ວຽງທອງ ກໍ່ເປັນອີກເມືອງໜຶ່ງຂອງແຂວງບໍລິຄຳໄຊທີ່ມີມົນສະເໜ່ສະເພາະຕົວ ເພາະວ່າມີແຫຼ່ງທ່ອງທຽວທາງວັດທະນະທຳ ທີ່ມີຊື່ສຽງອີກແຫ່ງໜຶ່ງຂອງແຂວງ ນັ້ນກໍ່ຄື “ວັດທາດພູວຽງ” ເຊີ່ງເປັນພະທາດທີ່ ພໍ່ແມ່ຜາລີ ໄຊຍະວົງສ໌ ເປັນຜູ້ນຳພາສ້າງ ໃນປີ 1982. ນ້ອກນັ້ນ ເມືອງແຫ່ງນີ້ ຍັງມີການດຳລົງຊີວິດຕິດພັນກັບຮີດຄອງປະເພນີທີ່ຫຼາກຫຼາຍ ແລະ ອຸດົມສົມບູນທາງດ້ານທຳມະຊາດ, ເມື່ອງແຫ່ງນີ້ມີແຫຼ່ງທ່ອງທ່ຽທ່ຽວທຳມະຊາດທີ່ມີຊື່ສຽງອີກຫຼາຍແຫ່ງ ໜຶ່ງໃນນັ້ນກໍ່ແມ່ນ ຕາດຫ້ວຍກູ້

       “ຕາດຫ້ວຍກູ້ ຕັ້ງຢູ່ບ້ານເມືອງມ່ວນ ເມືອງວຽງທອງ ແຂວງບໍລິຄໍາໄຊ ໄປຕາມທາງເລກທີ່ 1D ຫ່າງຈາກເທດສະບານເມືອງໄປ 50 ກິໂລແມັດ ຫຼັງຈາກນັ້ນກໍ່ສືບຕໍ່ການເດີນທາງດ້ວຍການຍ່າງອີກປະມານ 1 ກິໂລແມັດກ່ວາ ກໍ່ເຖີງຈຸດດັ່ງກ່າວ. ຕາດແຫ່ງນີ້ເປັນຕາດທີ່ມີຄວາມສວຍງາມ ແລະ ໂດດເດັ່ນທີ່ສຸດຂອງເມືອງວຽງທອງກໍ່ວ່າໄດ້ ເພາະມີນໍ້າໄຫຼມາຈາກຍອດພູແລບ ຕາມສາຍນ້ໍາຫ້ວຍກູ້ທີ່ມີໄລຍະຍາວພໍສົມຄວນ, ຕະຫຼອດສາຍຫ້ວຍ ທ່ານສາມາດສໍາຜັດກັບບັນດານ້ໍາຕົກນ້ອຍ ຢູ່ຫຼາຍຈຸດທີ່ມີຄວາມງາມສະເພາະແຕ່ລະແຫ່ງ, ມີນໍ້າທີ່ໃສເຢັນຢູ່ຕະຫຼອດເວລາ ໄຫຼຜ່ານປ່າໄມ້ຕືບໜາ ແລະ ມີຄວາມອຸດົມສົມບູນທີ່ສຸດຖ້າທຽບໃສ່ແຫ່ງອື່ນໆ. ສຳລັບເສັ້ນທາງເຂົ້າໄປຫາຕາດກໍ່ສະດວກສະບາຍ ຕະຫຼອດເສັ້ນທາງຈະຖຶກປົກຫູ້ມດ້ວຍຕົ້ນໄມ້ໃຫຍ່ ທີ່ເປັນປ່າໄມ້ອະນຸລັກ ແລະ ຍັງມີສັດປ່າທີຫຼາກຫຼາຍສາຍພັນ ທີ່ອາໃສຢູ່ໃນປ່າແຫ່ງນີ້ ທີ່ຫາພົບເຫັນໄດ້ຍາກໃນສະຖານທີ່ອື່ນ.

      ນອກຈາກນັ້ນ ຢູ່ບໍລິເວັນໃກ້ຄຽງ ທ່ານຍັງສາມາດໄປທ່ຽວຊົມບໍ່ນ້ຳອຸ່ນ ທີ່ຫ່າງຈາກ ຕາດຫ້ວຍກູ້ ພຽງແຕ່ 1 ກິໂລແມັດເທົ່ານັ້ນ ພ້ອມດຽວກັນທ່ານຍັງສາມາດສຳພັດກັບຄວາມງາມຂອງຖ້ຳເຕົ່າ ແລະ ຖ້ຳງູເຫຼືອມ ທີ່ຫ່າງຈາກບໍ່ນ້ຳອຸ່ນ ໄປທາງຕີນພູດ້ານຕາເວັນຕົກ ປະມານ 500 ແມັດ ເຊີ່ງຖ້ຳທັງສອງແມ່ນຢູ່ຕິດກັນ ໄລຍະຫ່າງຂອງປາກຖ້ຳທັງສອງ ແມ່ນປະມານ 3 ແມັດ, ຖ້ຳເຕົ່າຢູ່ເບື້ອງຊາຍ ແລະ ຖໍ້າງູເຫຼືອມ ຢູ່ເບື້ອງຂວາຂອງໜ່ວຍພູ. ຖ້າບັນດາທ່ານຕ້ອງການສຳພັດຄວາມງາມຂອງທຳມະຊາດ, ນຳ້ໃສສະອາດ, ອາກາດບໍລິສຸດ ຕາດຫ້ວຍກູ້ກໍ່ແມ່ນສະຖານທີ່ໜຶ່ງທີ່ທ່ານໜ້າຈະໄປທ່ຽວຊົມ.