ແລະ ແຂກທີ່ຖືກເຊີນເຂົ້າຮ່ວມ.

    ໃນວາລະກອງປະຊຸມ ທ່ານ ປອ ກອງ​ແກ້ວ ​ໄຊ​ສົງຄາມ ໄດ້ຂຶ້ນໄດ້ລາຍງານການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ປະຈຳປີ 2017 ແລະ ທິດທາງແຜນການປີ 2018 ຂອງແຂວງບໍລິຄຳໄຊ ວ່າ: ໂດຍລວມແລ້ວໃນປີທີ່ຜ່ານມາ ສະພາບການເມືອງ ແລະ ຄວາມເປັນລະບຽບຮຽບຮ້ອຍດ້ານສັງຄົມ ຍັງສືບຕໍ່ມີຄວາມສະຫງົບ, ຊີວິດການເປັນຢູ່ຂອງປະຊາຊົນດີຂື້ນ, ການລົງທຶນ, ການຮ່ວມມືສາກົນ ແລະ ການພົວພັນກັບຕ່າງປະເທດ ດຳເນີນໄປດ້ວຍດີ, ການຜະລິດ ແລະ ການບໍລິການ ມີການຂະຫຍາຍຕົວຢ່າງຕໍ່ເນື່ອງ, ເສດຖະກິດຂະຫຍາຍຕົວ 8,03%, ລວມຍອດຜະລິດຕະພັນພາຍໃນ(GDP)ບັນລຸໄດ້ 5.041 ຕື້ກີບ, ລື່ນແຜນ 0,37% ສະເລ່ຍ 17.757.000 ກີບ/ຄົນ/ປີ ຫຼື ປະມານ 2.151 ໂດລ່າສະຫະລັດ, ຂະແໜງກະສິກຳຂະຫຍາຍຕົວ 3,5%, ອຸດສາຫະກຳ 12,52%, ບໍລິການ 9,77%, ການລົງທຶນທັງໝົດ 1.627 ຕື້ກີບ ລື່ນແຜນ 6,71% ແລະ ສາມາດກັບລາຍຮັບໄດ້ 759,82 ຕື້ກີບ ລື່ນແຜນ 36,09% ທຽບໃສ່ປີຜ່ານມາ ເພີ່ມຂຶ້ນ 50,49%, ສຳລັບການພັດທະນາຕະຫຼາດແຮງງານ, ການຜະລິດເປັນສິນຄ້າ ກໍ່ໄດ້ຮັບການປັບປຸງແກ້ໄຂໃຫ້ດີຂື້ນ ແລະ ສາມາດປະຕິບັດໄດ້ລື່ນແຜນທີ່ໄດ້ວາງໄວ້, ວຽກງານພັດທະນາຊົນນະບົດ ແລະ ລຶບລ້າງຄວາມທຸກຍາກ ຕິດພັນກັບວຽກງານ 3 ສ້າງ ກໍ່ໄດ້ຮັບການເອົາໃຈໃສ່ຢ່າງຈິງຈັງ ປັດຈຸບັນບ້ານທຸກຍາກຍັງເຫຼືອ 31 ບ້ານ ເທົ່າກັບ 10,65%, ຄອບຄົວທຸກຍາກ ໄດ້ຫຼຸດລົງຍັງເຫຼືອ 1.711 ຄອບຄົວ ເທົ່າກັບ 3,4% ພ້ອມດຽວກັນນັ້ນວຽກງານການພັດທະນາສັງຄົມ-ວັດທະນະທຳ, ການພັດທະນາເຂດແຄ້ວນ, ການຮ່ວມມື ແລະ ພົວພັນກັບຕ່າງປະເທດ ກໍ່ໄດ້ຮັບການພັດທະນາຢ່າງລຽນຕິດ ແລະ ມີຜົນສຳເລັດເປັນກ້າວໆ.

​   ກອງປະຊຸມຄັ້ງນີ້ຈະດຳເນີນເປັນເວລາ 4 ວັນເຕັມ ແລະ ຈະໄດ້ຮັບຟັງການລາຍງານ, ການຄົ້ນຄວ້າ​ພິຈາລະນາ ແລະ ຮັບຮອງເອົາ​ເນື້ອ​ໃນ​ສໍາຄັນຕ່າງໆ​ຂອງ​ແຂວງ ເຊັ່ນ: ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານ ຂອງແຂວງ ປະຈຳປີ 2017 ແລະ ທິດທາງແຜນການ ປະຈຳປີ 2018, ບົດລາຍງານຂອງອົງການກວດສອບປະຈຳພາກກາງ ກ່ຽວກັບຜົນການກວດສອບບົດສະຫຼຸບຂາດຕົວການຈັດຕັ້ງປະຕິບັດແຜນງົບປະມານ ສົກປີ 2015-2016, ການຈັດຕັ້ງປະຕິບັດຄໍາແນະນໍາກວດສອບປີຜ່ານມາ ແລະ ບົດລາຍງານຂອງພະແນກກວດກາລັດ ກ່ຽວກັບການຈັດຕັ້ງປະຕິບັດຜົນການກວດກາ ປະຈຳປີ 2017 ແລະ ທິດທາງແຜນການ ປະຈໍາປີ 2018 ແລະ ການແກ້ໄຂຜົນການກວດສອບໃນໄລຍະຜ່ານມາ, ບົດລາຍງານການເຄື່ອນໄຫວວຽກງານ ປະຈຳປີ 2017 ແລະ ທິດທາງແຜນການ ປີ 2018 ຂອງອົງການໄອຍະການປະຊາຊົນແຂວງ ແລະ ສານປະຊາຊົນແຂວງ, ບົດສະຫຼຸບການເຄື່ອນໄຫວວຽກງານ ປະຈໍາປີ 2017 ແລະ ທິດທາງແຜນການ ປະຈໍາປີ 2018 ຂອງສະພາປະຊາຊົນແຂວງບໍລິຄຳໄຊ, ບົດລາຍງານຂອງພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວແຂວງ ກ່ຽວກັບການຈັດຕັ້ງປະຕິບັດວຽກງານທ່ອງທ່ຽວໃນໄລຍະຜ່ານມາ, ແຜນການສົ່ງເສີມການທ່ອງທ່ຽວປີ 2018 ແລະ ແຜນພັດທະນາການທ່ອງທ່ຽວຂອງແຂວງຮອດປີ 2020, ບົດລາຍງານຂອງກອງບັນຊາການ ປກສ ແຂວງ ກ່ຽວກັບການແກ້ໄຂບັນຫາອຸປະຕິເຫດຕາມທ້ອງຖະໜົນພາຍໃນແຂວງ ແລະ ແຜນການແກ້ໄຂໃນຕໍ່ໜ້າ, ພິຈາລະນາ, ປະກອບຄໍາເຫັນ ແລະ ຮັບຮອງເອົານິຕິກຳຂອງແຂວງ ຈໍານວນ 3 ສະບັບ, ພິຈາລະນາ ແລະ ຮັບຮອງເອົາການສະເໜີແຕ່ງຕັ້ງ, ຍົກຍ້າຍບຸກຄະລາກອນ ຕາມການສະເໜີຂອງອົງການປົກຄອງແຂວງ. ສຳລັບບັນດາທ່ານທີ່ມີຄວາມສົນໃຈຕໍ່ກອງປະຊຸມຄັ້ງນີ້ ສາມາດຕິດຕາມໄດ້ຜ່ານທາງສະຖານີວິທະຍຸ FM 101,3 ຂອງແຂວງ ແລະ ເປີດກວ້າງການປະກອບຄຳຄິດຄຳເຫັນ, ຄໍາສະເໜີຂອງພໍ່ແມ່ປະຊາຊົນບັນດາເຜົ່າ ຜ່ານໂທລະສັບສາຍດ່ວນໝາຍເລກ 054 156 ໂດຍບໍ່ເສຍຄ່າໂທນຳອີກ.