ປາກຊັນ ເປັນເມືອງເອກຂອງແຂວງບໍລິຄຳໄຊ ມີເສັ້ນທາງ ເລກທີ 13 ໃຕ ແລ່ນຜ່ານຕົວເມືອງແຕ່ເໜືອຮອດໃຕ້ ເປັນທ່າແຮງໃນການພັດທະນາເສດຖະກິດ-ສັງຄົມ ໄດ້ເປັນຢ່າງດີ ນອກຈາກນັ້ນເມືອງປາກຊັນຍັງມີແຫຼງທ່ອງທ່ຽວທ່າງທຳມະຊາດ, ປະຫວັດສາດ ແລະ ວັດທະນະທຳ ທີ່ໜ້າສົນໃຈຫຼາຍແຫ່ງ ເປັນຕົນແມ່ນວັດດານ, ດານໜອງສາມມານ, ຫາດຊາຍຂາວ ແລະ ອື່ນໆ ທີ່ເປັນທ່າແຮງໃນການພັດທະນາອີກທາງໜຶ່ງ.

    “ຕາດເຮືອຫັກ” ກໍ່ເປັນອີກໜຶ່ງແຫຼ່ງທ່ອງທ່ຽວທີ່ໜ້າສົນໃຈ ແລະ ໄດ້ຮັບການຂື້ນສະຖິຕິເປັນແຫຼ່ງທ່ອງທ່ຽວທາງທໍາມະຊາດ ໃນຈໍານວນ 89 ແຫ່ງຂອງແຂວງປັດຈຸບັນ, ຕາດນີ້ແມ່ນຕັ້ງຢູ່ບ້ານຫາງຊີງສະຫວ່າງ ຫ່າງຈາກເທດສະບານເມືອງໄປທາງນະຄອນຫຼວງວຽງຈັນ ຕາມທາງເລກທີ່ 13 ໃຕ້ ປະມານ 22 ກິໂລແມັດ ແລ້ວລ້ຽວຂວາເຂົ້າທາງດີນແດງປະມານ 3 ກິໂລແມັດ ຕໍ່ດ້ວຍການຍ່າງປ່າຊົມທໍາມະຊາດໄປອີກ 2 ກິໂລແມັດ ກໍ່ຈະເຖີງຕາດດັ່ງກ່າວ. ຕາດເຮືອຫັກ ເປັນອີກຕາດທີ່ມີຄວາມງາມບໍ່ໜ້ອຍກ່ວາຕາດອື່ນໆ ເພາະວ່າເປັນຕາດທີ່ມີຄວາມສູງຊັນໄຫຼລົງມາໃສ່ສາຍນ້ໍາເຕັກ ໄຫຼຕົກລົງຕາມເງີບຫີນເປັນພັກ, ເປັນຊັ້ນສະລັບຊັບຊ້ອນກັນຕາມກະແສນໍ້າ ແລ້ວຕົກໃສ່ເວີງນ້ໍາທີ່ເປັນອ່າງໃຫຍ່ ທີ່ເໝາະກັບການຫຼີ້ນນໍ້າຕາມອັດທະຍາໄສ. ຈຸດພິເສດອີກອັນໜຶ່ງຂອງຕາດດັ່ງກ່າວແມ່ນ ຢູ່ຕາມແຄມນໍ້າ ແລະ ພື້ນນໍ້າ ຈະເຕັມໄປດ້ວຍໂງ່ນຫີນໃຫຍ່ນ້ອຍຢ່າງຫຼວງຫຼາຍ, ສາຍນໍ້າກໍ່ຫັກຄົດຢູ່ຫຼາຍຊັ້ນ ເປັນມົນສະເໜ່ ແລະ ຄວາມສວຍງາມສະເພາະຕົວຂອງຕາດແຫ່ງນີ້. “ຕາດເຮຶອຫັກ” ສາມາດໄປທ່ຽວໄດ້ຕະຫຼອດລະດູການ ແຕ່ລະດູທີ່ສວຍງາມ ແລະ ມີສະເໜ່ແມ່ນລະດູຝົນ ເໝາະສຳລັບການໄປຫຼີ້ນນໍ້າ, ໄປພັກຜ່ອນ, ໄປກີນເຂົ້າປ່າ ແລະ ຍ່າງເລາະຊົມທໍາມະຊາດຕາມດານຫີນທີ່ກ້ວາງໃຫຍ່, ດອກໄມ້ປ່າຕາມລະດູການທີ່ສວຍງາມ, ປ່າໄມ້ທີ່ມີອຸດົມສົມບູນ ແລະ ອາກາດອັນບໍລິສຸດ ທີ່ສ້າງຄວາມປະທັບໃຈໃຫ້ກັບຜູ້ທີ່ໄປທ່ຽວຊົມ.

       ນອກຈາກນັ້ນບໍລິເວັນໃກ້ໆຂອງຕາດເຮືອຫັກ ຍັງມີຕາດທີ່ໜ້າສົນໃຈ ແລະ ສວຍງາມອີກ 3 ແຫ່ງຄື: ຕາດວັງທອງ, ຕາດວັງເທົາ ແລະ ຕາດສູງ, ຫ່າງໄປທາງໃຕ້ປະມານ 200 ແມັດ ຍັງມີຫີນທີ່ມີລັກສະນະຄ້າຍຄືກັບໂຕເຕົ່າ ຫຼື ຫີນເກັດເຕົ່ານັ້ນເອງ. ຖ້າທ່ານໃດຕ້ອງການຜັກຜ່ອນ ແລະ ສຳຜັດກັບທຳມະຊາດ ທີ່ຍັງຄົງຄວາມອຸດົມສົມບຸນ “ຕາດເຮືອຫັກ” ກໍ່ເປັນອີກບ່ອນໜຶ່ງທີ່ທ່ານ ແລະ ຄອບຄົວ ຄວນຈະໄປຢ້ຽມຊົມ.