ຖ້າເວົ້າເຖິງເມືອງປາກຊັນບັນດາທ່ານກໍ່ຄົງຮູ້ຈັກກັນດີ ເພາະເປັນເມືອງເອກຂອງແຂວງບໍລິຄຳໄຊ ເປັນສູນກາງຂອງການພັດທະນາເສດຖະກິດ-ສັງຄົມຂອງແຂວງ ແລະ ມີເສັ້ນທາງເລກທີ 13 ແລ່ນຜ່ານແຕ່ເໜືອຮອດໃຕ້ ຈຶ່ງກາຍເປັນຈຸດພັກເຊົາຂອງນັກທ່ອງທ່ຽວເດີນທາງທັງຫຼາຍ ທີ່ສັນຈອນຜ່ານເສັ້ນທາງດັ່ງກ່າວ ແລະ ຮ້ານອາຫານກຸຫຼາບປາກຊັນ ກໍ່ເປັນອີກຮ້ານໜຶ່ງທີ່ມີຊື່ສຽງຂອງເມືອງປາກຊັນ ທີ່ໃຜໆມາຮອດກໍ່ຕ້ອງໄດ້ຈອດຢຸດພັກ ແລະ ຊີມອາຫານແຊບໆຢູ່ທີ່ຮ້ານແຫ່ງນີ້.

          ຕາມການໃຫ້ຂໍ້ມູນຂອງ ທ່ານ ນາງ ວົງພະຈັນ ລາດຊະວົງ ຜູ້ຈັດການຮ້ານອາຫານກຸຫຼາບປາກຊັນ ໄດ້ໃຫ້ຮູ້ວ່າ: ຮ້ານແຫ່ງນີ້ ໄດ້ເລີ່ມໃຫ້ບໍລິການແຕ່ ວັນທີ 14 ຕຸລາ 2015 ປັດຈຸບັນຄົບຮອບ 2 ປີແລ້ວ ໂດຍທາງຮ້ານຈະເປີດຕັ້ງແຕ່ ເວລາ 6 ໂມງເຊົ້າ ຈົນເຖີງ 2 ໂມງກາງຄືນ, ສາມາດຮັບຮອງແຂກໄດ້ 300 ບ່ອນນັ່ງ, ມີພະນັກງານທັງໝົດ 25 ຄົນ ທີ່ເຄີຍຜ່ານການເຝິກອົບຮົມວຽກງານບໍລິການ ຈາກພາກສ່ວນທີ່ກ່ຽວຂ້ອງມາແລ້ວ ຈຶ່ງຮັບປະກັນໄດ້ເຖິງຄວາມວ່ອງໄວ ແລະ ຄຸນນະພາບຂອງການໃຫ້ບໍລິການ, ປັດຈຸບັນນີ້ ໃນແຕ່ລະມື້ມີແຂກເຂົ້າມາໃຊ້ບໍລິການບໍ່ຕ່ຳກວ່າ 500 ຄົນ. ທາງຮ້ານໄດ້ມີຫຼາຍລາຍການອາຫານ ທີ່ໃຊ້ວັດຖຸດິບສົດໃໝ່ທຸກມື້ ແລະ ລາຄາເປັນກັນເອງ ໄວ້ຄອຍຕ້ອນຮັບແຂກ ບໍ່ວ່າອາຫານພື້ນເມືອງລາວ ຫຼື ອາຫານສາກົນ ເຊັ່ນ: ກ້ອຍປານ້ຳຂອງ, ແກງປານ້ຳຂອງ, ຕຳໝາກຫຸ່ງ, ລາບໄກ່ງວງ, ຕົ້ມນ້ອງງົວ, ສະປາເກັດຕີ່, ທອດມັນຝຼັງ ແລະ ເມນູອື່ນໆອີກຫຼວງຫຼາຍ ພິເສດເວລາ 12-14 ໂມງ ແລະ 19-21 ໂມງແລງ ທາງຮ້ານໄດ້ມີການສະແດງສີລະປະ 3 ລາຍການຄືການພ້ອນປະກອບບົດເພງຂອງບັນດາພະນັກງານຂອງຮ້ານ ເພື່ອເຮັດໃຫ້ແຂກທີ່ເຂົ້າມາໃຊ້ບໍລິການຮູ້ສຶກເພີດເພີນ ແລະ ຜ່ອນຄາຍ ໄປກັບການສະແດງ ພ້ອມດຽວກັນນີ້ ໃນຊົ່ວໂມງດັ່ງກ່າວ ແຂກກໍ່ຍັງສາມາດຫຼີ້ນເກມກັບທາງຮ້ານໄດ້ອີກ ຄື: ຖ້າທ່ານໄດ້ຂື້ນໄປປະກອນສຽງເພງກ່ຽວກັບແຂວງບໍລິຄຳໄຊ ເຊັ່ນ: ເພງກຸຫຼາບປາກຊັນ, ເຊີນນ້ອງມາຢາມ, ເຊີນທ່ຽວບໍລິຄຳໄຊ...ກໍ່ຈະໄດ້ຮັບຂອງລາງວັນເປັນອາຫານ ຫຼື ເຄື່ອງດື່ມຈາກທາງຮ້ານ, ມື້ລະ 20 ລາງວັນ. ນອກຈາກສິ່ງທີ່ກ່າວມາຂ້າງເທີງແລ້ວ ທາງຮ້ານຍັງມີຫ້ອງພິເສດໄວ້ຄອຍຮັບຮອງບັນດາທ່ານທີ່ຕ້ອງການຮັບປະທານອາຫານແບບເປັນສ່ວນຕົວ, ສຳລັບແຂກທີ່ມາເປັນຄອບຄົວ ກໍ່ມີເຄື່່ອງຫຼີ້ນສຳລັບເດັກນ້ອຍໄວ້ຄອຍບໍລິການແບບບໍ່ໄດ້ເສຍຄ່າໃຊ້ຈ່າຍ ພ້ອມນີ້ກໍ່ຍັງມີເຄື່ອງດື່ມອີກຫຼາກຫຼາຍຊະນິດ ທີ່ທ່ານສາມາດເລືອກໄດ້ຕາມຄວາມຕ້ອງການ.

           ຮ້ານອາຫານກຸຫຼາບປາກຊັນ ຕັ້ງຢູ່ທີ່ບ້ານໂພນໄຊ, ແຄມທາງເລກທີ່ 13, ຕໍ່ໜ້າອານຸສາວະລີ ທ່ານ ສີສົມພອນ ລໍວັນໄຊ ແລະ ໃກ້ກັບ 4 ແຍກໄຟແດງທ່າດ່ານ ຖ້າທ່ານໃດຮູ້ສຶກເມື່ອຍຈາກການເດີນທາງ ຕ້ອງການພັກຜ່ອນ ແລະ ຊີມອາຫານແຊບໆກ່ອນອອກເດີນທາງ ກໍ່ສາມາດໄປແວ່ໃຊ້ບໍລິການຮ້ານອາຫານແຫ່ງນີ້ໄດ້ ຮັບຮອງເລີຍວ່າທ່ານຈະບໍ່ຜິດຫວັງແນ່ນອນ.