ໂດຍປະຕິບັດຕາມ ສິດ ແລະ ໜ້າທີ່ຂອງສະພາປະຊາຊົນແຂວງ ຊຶ່ງໄດ້ກໍານົດໃນລັດຖະທໍາມະນູນ ແລະ ກົດໝາຍວ່າດ້ວຍສະພາປະຊາຊົນຂັ້ນແຂວງ, ໃນຖານະເປັນຕົວແທນແຫ່ງສິດ ແລະ ຜົນປະໂຫຍດຂອງປະຊາຊົນບັນດາເຜົ່າ, ເປັນອົງການອຳນາດນິຕິບັນຍັດຂັ້ນທ້ອງຖິ່ນ, ປະຕິບັດພາລະບົດບາດພິຈາລະນາ ແລະ ຮັບຮອງເອົານິຕິກຳທີ່ສຳຄັນຂອງທ້ອງຖິ່ນ, ຕົກລົງບັນຫາສຳຄັນທີ່ເປັນພື້ນຖານຂອງທ້ອງຖິ່ນ ແລະ ຕິດຕາມກວດກາການເຄົາລົບລັດຖະທຳມະນູນ ແລະ ກົດໝາຍຂອງບັນດາອົງການຈັດຕັ້ງລັດຂັ້ນທ້ອງຖິ່ນ. ມາໃນຕອນບ່າຍຂອງວັນທີ 16 ມັງກອນ 2018 ນີ້ ຢູ່ຫ້ອງປະຊຸມສະພາປະຊາຊົນແຂວງ ໄດ້ຈັດພິທີຖະແຫຼງຂ່າວກ່ຽວກັບການເປີດກອງປະຊຸມສະໄໝສາມັນເທື່ອທີ 4 ຂອງສະພາປະຊາຊົນແຂວງ ຊຸດທີ I ຊື່ງໃຫ້ກຽດຖະແຫຼງໂດຍ ທ່ານ ນວນສະຫວັນ ແສງມະນີ ກໍາມະການພັກແຂວງ ຮອງປະທານສະພາປະຊາຊົນແຂວງ ເຊີ່ງກອງປະຊຸມຄັ້ງນີ້ ຈະໄດ້ໄຂຂຶ້ນຢ່າງເປັນທາງການໃນຕອນເຊົ້າຂອງວັນທີ 23-26 ມັງກອນ 2018 ທີ່ຫ້ອງປະຊຸມເບີ 4 ຂອງແຂວງ, ກອງປະຊຸມ ຈະໄດ້ຮັບຟັງການລາຍງານການຈັດຕັ້ງປະຕິບັດບັນໜ້າວຽກຈາກພາກສ່ວນຕ່າງໆ, ຈະໄດ້ຄົ້ນຄ້ວາ ແລະ ພິຈາລະນາຮັບຮອງເອົາບັນດາບັນຫາສຳຄັນຂອງແຂວງ ຄື: ຈະໄດ້ຮັບຟັງການລາຍງານໂດຍຫຍໍ້ ຈາກທ່ານເຈົ້າແຂວງ ກ່ຽວກັບວຽກງານທີ່ພົ້ນເດັ່ນ ໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ແຜນງົບປະມານປະຈຳປີໃນຕໍ່ໜ້າ; ພິຈາລະນາ ແລະ ຮັບຮອງເອົາບົດລາຍງານການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ຂອງແຂວງ ປະຈຳປີ 2017 ແລະ ທິດທາງແຜນການ ປະຈຳປີ 2018; ພິຈາລະນາ ແລະ ຮັບຮອງເອົາບົດລາຍງານຂອງອົງການກວດສອບປະຈຳພາກກາງ ກ່ຽວກັບຜົນການກວດສອບບົດສະຫຼຸບຂາດຕົວການຈັດຕັ້ງປະຕິບັດແຜນງົບປະມານ ສົກປີ 2015-2016, ການຈັດຕັ້ງປະຕິບັດຄໍາແນະນໍາກວດສອບປີຜ່ານມາ, ບົດລາຍງານຂອງພະແນກກວດກາລັດ ກ່ຽວກັບການຈັດຕັ້ງປະຕິບັດຜົນການກວດກາ ປະຈຳປີ 2017 ແລະ ທິດທາງແຜນການ ປະຈໍາປີ 2018 ແລະ ການແກ້ໄຂຜົນການກວດສອບໃນໄລຍະຜ່ານມາ; ພິຈາລະນາ ແລະ ຮັບຮອງເອົາບົດລາຍງານການເຄື່ອນໄຫວວຽກງານ ປະຈຳປີ 2017 ແລະ ທິດທາງແຜນການ ປີ 2018 ຂອງອົງການໄອຍະການປະຊາຊົນແຂວງ ແລະ ສານປະຊາຊົນແຂວງ; ພິຈາລະນາ ແລະ ຮັບຮອງເອົາບົດສະຫຼຸບການເຄື່ອນໄຫວວຽກງານ ປະຈໍາປີ 2017 ແລະ ທິດທາງແຜນການ ປະຈໍາປີ 2018 ຂອງສະພາປະຊາຊົນແຂວງບໍລິຄຳໄຊ; ພິຈາລະນາ ປະກອບຄໍາເຫັນ ແລະ ຮັບຮອງເອົານິຕິກຳຂອງແຂວງ ຈໍານວນ 3 ສະບັບ; ພິຈາລະນາ ແລະ ຮັບຮອງເອົາບົດລາຍງານຂອງພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວແຂວງກ່ຽວກັບການຈັດຕັ້ງປະຕິບັດວຽກງານທ່ອງທ່ຽວໃນໄລຍະຜ່ານມາ, ແຜນການສົ່ງເສີມການທ່ອງທ່ຽວປີ 2018 ແລະ ແຜນພັດທະນາການທ່ອງທ່ຽວຂອງແຂວງຮອດປີ 2020; ພິຈາລະນາ ແລະ ຮັບຮອງເອົາບົດລາຍງານຂອງກອງບັນຊາການ ປກສ ແຂວງ ກ່ຽວກັບການແກ້ໄຂບັນຫາອຸປະຕິເຫດຕາມທ້ອງຖະໝົນພາຍໃນແຂວງ ແລະ ແຜນການແກ້ໄຂໃນຕໍ່ໜ້າ; ພິຈາລະນາ ແລະ ຮັບຮອງເອົາການສະເໜີແຕ່ງຕັ້ງ, ຍົກຍ້າຍບຸກຄະລາກອນ ຕາມການສະເໜີຂອງອົງການປົກຄອງແຂວງ.

     ໃນໄລຍະດຳເນີນກອງປະຊຸມຄັ້ງນີ້ ຈະໄດ້ອອກອາກາດຖ່າຍທອດສົດ ຜ່ານທາງສະຖານີວິທະຍຸ FM 101,3 ຂອງແຂວງ ແລະ ເປີດກວ້າງການປະກອບຄຳຄິດຄຳເຫັນ, ຄໍາສະເໜີຂອງພໍ່ແມ່ປະຊາຊົນບັນດາເຜົ່າ ຜ່ານໂທລະສັບສາຍດ່ວນໝາຍເລກ 054 156 ໂດຍບໍ່ເສຍຄ່າໂທນຳອີກ.