ໃນວັນທີ 15 ມັງກອນ 2018 ຢູ່ທີ່ຫ້ອງປະຊຸມພະແນກແຜນການ ແລະ ການລົງທຶນແຂວງບໍລິຄຳໄຊ ໄດ້ມີພິທີເຊັນສັນຍາບົດບັນທຶກຄວາມເຂົ້າໃຈ (MOU) ລະຫວ່າງ ພະແນກແຜນການ - ການລົງທືນແຂວງ ກັບ ວິສາຫະກິດສ່ວນບຸກຄົນ ທິບພາພອນບໍລິການຝາກລົດໃຫຍ່ ເພື່ອສຶກສາສໍາຫຼວດຄວາມເປັນໄປໄດ້ ໃນການພັດທະນາເຂດແຄມຂອງ ເລີ່ມແຕ່ປາກນໍ້າຊັນຫາໂຮງໝໍແຂວງ ຕາງໜ້າໃຫ້ແກ່ອຳນາດການປົກຄອງແຂວງບໍລິຄຳໄຊ ເຊັນໂດຍ ທ່ານ ພອນທິລາດ ສິດສາທອນ ຫົວໜ້າພະແນກແຜນການ ແລະ ການລົງທຶນແຂວງ, ຝ່າຍວິສາຫະກິດຜູ້ລົງທືນ ເຊັນໂດຍ ທ່ານ ນາງ ທິບພາພອນ ດິດຍະວົງ ປະທານບໍລິສັດ ຊ້ອງໜ້າໂດຍຫົວໜ້າພະແນກການ, ການນຳຂອງເມືອງ ແລະ ພະນັກງານວິຊາການ ທັງສອງຝ່າຍເຂົ້າຮ່ວມເປັນສັກຂີພິຍານ.

      ວິສາຫະກິດສ່ວນບຸກຄົນ ທິບພາພອນບໍລິການຝາກລົດໃຫຍ່ ແມ່ນມີຄວາມຕ້ອງການສຶກສາຄວາມເປັນໄປໄດ້ໂຄງການຂໍສໍາປະທານທີ່ດິນແຄມຂອງ ເລີ່ມແຕ່ປາກນໍ້າຊັນ ຫາ ໂຮງໝໍແຂວງ ເພື່ອລົງທືນເປີດຮ້ານຄ້າຕະຫຼາດກາງຄືນ ຕິດພັນກັບການທ່ອງທ່ຽວ ແລະ ກິດຈະກໍາຕ່າງໆ ເພື່ອຈະພັດທະນາສະຖານທີ່ດັ່ງກ່າວໃຫ້ກາຍເປັນບ່ອນທ່ອງທ່ຽວ, ພັກຜ່ອນຢ່ອນອາລົມຍາມແລງ, ລວມທັງເປັນສະຖານທີ່ອອກກຳລັງກາຍອີກດ້ວຍ ໂດຍຈະໃຊ້ເວລາສຶກສາເປັນໄລຍະເວລາ 180 ວັນ ຫຼື 6 ເດືອນ ເຊິ່ງປະຈຸບັນບໍລິສັດມີຄວາມພ້ອມທີ່ຈະຈັດຕັ້ງປະຕິບັດໂຄງການໃຫ້ຖືກຕ້ອງ ແລະ ສອດຄ່ອງກັບລະບຽບກົດໝາຍ ໂດຍສະເພາະແມ່ນປະຕິບັດຕາມເນື້ອໃນບົດບັນທຶກສະບັບນີ້ຢ່າງເຂັ້ມງວດ.