ກອງປະຊຸມຄົບຄະນະບໍລິຫານງານສະຫະພັນແມ່ຍິງແຂວງຄັ້ງທີ 4 ສະໄໝທີ VI ໄດ້ຈັດຂື້ນໃນວັນທີ 17 ມັງກອນ 2018 ຢູ່ຫ້ອງປະຊຸມຫ້ອງວ່າການປົກຄອງແຂວງບໍລິຄຳໄຊ ໂດຍການເປັນປະທານຂອງ ທ່ານ ນາງ ບຸນຊອນ ວໍລະສານ ປະທານສະຫະພັນແມ່ຍິງແຂວງ ມີບັນດາຄະນະບໍຫານງານແມ່ຍິງແຂວງ, ປະທານສະຫະພັນແມ່ຍິງເມືອງ ແລະ ປະທານແມ່ຍິງຮາກຖານອ້ອມຂ້າງແຂວງເຂົ້າຮ່ວມ.

     ໃນກອງປະຊຸມຄັ້ງນີ້ ທ່ານ ນາງ ຂັນທອງ ພັນທະຈັກ ຮອງປະທານສະຫະພັນແມ່ຍິງແຂວງ ໄດ້ຂື້ນຜ່ານຮ່າງບົດສະຫຼຸບການຈັດຕັ້ງປະຕິບັດມະຕິກອງປະຊຸມສາມັນຄົບຄະນະບໍລິຫານງານ ຄັ້ງທີ 3 ສະໄໝທີ VI  ໃນໄລຍະໜື່ງປີຜ່ານມາ ເຫັນວ່າຫຼາຍວຽກງານຖືກປະຕິບັດ ແລະ ໄດ້ຮັບຜົນສຳເລັດເປັນຢ່າງດີ ໂດຍສະເພາະວຽກງານສຶກສາອົບຮົມການເມືອງ-ແນວຄິດ, ວຽກງານໂຄສະນາ, ວຽກງານຈັດຕັ້ງປັບປຸງ ແລະ ຂະຫຍາຍການຈັດຕັ້ງ, ໃນປີ 2017 ໄດ້ເອົາໃຈໃສ່ກໍ່ສ້າງມະຫາຊົນກ້າວໜ້າ ເພື່ອຂະຫຍາຍເຂົ້າເປັນສະມາຊິກແມ່ຍິງ ໄດ້ 2.638 ຄົນ, ທົ່ວແຂວງມີສະມາຊິກທັງໝົດ 34.412 ຄົນ ພ້ອມດຽວກັນຍັງໄດ້ເອົາໃຈໃສ່ປະຕິບັດພາລະບົດບາດ ໃນການປົກປ້ອງສິດຜົນປະໂຫຍດຂອງແມ່ຍິງ-ເດັກນ້ອຍ, ການສົ່ງເສີມຄວາມກ້າວໜ້າຂອງແມ່ຍິງ ແລະ ການສົ່ງເສີມຄວາມສະເໝີພາບຍິງ-ຊາຍ ໂດຍໄດ້ລົງໄປເຜີຍແຜ່ກົດໝາຍສະຫະພັນແມ່ຍິງຢູ່ແຕ່ລະເມືອງ, ເຜີຍແຜ່ມາດຖານເງື່ອນໄຂການສ້າງຄອບຄົວພັດທະນາຕິດພັນກັບສິດສະເໝີພາບຍິງ-ຊາຍ ໄດ້ 7 ຄັ້ງ, ກົດໝາຍວ່າດ້ວຍການຕ້ານ ແລະ ສະກັດກັ້ນການໃຊ້ຄວາມຮູນແຮງຕໍ່ແມ່ຍິງ ແລະ ເດັກ, ການພັດທະນາສິດສະເໝີພາບຍິງ-ຊາຍ ໄດ້ 58 ຄັ້ງ ສຳລັບການຈັດຕັ້ງປະຕິບັດຂໍ້ແຂ້ງຂັນ 3 ດີ ກໍ່ໄດ້ເອົາໃຈໃສ່ຕິດຕາມ, ກວດກາ ແລະ ຊຸກຍູ້ໃຫ້ບັນດາຮາກຖານ, ໜ່ວຍ ແລະ ບັນດາບ້ານຢ່າງຕໍ່ເນື່ອງ ຈົນສາມາດຍາດໄດ້ຜົນງານອັນພົ້ນເດັ່ນ ທີ່ສະແດງອອກ ຄື: ທົ່ວແຂວງມີພົນລະເມືອງດີ 31.029 ຄົນ, ພັດທະນາດີ 28.788 ຄົນ, ສ້າງຄອບຄົວດີ 25.337 ຄົນ, ອອກຂໍ້ຕົກລົງຢັ້ງຢືນສະມາຊິກແມ່ຍິງ 3 ດີ ປະຈຳປີ 2017 ປະເພດ I ມີ 22.856 ຄົນ, ປະເພດ II ມີ 8.150 ຄົນ, 86 ຮາກຖານ, 211 ໜ່ວຍ, 3 ຈຸ ແລະ 275 ບ້ານ, ຄອບຄົວຕົວແບບ 621 ຄອບຄົວ ແລະ 11 ບ້ານຕົວແບບ, ນອກນັ້ນວຽກງານພັດທະນາຊີວິດການເປັນຢູ່ແກ້ໄຂຄວາມທຸກຍາກ, ການປຸກລະດົມແມ່ຍິງເຂົ້າຮ່ວມພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ, ການພົວພັນຮ່ວມມືກັບຕ່າງປະເທດ ແລະ ວຽກງານກວດກາຂອງສະຫະພັນແມ່ຍິງ ກໍ່ຍັງໄດ້ເອົາໃຈໃສ່ຢ່າງເຂັ້ມງວດ, ໄດ້ຮັບການປັບປຸງ ແລະ ພັດທະນາໃຫ້ດີຂື້ນເປັນກ້າວໆ. ກອງປະຊຸມຄັ້ງນີ້ ບັນດາຜູ້ແທນກອງປະຊຸມຍັງໄດ້ຮັບຟັງການຜ່ານບົດສຳຫຼວດການນຳພາຂອງຄະນະບໍລິຫານງານສະຫະພັນແມ່ຍິງແຂວງ ແລະ ໄດ້ພ້ອມກັນປະກອບຄຳຄິດຄຳເຫັນຂອງຕົນໃສ່ບາງວຽກງານທີ່ສຳຄັນ ເພື່ອນຳໄປພິຈາລະນາ, ຈັດຕັ້ງປະຕິບັດ ບັນດາວຽກງານໃຫ້ມີປະສິທິພາບ ແລະ ໄດ້ຮັບຜົນດີໃນຕໍ່ໜ້າ. 

    ໃນຕອນທ້າຍຂອງວາລະກອງປະຊຸມ ທ່ານ ປອ ກອງແກ້ວ ໄຊສົງຄາມ ກຳມະການສູນກາງພັກ, ເລຂາພັກແຂວງ, ເຈົ້າແຂວງບໍລິຄຳໄຊ ຍັງໄດ້ໃຫ້ກຽດເຂົ້າຮ່ວມໂອ້ລົມ ໂດຍທ່ານໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານທີ່ທາງຄະນະສະຫະພັນແມ່ຍິງແຕ່ລະຂັ້ນຍາດມາໄດ້ ພ້ອມນີ້ທ່ານຍັງໄດ້ໃຫ້ທິດຊີ້ນຳ ແລະ ເນັ້ນໜັກບາງບັນຫາສຳຄັນ ເປັນຕົ້ນແມ່ນ ວຽກງານສຶກສາອົບຮົມການເມືອງ-ແນວຄິດ ໃຫ້ສະມາຊິກແມ່ຍິງມີທັດສະນະຫຼັກໜັ້ນ ແລະ ຫ້າວຫັນຕື່ນຕົວໃນການປະຕິບັດວຽກງານຂອງຕົນ, ສືບຕໍ່ເຜີຍແຜ່ແນວທາງລະໂຍບາຍຂອງພັກ, ລະບຽບກົດໝາຍຂອງລັດ ແລະ ມະຕິຄຳສັ່ງຕ່າງໆ ໃຫ້ລົງສູ່ຮາກຖານທ້ອງຖິນ, ປັບປຸງແບບແຜນວິທີນຳພາ-ເຮັດວຽກ ໃຫ້ຫັນປັນແຜນການລະອຽດ, ສຸມໃສ່ການສົ່ງເສີມ, ຍົກລະດັບ ແລະ ສ້າງໂອກາດໃຫ້ແມ່ຍິງບັນດາເຜົ່າ ໃນການສ້າງສີມືແຮງງານ ແລະ ຍົກລະດັບຊີວິດການເປັນຢູ່ຂອງເອື້ອຍນ້ອງແມ່ຍິງໃຫ້ດີຂື້ນ, ຕ້ອງກຳແໜ້ນເນື້ອໃນຄຳຂວັນ ແລະ ຂໍ້ແຂ່ງຂັນ 3 ດີ ທີ່ສູນກາງສະຫະພັນແມ່ຍີງວາງອອກ ໃຫ້ໄດ້ທາງດ້ານມາດຖານ ແລະ ຮັບປະກັນທາງດ້ານຄຸນນະພາບ.