ທ່າພະບາດ ກໍ່ເປັນອີກເມືອງໜຶ່ງຂອງແຂວງບໍລິຄຳໄຊ ທີ່ມີຄວາມຫຼາກຫຼາຍທາງດ້ານວັດທະນະທຳ, ຮິດຄອງປະເພນີ ພ້ອມທັງທີ່ມີຄວາມອຸດົມສົມບູນທາງດານຊັບພະຍາກອນທຳມະຊາດ ແລະ ສິ່ງແວດລ້ອມ ເພາະວ່າມີຊາຍແດນຕິດກັບປ່າສະຫງວນພູເຂົາຄວາຍ ເຮັດໃຫ້ເມືອງນີ້ມີແຫຼ່ງທ່ອງທ່ຽວທາງດ້ານທຳມະຊາດ ທີ່ມີຄວາມສວຍງາມຫຼາຍແຫ່ງ ເປັນຕົ້ນແມ່ນ ນ້ຳຕົກຕາດຍອງ, ນ້ຳຕົກຕາດມັງກອນ, ຕາດຊາຍ, ຕາດເລິກ ແລະ ອື່ນໆ ທີ່ເປັນຕາໄປຢ້ຽມຢາມ ແລະ ທ່ຽວຊົມທຳມະຊາດທີ່ຍັງຄົງອຸດົມສົມບູນດ້ວຍຊີວະນາໆພັນ.

       “ຕາດເລິກ” ກໍ່ເປັນອີກຕາດໜຶ່ງຂອງເມືອງທ່າພະບາດ ທີ່ມີຄວາມສວຍງາມບໍ່ແພ້ແຫຼ່ງທ່ອງທ່ຽວແຫ່ງອື່ນໆ. ນ້ຳຕົກຕາດເລິກ ຕັ້ງຢູ່​ບ້ານ ຫາດ​ໄຄ້ ຫ່າງຈາກເທດສະບານເມືອງປະມານ 17 ກິໂລແມັດ ເປັນສະຖານທີ່ທ່ອງທ່ຽວ ໃນປ່າສະຫງວນແຫ່ງຊາດພູເຂົາຄວາຍ, ສາມາດເຂົ້າ​​ໄປເຖິງ​ໄດ້​ດ້ວຍການ​ຂີ່​ລົດ​ ຫຼືວ່າ ທ່ານອາດຈະຍ່າງ​​ເພື່ອ​ຊົມທີວທັດ​ທຳ​ມະ​ຊາດເຂົ້າ​ໄປ​ຫາ​ຕາດກໍ່ໄດ້. ຕາດເລິກ ເປັນນໍ້າຕົກຕາດທີ່ຂວາງທິດທາງການໄຫຼຂອງກະເເສແມ່ນໍ້າເລິກ ຈື່ງເຮັດໃຫ້ກະແສນໍ້າໄຫຼເຊາະກ້ອນຫີນເປັນເວລາຫຼາຍລ້ານປີ ຈົນເຮັດໃຫ້ຕາດມີຫຼາຍຮູບຫຼາຍລັກສະນະ ແລະ ມີງົດງາມເປັນເອກະລັກສະເພາະຕົວ.

      "ຕາດ​ເລິກ" ເລີ່ມເປີດໃຫ້ບໍລິການຢ່າງເປັນທາງການແຕ່ປີ 2004 ໂດຍຈະມີພະນັກງານນຳທ່ຽວ ເປັນຜູ້ຮັບຕ້ອນ ແລະ ນຳພາການທ່ອງທ່ຽວ. ​ຕາດ​ເລິກ ເໝາະສົມຜູ້ທີ່ມີຈຸດປະສົງຈະມາທ່ຽວຊົມ, ກີນເຂົ້າປ່າ ແລະ ລົງຫຼີນນ້ຳທີ່ໃສເຢັນສະບາຍ ນອກນັ້ນ ຢູ່ບໍລິເວນນີ້ນັກທ່ອງທ່ຽວຍັງສາມາດຍ່າງປ່າເພື່ອສຶກສາຊີວະນາໆພັນ ແລະ ຕັ້ງເຕັ້ນຄ້າງຄືນນອນກາງປ່າ ເພື່ອສຳພັດກັບທຳມະຊາດຢ່າງແທ້ຈິງ ເພາະວ່າຈະມີຊາວບ້ານທີ່ພ້ອມຈະໃຫ້ຂໍ້ມູນ ແລະ ບໍລິການນັກທ່ອງທ່ຽວ ທີ່ຜ່ານການເຝິກອົມຮົມມາແລ້ວ. ນອກຈາກກິດຈະກຳດັ່ງກ່າວແລ້ວ ຖ້າບັນດາທ່ານຢາກປ່ຽນບັນຍາກາດ ທ່ານກໍ່ສ້າມາດໄປຢຽມຊົມຕາດຊາຍທີ່ມີຄວາມສວຍງາມ ເຊິງມີໄລຍະທາງຫ່າງຈາກຕາດເລີກປະມານ 1,5 ກິໂລແມັດ, ຕາດຊ້າງ ຫ່າງ​ຈາກ​ຕາ​ດ​ເລິກ 3,5 ກິໂລແມັດ ແລະ ຍັງມີຫໍພິພິທະ​ພັນ ​​ທີ່ເປີດໃຫ້ນັກທ່ອງທ່ຽວ, ​ນັກຮຽນ​, ນັກສຶກສາ​ທັງ​ພາຍ​ໃນ ​ແລະ ຕ່າງປະ​ເທດ ເຂົ້າໄປ​ສຶກສາ​ຄົ້ນຄວ້າກ່ຽວ​ກັບ​ທຳ​ມະ​ຊາດ ​ແລະ ສິ່ງ​ແວດ​ລ້ອມ ​ອີກດ້ວຍ.