ພິທີປະຖະກະຖາວັນສ້າງຕັ້ງກອງທັບປະຊາຊົນລາວ ຄົບຮອບ 69 ປີ (20 ມັງກອນ 1949 - 20 ມັງກອນ 2018) ໄດ້ຈັດຂື້ນໃນວັນທີ 19 ມັງກອນ 2018 ຢູ່ທີ່ຫ້ອງປະຊຸມໃຫ່ຍຂອງແຂວງ ໃຫ້ກຽດເປັນປະທານ ແລະ ປະຖະກະຖາ ໂດຍ ທ່ານ ປອ ສຸວັນນີ ໄຊຊະນະ ຮອງເລຂາພັກແຂວງ ປະທານສະພາປະຊາຊົນແຂວງບໍລິຄຳໄຊ, ມີບັນດາການນຳຂອງແຂວງ, ຫົວໜ້າພະແນກການ, ນາຍແລະ ພົນທະຫານ, ນາຍ ແລະ ພົນຕຳຫຼວດ, ພະນັກງານອາວຸໂສບຳນານ, ນັກຮຽນນັກສຶກສາ ແລະ ພະນັກງານລັດຖະກອນອ້ອມຂ້າງແຂວງ ເຂົ້າຮ່ວມ.

    ໃນພິທີຄັ້ງນີ້ ທ່ານປະທານໄດ້ຫວນຄືນມູນເຊື້ອຮັກຊາດອັນພິລະອາດຫານ ແລະ ນ້ຳໃຈເສຍສະລະຕໍ່ສູ້ບໍ່ຍອມຈຳນົນຂອງກອງທັບປະຊາຊົນລາວ ວ່າ: ພາຍຫຼັງພັກກອມມູນິດອິນດູຈີນໄດ້ຮັບການສ້າງຕັ້ງຂື້ນໃນປີ 1930 ການປະຕິວັດລາວໄດ້ກ້າວຂື້ນສູ່ໄລຍະໃໝ່ ໂດຍມີພັກນຳພາປວງຊົນລຸກຮື້ຂືນຢຶດອຳນາດ ປະກາດເປັນເອກະລາດ ໃນວັນທີ 12 ຕຸລາ 1945, ມາຮອດວັນທີ 20 ມັງກອນ 1949 ກອງທັບລາວອິດສະຫຼະໄດ້ຮັບການສ້າງຕັ້ງຂື້ນຢ່າງເປັນທາງການ ຢູ່ເຂດລາວຮຸ່ງພຽງສາ ເມືອງຊຽງຄໍ້ ແຂວງຫົວພັນ ໂດຍແມ່ນ ທ່ານ ປະທານ ໄກສອນ ພົມວິຫານ ເປັນຜູ້ບັນຊາການໂດຍກົງ, ພາຍໃຕ້ການຊີ້ນຳ-ນຳພາ ທີ່ມີແນວທາງ, ການທະຫານອັນຖືກຕ້ອງຂອງພັກ ກອງທັບປະຊາຊົນລາວໄດ້ເຕີບໃຫ່ຍເຂັ້ມແຂງ, ກ້າວຂື້ນຢຶດດເອົາໄຊຊະນະຢ່າງເນື່ອງນິດລຽນຕິດ ຍິ່ງຕີຍິ່ງເຕີບໃຫ່ຍເຂັ້ມແຂງ ຜົນງານທີ່ພົ້ນເດັ່ນ ທີ່ປະຫວັດສາດໄດ້ຈາລຶກໄວ້ຢ່າງບໍ່ມີວັນລືມ ຄື: ການນຳພາທ່ານຜູ້ນຳປະຕິວັດໂຕນອອກຈາກຄຸກໂພນເຄັງ ໃນເດືອນພຶດສະພາ 1960, ກຳລັງປະຕິວັດໄດ້ປົດປ່ອຍທົ່ງໄຫຫີນຊຽງຂວາງ ປີ 1967, ປົດປ່ອຍຫຼວງນຳທາ ປີ 1962, ເອົາຊະນະຍຸດທະສາດ “ສົງຄາມພິເສດ” ແລະ “ສົງຄາມພິເສດເພີ່ມທະວິ” ຂອງຈັກກະພັດອາເມລິກາ ທີ່ຫວັງທຳລາຍສາຍສຳພັນສູ້ຮົບກັບກອງທັບ ແລະ ປະຊາຊົນຫວຽດນາມ, ກຳປູເຈ່ຍ ແລະ ໄດ້ທັບມ້າງການເຄື່ອນທັບຍຸດທະສາດ “ລາມເຊີນ 719” ໄດ້ຢ່າງຮາບຄາບ, ຍ້ອນຖືກປະລາໄຊຢ່າງໜັກ ແລະ ຖືກໜີບທາງການເມືອງ ແລະ ການຕ່າງປະເທດ ຈັກກະພັດອາເມລິການ ແລະ ລູກແຫຼ່ງຕີນມື ໄດ້ຍອມເຊັນສັນຍາວຽງຈັນ ກ່ຽວກັບການຟື້ນຟູສັນຕິພາບ ແລະ ປະຕິບັດຄວາມຖືກຕ້ອງປອງດອງຊາດຢູ່ລາວ ຄັ້ງທີ່ III ໃນວັນທີ 21 ກຸມພາ 1973 ແລະ ໄດ້ສ້າງຕັ້ງລັດຖະບານປະສົມຊົ່ວຄາວແຫ່ງຊາດ ແລະ ຄະນະມົນຕີປະສົມການເມືອງແຫ່ງຊາດຂື້ນ. ໂດຍການນຳພາອັນສະຫຼາດສ່ອງໃສຂອງພັກ ໄດ້ນຳໃຊ້ 3 ບາດຄ້ອນຍຸດທະສາດ ຄື: ການລຸກຮືຂື້ນຂອງປະຊາຊົນ, ການໜູນໜີບຂອງກຳລັງປະກອບອາວຸດປະຕິວັດ ແລະ ການແຍກຕົວອອກຂອງກຳລັງທະຫານສັດຕູ ໃນທີ່ສຸດ ສາທາລະນະລັດ ປະຊາທິປະໄຕ ປະຊາຊົນລາວ ໄດ້ຮັບການສ້າງຕັ້ງຂື້ນ ໃນວັນທີ່ 2 ທັນວາ 1975. ຫຼັງຈາກປະເທດຊາດໄດ້ຮັບການປົດປ່ອຍຢ່າງສົມບູນ ໄດ້ເປີດສັງກາດໃໝ່ຂອງການປະຕິວັດລາວ ແລະ ໜ້າທີ່ຂອງກອງທັບ ແມ່ນ: ປົກປັກຮັກສາໝາກຜົນຂອງການປະຕິວັດ, ຮັກສາສັນຕິພາບ, ເອກະລາດ, ອະທິປະໄຕ ແລະ ຜືນແຜ່ນດິນອັນຄົບຖ້ວນຂອງ ສ.ປ.ປ ລາວ ໃຫ້ໝັ້ນຄົງຕະຫລອດໄປ.

    ຕອນທ້າຍ ທ່ານປະທານຍັງໄດ້ຮຽກຮ້ອງໃຫ້ພະນັກງານ, ສະມາຊິກພັກ, ທະຫານ, ຕຳຫລວດ ແລະ ປະຊາຊົນລາວບັນດາເຜົ່າ ຈົ່ງຮ່ຳຮຽນເອົາແບບຢ່າງມູນເຊື້ອອັນດີງາມຂອງກອງທັບປະຊາຊົນລາວ, ມີຄວາມສາມັກຄີເປັນປຶກແຜ່ນແໜ້ນໜາ ຮັກສາໃຫ້ໄດ້ຄວາມສຳພັນ ລະຫວ່າງກອງທັບ ກັບປະຊາຊົນ ໃຫ້ເປັນກອງກຳລັງໜື່ງດຽວກັນ ພ້ອມກັນຕີຕ້ານທຸກກົນອຸບາຍທີ່ັຫວັງມ້າງເພທຳລາຍຄວາມໝັ້ນຄົງຂອງຊາດ ແລະ ລະບອບປະຊາທິປະໄຕປະຊາຊົນ.