ທ່າພະບາດ ເປັນເມືອງໜຶ່ງຂອງແຂວງບໍລິຄຳໄຊ ທີ່ໜ້າສົນໃຈ ແລະ ເປັນຈຸດໝາຍປາຍທາງຂອງນັກທ່ອງທ່ຽວທັງພາຍໃນ ແລະ ຕ່າງປະເທດ ທີ່ມັກໃນການທ່ອງທ່ຽວຊົມທໍາມະຊາດ ແລະ ສຶກສາຊີວະນາໆພັນ ເພາະວ່າເມືອງທ່າພະບາດມີແຫຼ່ງທ່ອງທ່ຽວເຖິງ 25 ແຫ່ງ ໃນນັ້ນມີ 18 ແຫ່ງ ທີ່ເປັນແຫຼ່ງທ່ອງທ່ຽວທາງດ້ານທຳມະຊາດ ທີ່ມີຄວາມສວຍສົດງົດງາມ ແລະ ຍັງຄົງຄວາມອຸດົມສົມບຸນຢູ່.

    “ຕາດທວາຍ” ກໍ່ເປັນແຫຼ່ງທ່ອງທ່ຽວທີ່ມີຊື່ສຽງອີກແຫ່ງໜຶ່ງຂອງເມືອງທ່າພະບາດ ຕັ້ງຢູ່ລະຫວ່າງ ບ້ານເວີນທາດ ແລະ ບ້ານທວາຍ ຈາກເທດສະບານເມືອງທ່າພະບາດ ປະມານ 33 ກິໂລແມັດ ແລະ ຫ່າງຈາກເທດສະບານເມືອງປາກຊັນ ພຽງແຕ່ 20 ກວ່າກິໂລແມັດເທົ່ານັ້ນ. ນັກທ່ອງທ່ຽວນິຍົມໄປຫຼິ້ນ “ຕາດທວາຍ” ໃນມື້ພັກ ແລະ ວັນສໍາຄັນຕ່າງໆທາງສາສະໜາ ໂດຍສະເພາະກໍ່ແມ່ນລະດູຝົນຕາດແຫ່ງນີ້ຍິ່ງມີຄວາມສວຍງາມ ແລະ ຈະມີນັກທ່ອງທ່ຽວໄປທ່ຽວຊົມຫຼາຍ ເພາະວ່າ“ຕາດທວາຍ”ຍັງຄົງຄວາມອຸດົມສົມບູນຂອງທຳມະຊາດ ເປັນຕົນແມ່ນປ່າໄມ້ ແລະ ຊີວະນາໆພັນ ທ່ານສາມາດໄປກີນເຂົ້າປ່າແບບຄອບຄົວ ຫຼື ໝູ່ຄະນະກໍ່ໄດ້ ເພາະຢູ່ບໍລິເວນອ້ອມຮອບຈະມີສະຖານທີ່  ທີ່ສາມາດຈັດເປັນບ່ອນນັ່ງຫຼີ້ນຜັກຜອນໄດ້ ພ້ອມດຽວກັນທ່ານສາມາດທ່ຽວຊົມທັດສະນີຍະພາບຂອງພູຜາປ່າໄມ້, ສາຍນໍ້າທີ່ໃສເຢັນ ພາຍໃຕ້ບັນຍາກາດທີ່ເຕັມໄປດ້ວຍຕົ້ນໄມ້ອ້ອມຮອບ ແລະ ສຳຜັດອາກາດທີ່ສົດຊື່ນ ທີ່ທ່ານບໍສາມາດຫ້າໄດ້ໃນຕົວເມືອງ.

      ສະນັ້ນບັນດາທ່ານທີ່ມັກໃນການທ່ອງທ່ຽວທໍາມະຊາດ, ມັກໃນການຫຼີ້ນນໍ້າ ແລະ ສຳຜັດກັບອາກາດສົດຊື່ນ ກໍ່ຢ່າລືມເລືອກຕາດທວາຍເປັນຈຸດໝາຍປາຍທາງການທ່ອງທ່ຽວຂອງທ່ານ ຮັບຮອງເລີຍວ່າທ່ານຈະປະທັບໃຈ ແລະ ເພີດເພີນ ກັບມົນສະເໜ່ຂອງ “ຕາດທວາຍ” ແນ່ນອນ.

ບົດ: ສີປະເສີດ